Səudiyyə Ərəbistanı Azərbaycana investisiya qoyuluşunda maraqlıdır

AZ RU EN

Ana səhifə / Arxiv / Səudiyyə Ərəbistanı Azərbaycana investisiya qoyuluşunda maraqlıdır

Səudiyyə Ərəbistanı Azərbaycana investisiya qoyuluşunda maraqlıdır

06.03.2019 [09:42]

Bu il Azərbaycan ixrac missiyası Səudiyyə Ərəbistanına səfər edəcək
İqtisadiyyat naziri Şahin Mustafayev ölkəmizdə səfərdə olan Səudiyyə Ərəbistanı Krallığının Baş İnvestisiya Qurumunun rəhbəri, Azərbaycan ilə Səudiyyə Ərəbistanı arasında Müştərək Komissiyanın həmsədri İbrahim bin Əbdülrəhman əl-Ömərin başçılıq etdiyi nümayəndə heyəti ilə görüşüb.
İqtisadiyyat Nazirliyinin mətbuat xidmətindən AZƏRTAC-a bildirilib ki, görüşdə Ş.Mustafayev ölkələrimiz arasında əlaqələrin inkişafında Azərbaycan Respublikası Prezidentinin Səudiyyə Ərəbistanına səfərlərinin, aparılan danışıqların mühüm əhəmiyyətini vurğulayıb, yüksək səviyyəli siyasi münasibətlərin iki ölkə arasında iqtisadi əməkdaşlığın genişlənməsi üçün əlverişli zəmin yaratdığını diqqətə çatdırıb. Qeyd edib ki, ölkələrimiz arasında möhkəm müqavilə-hüquq bazası yaradılıb, Azərbaycan və Səudiyyə Ərəbistanı biznes dairələri arasında əlaqələr uğurla inkişaf edir, iqtisadi əməkdaşlığın daha da genişləndirilməsi məqsədilə Bakıda və Ər-Riyadda biznes forumlar keçirilib, Ər-Riyad və Ciddə şəhərlərinə ixrac missiyaları təşkil olunub. Cari ildə də Azərbaycan ixrac missiyası Səudiyyə Ərəbistanına səfər edəcək.
Nazir deyib ki, Səudiyyə Ərəbistanı şirkətləri indiyədək Azərbaycan iqtisadiyyatına 370 milyon dollar investisiya yatırıb. Səudiyyə İnkişaf Fondu ilə məktəb tikintisi, kanal və yol tikintisi sahələrində uğurlu maliyyə əməkdaşlığı həyata keçirilib, su təchizatı və kanalizasiya sistemlərinin yenidən qurulması layihələri üzrə işlər davam etdirilir. Son illərdə Səudiyyə Ərəbistanından Azərbaycana gələn turistlərin sayı əhəmiyyətli dərəcədə artıb. Bakıda keçirilən Azərbaycan ilə Səudiyyə Ərəbistanı arasında Müştərək Komissiyanın iclası, həmçinin iş adamları üçün təşkil edilmiş işgüzar görüş ölkələrimiz arasında əməkdaşlığa töhfə verir.
Ş.Mustafayev Səudiyyə Ərəbistanı iş adamlarını Azərbaycandakı əlverişli işgüzar şəraitdən yararlanmağa, sənaye parklarına və məhəllələrinə, aqroparklara investisiya yatırmağa dəvət edib.
Səudiyyə Ərəbistanı Krallığının Baş İnvestisiya Qurumunun rəhbəri, Azərbaycan ilə Səudiyyə Ərəbistanı arasında Müştərək Komissiyanın həmsədri İbrahim bin Əbdülrəhman əl-Ömər Azərbaycandakı sabitlikdən, inkişafdan məmnunluğunu, ölkəsinin Azərbaycana investisiya qoyuluşunda marağını diqqətə çatdırıb, iki ölkə arasında əlaqələrin bundan sonra da inkişaf edəcəyinə əminliyini bildirib.
Görüşdə energetika, investisiyalar, alternativ enerji, kənd təsərrüfatı, kimya, turizm sahələrində əməkdaşlıq, birgə layihələrin icrası və sair məsələlər müzakirə olunub.
İbrahim bin Əbdülrəhman əl-Ömər Səudiyyə Ərəbistanı iş adamlarının Azərbaycan sahibkarları ilə fəal əməkdaşlıqda maraqlı olduqlarını bildirib və bu məqsədlə hər iki ölkənin biznes dairələrinin faydalana biləcəyi elektron bazanın yaradılmasını təklif edib.

Paylaş:

Baxılıb: 731 dəfə