Martda bu məqsədlə  qan vermə aksiyası keçiriləcək

Ailə, Qadın və Uşaq Problemləri üzrə Dövlət Komitəsi Hemofiliyalı Xəstələrin Respublika Assosiasiyası ilə birgə aksiyaya başlayıb. 8 mart Qadınlar Günü münasibətilə qan xəstəliyindən əziyyət çəkən uşaqlara yardım məqsədilə təşkil ediləcək  aksiya çərçivəsində dünən  problemlərin həlli sahəsində aktiv fəaliyyət göstərən qadınlarla görüş keçirib.

Komitənin sədr müavini Sədaqət Qəhrəmanova bildirdi ki, təmsil etdiyi qurum artıq qan tədarükü aksiyalarına qoşulub. Həm Komitənin işçiləri, həm də aksiyaya cəlb etdikləri şəxslər dəfələrlə qan xəstəliyi olan uşaqlar üçün  tədarük aksiyalarına qoşulub. Komitənin təşkilatçılığı ilə növbəti aksiya martın 4 və 5-də keçiriləcək. 

Bakı şəhər Baş  Səhiyyə İdarəsinin rəisi Leyla Seyidbəyova bildirib ki, ölkədə qana daim ehtiyacı olanlar əsas problem olsa da, ildə aparılan 333 min cərrahiyyə əməliyyatına da qan lazım olur. Elə bu rəqəmin özü də qanın ölkə üçün nə qədər əhəmiyyətli olduğunun göstəricisidir. Bunu nəzərə alıb hər kəs öz çevrəsindəki insanların qan vermə aksiyalarında fəal iştirakına nail olmalıdır. Martın 4 və  5-də  keçiriləcək  aksiyalar üçün nəzərdə tutulan ünvanları  açıqlayan L.Seyidbəyova bildirdi ki, əlavə ünvanlar da müəyyənləşdirmək mümkündür. Əsas odur ki, onlar iştirakçılar və  yazılan ünvanlar barədə əvvəlcədən məlumatlı olsunlar. Üstəlik aksiyada neçə nəfərin iştirak edəcəyini də bilmələri lazımdır ki, Elmi Tədqiqat Hemotologiya və Transfiziologiya İnstitutuna məlumat versinlər.

L.Seyidbəyovanın sözlərinə görə, iştirakçılardan qan birbaşa götürülməyəcək. Poliklinikaların həkimləri onların təzyiqini və qanda hemoqlobinin miqdarını müəyyənləşdirəcək. Hər şey normal olan şəxslərdən qan götürüləcək. Özü xəstə və qana ehtiyacı olanların qan verməsinə yol verilməyəcək. 2, 3, 5, 20 saylı poliklinikalar artıq aksiyaya hazırdır. Ayrı-ayrı rayonlarda da poliklinikalar aksiyaya hazır vəziyyətə gətiriləcək.

İrsi, yoxsa sonradan qazanılmış?

Hemofiliyalı Xəstələrin Respublika Assosiasiyasının prezidenti Gülnarə Hüseynova bildirdi ki, hazırda qeydiyyatda 1006 nəfər hemofiliyalı xəstə var. Hesablamalara görə, 3000-dən artıq daşıyıcının olduğu ehtimal edilir.

Qeyd edək ki, hemofiliya - ömür boyu sürən və yetərli müalicə edilmədiyi təqdirdə əlilliklə, hətta ölümlə nəticələnə bilən irsi xəstəlikdir. Bu xəstəlik  irsi olsa da, sonradan qazanılmış olanlar da var. Talassemiya kimi, o da qan xəstəliyi olsa da, əlamətləri, xassələri ilə ondan fərqlənir. Laxtalandırıcı qan preparatı varsa, hemofiliya xəstəlik sayılmır. Dərman preparatı olmayanda isə hemofiliya ən təhlükəlidir. Belə ki, məhz dərmansızlıq insanı əlilliyə aparıb çıxarır. Hər kəsin orqanizmində bir çatışmazlıq olur. Hemofiliyalıların isə orqanizmindəki çatışmazlıq qanı laxtalandıran faktorun olmamasıdır. 

2006-cı ildə ölkə prezidentinin sərəncamıyla Hemofiliya və Talassemiya irsi qan xəstəlikləri üzrə Dövlət Proqramı təsdiq edilib. O vaxta qədər isə hemofiliyalıların həm qana, həm də dərmana ehtiyacı olan günlər olub. Dərmansız - qan və ya dondurulmuş plazmayla saxlanan hemofiliyalılar üçün artıq xaricdən lazım olan 8 və 9-cu faktor gətirilir. Hazırda həyata keçirilən Dövlət Proqramı çərçivəsində uşaqlar bu xüsusi dərman preparatları ilə təmin olunurlar

Sosial problem onları da ağuşuna alıb

Hemofiliyalıların dərdi dərman və qanla da yenkunlaşmır. Onların ciddi sosial problemləri də var.

Hesablamalara görə, hemofiliyalıların 50 fizi məktəbəqədər və məktəbyaşlılardır. 30 yaşdan yuxarı olanlar cəmi 334 nəfərdir. Bu xəstəlikdən əziyyət çəkənlərin hamısı Bakıda məskunlaşıb. G.Hüseynova bildirdi ki, dərmana yaxın olmaq üçün Bakıda hətta kirayədə yaşayan xəstələri nəzərə alıb  faktorun regionlarda da tapılmasını təmin etmək lazımdır.

Azərbaycandakı hemofiliyalılar da normal insanlar kimi cəmiyyətə adaptasiya olunur. 673 nəfər təhsillidir. 75 nəfər ixtisaslı mütəxəssisdir. 12 nəfər tələbə hemofiliya daşıyıcısıdır. 71 nəfər ixtisası üzrə işləsə də, hemofiliyalıların böyük əksəriyyəti işsizdir. Onların digər sosial problemi isə əlillik dərəcəsidir. G.Hüseynova qeyd etdi ki, doğulandan bu xəstəliyi daşıyanlar ikinci əlillik qrupuna aid edilir.

RUHİYYƏ