Azərbaycan xalqının Ümummilli lideri Heydər Əliyevin anadan olmasının 91-ci ildönümü respublikamızın bütün guşələrində təntənəli şəkildə qeyd olunub. Daşkəsən rayonunda da Ulu öndər Heydər Əliyevin anadan olmasının 91-ci ildönümü münasibətilə silsilə tədbirlər keçirilib. Eyni zamanda, rayonun “Daşkəsən” qəzetinin bu münasibətlə xüsusi buraxılışı nəşr edilib.
Nəfis tərtibatda çap olunmuş nəşrdə Ulu öndərin titanik fəaliyyətindən bəhs edən məqalələr, həyat və fəaliyyətinin müxtəlif məqamlarına dair fotolar verilib. Xüsusi buraxılışda Ümummilli lider Heydər Əliyevin 1969-cu ildə Azərbaycan KP MK-nın birinci katibi seçilməsi, müstəqillik illərinədək ölkəmizin sosial-iqtisadi və mədəni inkişafı naminə həyata keçirdiyi işlər haqqında məlumatlar yer alıb. Eyni zamanda, xüsusi buraxılışda Daşkəsən rayonunda Ümummilli lider Heydər Əliyevin anadan olmasının 91-ci ildönümü münasibətilə keçirilən möhtəşəm ümumrayon tədbirinə də geniş yer verilib. Qeyd edilib ki, tədbirdə çıxış edən Yeni Azərbaycan Partiyası (YAP) İcra katibinin müavini, millət vəkili Mübariz Qurbanlı Ulu öndər Heydər Əliyevin müstəqil Azərbaycan dövlətinin qurulması, inkişaf etdirilməsi istiqamətində misilsiz xidmətlərindən danışıb, Onun zəngin həyat və fəaliyyətinin bəzi məqamlarına qısa ekskurs edib. M.Qurbanlı bildirib ki, Ulu öndər Heydər Əliyevin Azərbaycan tarixində yeri və rolu uzun müddət müzakirə ediləcək: “Çünki Heydər Əliyevin xalqımız qarşısında xidmətləri o qədər böyük və zəngindir ki, bu, zaman-zaman tədqiqatlar mövzusu olacaq. Ümummilli liderimizin fəaliyyəti Azərbaycanın dünəni, bu günü və gələcəyinə hesablanmış fəaliyyətdir. Ulu öndərimiz keçmişə istinad edərək bu günümüzü necə qurmağı və gələcəyimiz üçün hansı işlər görülməsinin nümunəsini bizə göstərdi. Hesab edirəm ki, bu, hər bir millətin inkişafında əsas şərtlərdən biridir. Yəni, Ümummilli liderimiz düzgün seçimin yolunu göstərdi ki, ölkəmizin və xalqımızın inkişafı, tərəqqisi üçün hansı mərhələlərdən keçməyimiz vacibdir”.
YAP İcra katibinin müavini deyib ki, Azərbaycanın son onilliklər ərzində qazandığı uğurlar Ulu öndər Heydər Əliyevin fəaliyyəti ilə birbaşa bağlıdır. Onun sözlərinə görə, 1969-cu ildə Heydər Əliyevin Azərbaycana rəhbər seçilməsi, əslində, çağdaş tariximizə ölkəmizin sürətli və uzunmüddətli inkişafının əsasını qoyması kimi daxil olub: “Azərbaycanın Heydər Əliyevin adı ilə bağlı olan sürətli inkişafının bu gün də yüksək dinamika ilə davam etməsi, o dövrdən başlayan yüksəliş strategiyasının böyük zaman kəsiyini əhatə edən dövlətçilik konsepsiyasını yerinə yetirdiyini qətiyyətlə sübut edir. Ümummilli liderimiz Heydər Əliyev həmişə Azərbaycan xalqının mənafeyini düşünən bir öndər olub, bu istiqamətdə apardığı ardıcıl və məqsədyönlü siyasət Onun bütün fəaliyyətinin əsasını təşkil edib. Bu gün Azərbaycanda həyata keçirilən böyük tədbirlər məhz Heydər Əliyevin ölməz ideyalarının həmişəyaşar, əbədi olduğunu bir daha sübut edir”.
Nəşrdə Daşkəsən rayon İcra Hakimiyyətinin başçısı Əhəd Abıyevin çıxışına da geniş yer verilib. Ə.Abıyev deyib ki, Ulu öndər Heydər Əliyev 1969-cu ildə respublikamıza rəhbər təyin olunanda, Azərbaycan keçmiş Sovetlər birliyində, ən geridə qalan, aqrar bir respublika idi: “Qısa vaxt ərzində Ulu öndər Heydər Əliyev Azərbaycanda kənd təsərrüfatı ilə yanaşı, iqtisadiyyatın, sənayenin inkişafına da nail oldu. Bakıda, Gəncədə, Sumqayıtda, o cümlədən, Daşkəsəndə, ən iri sənaye müəssisələri, fabriklər, zavodlar tikildi. Əhali üçün yeni iş yerləri açıldı, vətəndaşlarımızın sosial rifahı günbəgün artmağa başladı. Ötən əsrin 70-ci illərinin sonunda, Azərbaycan Sovetlər birliyinin, iqtisadi cəhətdən ən güclü respublikalarından birinə çevrildi”.
Natiq onu da bildirib ki, 1993-cü ildə, ölkəmiz, vətəndaş müharibəsi həddində idi: “Bütün bölgələrdə ayrı-ayrı adamlara xidmət göstərən silahlı birləşmələr var idi. Qanunlar işləmirdi, özbaşınalıq, anarxiya, vəzifə uğrunda gedən çəkişmələr, o vaxtkı rəhbərlərin yalnız özlərini düşünmələri bütün xalqı bezdirmişdi. Bax belə bir şəraitdə Heydər Əliyev xalqın təkidli tələbi ilə Azərbaycana rəhbərlik etməyə razılıq verdi və dərhal da, əməli işə keçdi. Qısa bir müddətdə silahlı dəstələr zərərsizləşdirildi, qanunlar bərpa olundu, əmin-amanlıq, sabitlik yarandı. Ulu öndərimiz o çətin dövrdə, Öz şəxsi nüfuzundan istifadə edərək, dünyanın aparıcı dövlətlərini Azərbaycana dəvət etdi. 2 il ərzində neft, qaz və digər iqtisadi sahələrdə 21 beynəlxalq layihə imzalandı. Ulu öndər Heydər Əliyevin qətiyyəti, möhkəm iradəsi və düzgün siyasəti nəticəsində, Azərbaycanın müstəqilliyi qorunmaqla yanaşı, eyni zamanda, möhkəmləndi, inkişaf etdi, əbədilik qazandı”.
Nəşrdə həmçinin, Daşkəsən rayonunda 2014-cü ilin birinci rübünün sosial-iqtisadi inkişafının yekunlarına həsr olunmuş hesabat yığıncağında rayon İcra Hakimiyyətinin başçısı Əhəd Abıyevin məruzəsi də təqdim olunub. Məruzədə Ulu öndər Heydər Əliyevin müəyyənləşdirdiyi siyasətin Prezident İlham Əliyev tərəfindən uğurla davam etdirilməsi nəticəsində ölkəmizin bölgələrinin, o cümlədən Daşkəsən rayonun sosial-iqtisadi inkişafından, rayondakı quruculuq işlərindən geniş söhbət açılır.
“Daşkəsən” qəzetinin xüsusi buraxılışında, həmçinin, YAP Daşkəsən rayon təşkilatının Ümummilli liderimiz Heydər Əliyevin anadan olmasının 91-ci ildönümü münasibətilə keçirdiyi tədbirlərə də geniş yer verilib. Nəşrdə, eyni zamanda, rayonun inkişafını əks etdirən müxtəlif yazılar da təqdim olunub.
Ümumiyyətlə, “Daşkəsən” qəzetinin xüsusi buraxılışı Ulu öndərin Azərbaycanın tərəqqisinə, dövlət müstəqilliyinin daha da möhkəmlənməsinə yönəlmiş parlaq fəaliyyəti barədə dolğun təsəvvür yaradır.
NARDAR