“Hüquq müdafiəçisi” radikalların nəzarətində olan KİV-lərə verdiyi son müsahibəsində həyatı boyu ermənilərə xidmət etməsini, “qrant alverçiliyini” “dissidentlik fəaliyyəti” ilə pərdələməyə çalışıb
Sülh və Demokratiya İnstitutunun rəhbəri, ermənipərəst “hüquq müdafiəçisi” Leyla Yunusova radikal müxalifət düşərgəsinin nəzarətində olan mətbuat orqanlarının “parlaq ulduzu” olaraq qalmaqdadır. Radikalların nəzarət etdikləri ayrı-ayrı KİV-lər öz səhifələrində mənbə kimi Leyla Yunusovanın sitatlarına istinad edir, onun müxtəlif pozalarda şəkillərini dərc edir, müsahibələrini yerləşdirirlər. Bu günlərdə haqqında bəhs olunan KİV-lərdə “hüquq müdafiəçisi”nin növbəti müsahibəsinə yer ayrılıb...
Leyla Yunusova yeni müsahibəsində yenə də köhnə ampluasındadır
Sülh və Demokratiya İnstitutunun rəhbəri Leyla Yunusovanı Azərbaycan cəmiyyətinə xüsusi təqdim etməyə ehtiyac yoxdur. Leyla Yunusova deyəndə bir qayda olaraq göz önündə ermənilərdən artıq ermənilik etməyə çalışan birisi canlanır. Onun adı ermənilərə xidmət etməyin sinoniminə çevrilib. O, əksər hallarda özünü cəmiyyət tərəfindən birmənalı qarşılanmayan, Azərbaycan mentalitetinə uyğun gəlməyən tərzdə aparır. Məsələn, Leyla Yunusova “yalnız söyüş söyəndə Azərbaycan dilində danışdığını” etiraf edib. “Hüquq müdafiəçisi”nin özü və yaxın ailə çevrəsi Azərbaycanın çörəyini yeyib, havasını udsalar da, xalqımızın, Vətənimizin düşmənlərinin işinə yaramaq üçün dəridən-qabıqdan çıxırlar. Onun dili Azərbaycan haqqında xoş söz deməyə heç vaxt çevrilməyib. Bunun əksinə olaraq Leyla Yunusovanın təqdimatlarında, daha dəqiq desək, xaricdəki anti-azərbaycançı dairələrə göndərdiyi donos xarakterli hesabatlarda cəmiyyətimiz mütəmadi qaydada qaralanır, ölkəmizin həqiqətləri təhrif edilir, düşmən ermənilərin təbliğat maşınının üyütdüyü yalanlarla üst-üstə düşən fikirlərə geniş yer verilir.
Bu baxımdan Leyla Yunusovanın sözügedən son müsahibəsi də fərqli heç nə ilə diqqəti cəlb etmir. Burada da Leyla Yunusova köhnə ampluasındadır. “Hüquq müdafiəçisi” yenə də gözünü yumub, ağzını açaraq reallıqdan uzaq cəfəng fikirlərə meydan verib. Məsələn, Leyla Yunusova həmişə olduğu kimi, bu dəfə də Azərbaycanda demokratik dövlət, sivil cəmiyyət quruculuğu istiqamətində həyata keçirilən islahatları məqsədli şəkildə “unudub”. Adını “hüquq müdafiəçisi” qoyan Leyla Yunusovaya və onun məlum müsahibəsinə səhifələrində səxavətlə yer ayıran KİV-lərə sual edirik: Əgər Azərbaycanda demokratiya yoxdursa, bəs onda cəmiyyətimizə qarşı davamlı olaraq açıq-aşkar aqresiya nümayiş etdirən Leyla Yunusova necə həftə səkkiz, mən doqquz mətbuat səhifələrinə çıxaraq ağlına gələni danışır? Əgər ölkəmizdə represiyalar varsa, fikir plüralizmi boğulursa, onda Leyla Yunusova izah etsin, görək, onun son və əvvəlki müsahibələri KİV-lərdə necə işıq üzü görüb?
Suallar çoxdur. Ancaq Leyla Yunusovanın riyakarlığı, Azərbaycan cəmiyyətinə ögey münasibəti, ermənilərdən artıq erməniliyi göz önündədir.
Yalançı “dissident”, yoxsa həqiqi qrant alverçisi?
Leyla Yunusovanın son müsahibəsinin əsas leytmotivini onun özündən “qəhrəman” obrazı yaratmağa cəhd göstərməsi təşkil edir. “Hüquq müdafiəçisi” ermənipərəstliyini, Azərbaycanın düşmənləri ilə eyni cəbhədə yer almasını yalançı “dissidentliyi” ilə pərdələməyə çalışır. Görəsən, milli-mənəvi dəyərlərə xor baxmağın, xaricdəki məlum dairələrin sifarişləri əsasında öz ölkəsini qaralamağın gerçək dissidentliklə nə əlaqəsi var?
Leyla Yunusovanın son müsahibəsində vurğuladığı “dissidentliyi” ermənilərin işinə yaramaqdan uzağa getməyib. O, ötən əsrin 90-cı illərinin əvvəllərində AXC-“Müsavat” iqtidarı dövründə Müdafiə Nazirliyində tutduğu vəzifənin səlahiyyətlərindən sui-istifadə edərək ölkəmizin mənafeyinə zidd açıqlamalarla çıxış edib, Azərbaycanın guya münaqişə bölgəsində ermənilərə qarşı təmizləmə əməliyyatı apardığı barədə bütün dünyaya car çəkib, ordumuzun durumu, hərəkət planları barədə düşmən tərəfə məlumatlar sızdırıb.
1994-cü ildən etibarən Leyla Yunusova ermənilərə xidmət missiyasını vətəndaş cəmiyyətinin təmsilçisi qismində davam etdirir. Xalqımızın, Vətənimizin bədxahları ölkədəki demokratik mühitdən sui-istifadə edərək vaxtaşırı L.Yunusovanın rəhbərlik etdiyi Sülh və Demokratiya İnstitutunda toplaşır və Azərbaycana qarşı yeni fəaliyyət planları qururlar. Leyla Yunusova Ermənistanın terrorçuluq və işğalçılıq siyasətini müdafiə edən David Şahnazaryanın, Laura Baqdasaryanın, Janna Krikorovanın və digər belələrinin partnyoruna çevrilib. “Hüquq müdafiəçisi”nin Ermənistandakı “Region” araşdırmalar mərkəzi ilə Azərbaycan həqiqətlərini təhrif etməyə yönələn “əməkdaşlığını” yada salaq. Bakıda keçirilən “Eurovision-2012” mahnı müsabiqəsi zamanı qonaqların gediş-gəlişinin gur olduğu məkanlarda vay-şivən qoparması da onun qəlbindəki erməni sevgisinin təzahürü idi.
Leyla Yunusova son müsahibəsində həyatı boyu ermənilərə göstərdiyi bütün bu kimi xidmətlərinə “dissidentlik” “fəaliyyəti” ilə haqq qazandırmağa çalışıb. Ancaq cidanı çuvalda gizlətmək mümkün deyil. Son vaxtlarda Leyla Yunusovanın xaricdəki mal-mülkünün, banklardakı manat, dollar, avro hesablarının siyahısı üzə çıxıb. Leyla Yunusova hansı göz yaşları, yalvarışlarla inandıra bilər ki, o, bu qədər böyük sərvəti “dissident” olaraq qazanıb? Yox, “hüquq müdafiəçisi”nin söylədiyi yalanların arxasından həqiqət aydın görünür. Bəli, o başqa məsələdir ki, beynəlxalq erməni lobbi şəbəkəsinin təsir dairəsində olan mərkəzlər “hüquq müdafiəçisi”nin gənc dövlətimizə qarşı fəaliyyətinə külli miqdarda qonorarlar-qrantlar ödəyiblər. Qrant alverçiliyi Leyla Yunusovanın əlini böyük paralara çatdırıb. İndi əməllərinin üstü açılan Leyla Yunusovanın kürkünə birə düşüb. Məsuliyyətdən yayınmaq üçün indiyədək əl atdığı vasitələrin bir işə yaramadığının fərqində olan “hüquq müdafiəçisi” çarəni bu cür yalanlar danışmaqda görüb.
Vətəndaş cəmiyyətinin “kor xəlifəsi”-Leyla Yunusova
Leyla Yunusova son müsahibəsində vətəndaş cəmiyyətinin digər təmsilçilərinə münasibətdə sözün əsl mənasında “burada mənəm, Bağdada kor xəlifə” mövqeyi tutub. O, müsahibəsində vətəndaş cəmiyyətinin digər nümayəndələrinin kölgəsini qılınclayır və belə bir iddia ortaya qoyur ki, hamı onun dediyi ilə oturub durmalıdır.
Leyla Yunusovanın vətəndaş cəmiyyətinin digər təmsilçiləri ilə, necə deyərlər, kəllə-kəlləyə gəldiyi mövzulardan biri də “siyasi məhbus” siyahısı ilə bağlıdır. Məlumdur ki, Azərbaycanda bir nəfər də olsun siyasi məhbus yoxdur. Lakin vətəndaş cəmiyyətini bütünlüklə monopoliyaya almaq istəyən Leyla Yunusovanın “sehrli” qələmi “siyasi məhbus”ların siyahısını 130 nəfərədək şişirdib.
Aydın məsələdir ki, burada Leyla Yunusovanın “ürəyiyumşaqlığına” “gör məni, görüm səni” prinsipi səbəb olub. Əks halda necə olur ki, cinayət əməlləri məhkəmə qaydasında təsdiqlənənlərin adları “hamı öz əməlinə görə cavab verməlidir” deyən “hüquq müdafiəçisi”nin “siyasi məhbus” siyahısında yer alıb?