Xarici ermənipərəst dairələrin qondarma quruma pul verməməsi Cəmil Həsənovun rəhbərlik etdiyi satqınlar klubunun ləğvini gündəmə gətirib
Bir müddət öncə fəaliyyəti qeyri-rəsmi şəkildə “sona yetmiş” qondarma “Milli şura” artıq rəsmən tarixə çevrilir. Belə ki, digər partiyaların və qurumların qondarma “şura”nı tərk etməsinin ardından bu qondarma ermənipərəst təşkilat demək olar ki, yalnız AXCP üzvlərindən ibarət idi. Bu qondarma “şura”dan özünün pul kisəsi kimi istifadə edən AXCP sədri Əli Kərimli vaxtilə partiyasından qovduğu Cəmil Həsənovu bu adı olub özü olmayan təşkilatın rəhbərliyinə təyin etməklə “Milli şura” adı altında əldə etdiyi ianələri mənimsəməyə çalışırdı.
Amma deyəsən radikal düşərgənin bu “cəbhəsində” də işlər qarışıb. Xatırladaq ki, ötən il “Milli şura” ilə AXCP-nin keçirdiyi icazəli mitinqlərin fiaskoya uğraması, hər iki təşkilatın mitinqə adam gətirə bilməməsi gərginlik yaratmışdı. Qondarma “şura”nı AXCP-yə yedək adlandıran partiya üzvləri sosial şəbəkələrdə “şuraçıları” açıq şəkildə təhqir edirdilər. Hətta vəziyyət o həddə çatdı ki, Ə.Kərimli özünün “əlaltısına” çevirdiyi C.Həsənovla qarşı-qarşıya dayandılar. AXCP-nin rəhbərlərindən bəziləri “Milli şura”nı mitinqlərin pulunu oğurlamaqda ittiham belə etmişdilər. Onlar bildirmişdilər ki, “Milli şura”nın mitinqlərə çıxardığı adamların sayı verilən pulun miqdarına uyğun gəlmir.
Artıq Ə.Kərimli ilə C.Həsənovun yolları tam şəkildə ayrılıb. Hətta öz nəzarətindəki qəzeti belə C.Həsənovun üzünə bağlayan AXCP sədrini bu addımı atmağa “məcbur” edənsə, xarici ermənipərəst dairələrin birmənalı şəkildə qondarma şuraya pul ayırmaqdan imtinası ilə bağlıdır. Belə ki, məhz ötənilki icazəli mitinqlərə barmaqla sayılacaq qədər üzv çıxaran bir “təşkilata” pul ayırmağı “məsləhət bilməyən” erməni lobbisi və bu lobbini dəstəkləyən xarici dairələr Ə.Kərimlinin planlarını “suya düşürüb”. Ə.Kərimli isə bunun qarşılığında C.Həsənovdan “Milli şura”nı buraxmasını tələb edib. Qurumun birmənalı şəkildə ləğv edilməsi ilə bağlı açıqlamanın isə yaxın zamanlarda veriləcəyi bildirilir.
Vurğuladığımız kimi, illərdir Azərbaycan siyasətində heç bir uğuru ilə yadda qalmayan, öz siyasi karyerasını (xalqın, dövlətin maraqlarını satmaq siyasi fəaliyyət adlandırılarsa-P.S) yalnız korporativ maraqlarını təmin etməyə, xaricdən pul alıb ölkədə qarşıdurma yaratmağa cəhd göstərməyə sərf edən, öz kiçik dairələrində adlarını “siyasi lider” qoyan, amma “liderliyi” yalnız kabineti ilə məhdudlaşanlar xalqın milli mənafeyini özünün alver predmetinə çevirib. Görünən budur ki, hətta ən minimal siyasi, nəzəri elmi biliklərə malik olmayan, hər şeyi yalnız qışqırmaq, hay-küy salmaq fonunda görən, təfəkkürləri 1990-cı illərdən bəri inkişaf etməyən radikal müxalifət başçıları oyunlarının faydasız olduğunu dərk etmək məcburiyyətindədirlər. Çünki artıq xarici ermənipərəst mərkəzlər belə onların pul xatirinə oynadıqları oyunları görə bilirlər.
Bu fakt isə bir daha göstərdi ki, xalqının, millətinin maraqlarını özünün pul hərisliyinə qurban verənlərin kütləvi aksiya keçirmək və ya normal siyasi partiya kimi sivil mübarizə aparmaq gücü, imkanı və potensialı yoxdur.
Əslində, AXCP ilə qondarma qurum arasında yaranan bu “münasibət” “Milli şura” adlanan satqınlar klubunun əsl mahiyyətini üzə çıxarır. Bu “şura”nın da radikalların digər “birlikləri” kimi yalnız korporativ maraqlara söykəndiyi, puldan, xəyanətdən başqa bir amalının olmadığı proseslərin inkişafında öz əksini tapdı. Sadəcə, maddi maraq, şəxsi mənafeyin təminatı əsas həlledici rol oynadı. Yəni, “bağda əriyin bitməsi” ilə “Milli şura” da bitdi.