“Artkaspi.az” ədəbi-mədəni saytı və “Kaspi” maarifçilik meydanı” kitabı ictimaiyyətə təqdim edilib

AZ RU EN

Ana səhifə / Arxiv / “Artkaspi.az” ədəbi-mədəni saytı və “Kaspi” maarifçilik meydanı” kitabı ictimaiyyətə təqdim edilib

“Artkaspi.az” ədəbi-mədəni saytı və “Kaspi” maarifçilik meydanı” kitabı ictimaiyyətə təqdim edilib

18.02.2017 [10:04]

“Kaspi” maarifçilik meydanı” kitabı Azərbaycanın maarifçilik tarixi, dövlətçilik, müstəqillik ənənələri, mədəniyyəti və ədəbiyyatı ilə maraqlanan oxucular üçün zəngin xəzinədir.
AZƏRTAC xəbər verir ki, bu fikirlər fevralın 17-də Beynəlxalq Mətbuat Mərkəzində kitabın təqdimat mərasimində səsləndirilib.
Mərasimini giriş sözü ilə açan Azərbaycan Mətbuat Şurasının sədri, Milli Məclisin deputatı Əflatun Amaşov əvvəlcə “Kaspi” qəzetinin yaranma tarixi haqqında məlumat verib. Bildirib ki, müxtəlif zamanlarda “Kaspi” qəzetində dərc olunan əsas materiallar toplu şəklində “Kaspi” maarifçilik meydanı” nəşrində yer alıb. Kitabda ömrünü-gününü xalq yolunda, millətinin istiqlalı uğrunda fəda etmiş ziyalılarımız haqqında oxuculara ətraflı məlumat verilir.
Sonra “Kaspi nəşrləri” layihəsinin rəhbəri, kitabın ideya və “Ön söz”ünün müəllifi, filologiya üzrə fəlsəfə doktoru Sona Vəliyeva nəşrlə bağlı fikirlərini bölüşüb: “Kaspi - maarifçilik meydanı” adlanan bu kitab XIX əsrin sonu - XX əsrin əvvəllərində ağır, məşəqqətli, lakin şərəfli fəaliyyət yolu keçmiş Azərbaycanın görkəmli maarifçi mütəfəkkirlərinin ruhuna növbəti minnətdarlığımızdır”. Qeyd edib ki, kitabda 2013-2015-ci illərdə “Kaspi” qəzetində dərc olunan Həsən bəy Zərdabi, Hacı Zeynalabdin Tağıyev, Əlimərdan bəy Tobçubaşov, Əli bəy Hüseynzadə, İsmayıl bəy Qaspıralı, Əhməd bəy Ağaoğlu, Nəriman Nərimanov, Ömər Faiq Nemanzadə, Firudin bəy Köçərli, Şəfiqə xanım Əfəndizadə, Üzeyir və Ceyhun Hacıbəylilər, Məhəmməd və Behbud Şahtaxtlıların həyat və fəaliyyətləri haqqında məqalələr, araşdırma yazıları, arxiv sənədləri, fotolar yer alıb. Kitabda əksini tapan yazılar Azərbaycanın maarifçilik tarixinin araşdıranlar üçün çox dəyərli mənbədir.
Tədbir çərçivəsində “Kaspi”nin bütün saylarının elektron variantı Azərbaycan Milli Kitabxanasında saxlanılması üçün qurumun direktoru Kərim Tahirova təqdim edilib.
Elektron nəşri təhvil alan kitabxananın direktoru Kərim Tahirov dəyərli hədiyyə üçün kitabxananın 120 mindən artıq oxucusu adından “Kaspi” ailəsinə minnətdarlığını bildirib. Qeyd edib ki, bu nəşri milli kitabxananın saytı vasitəsilə bütün dünyaya yayacaqlar.
“Artkaspi.az” adlı ədəbi-mədəni saytı haqqında da ətraflı məlumat verilib. Diqqətə çatdırılıb ki, 3 əsrin qəzeti adlandırılan “Kaspi”nin ənənələrini davam etdirən yeni portalda əsasən Azərbaycan mədəniyyəti, ədəbiyyatı haqqında silsilə materiallar yer alır. Burada, həmçinin tarixi şəxsiyyətlərin həyat və fəaliyyətləri araşdırılaraq oxuculara təqdim olunur. Portalın elektron kitab bölümündə Azərbaycan ədəbiyyatı ilə yanaşı, digər xarici ədəbiyyatlar, lüğətlər, antologiyalar, ensiklopediyalarla tanış olmaq mümkündür.

Paylaş:

Baxılıb: 363 dəfə