Bakı Dövlət Universitetinin yaradılmasından 90 il keçir

AZ RU EN

Ana səhifə / Sosial / Bakı Dövlət Universitetinin yaradılmasından 90 il keçir

Bakı Dövlət Universitetinin yaradılmasından 90 il keçir

02.09.2009 [09:24]

Abel Məhərrəmov: Bu gün BDU dünyanın ən tanınmış təhsil ocaqlarından biridir
“1919-cu il sentyabrın 1-də Bakı Dövlət Universitetinin (BDU) yaradılması barədə qərar verilib. Elə həmin ilin noyabrın 15-də universitetdə ilk mühazirə oxunub. 2009-cu il ona görə əlamətdardır ki, bu il universitetin fəaliyyətə başlamasından 90 il keçir”.
Bu fikirləri BDU-nun rektoru Abel Məhərrəmov dünən keçirdiyi mətbuat konfransında səsləndirib. Onun sözlərinə görə, fəaliyyətə tarix-filologiya və fizika-riyaziyyat fakültələri ilə başlayan universitetin indi təkcə bir korpusunda - yeni tikilən binasında 3 fakültə, 5000 tələbə təhsil alır. Artıq BDU dünyanın ən tanınmış təhsil ocaqlarından biridir. A.Məhərrəmov onu da qeyd edib ki, sentyabrın 7-8-də Bakı Dövlət Universitetində MDB ölkələri universitetlərinin həmkarlar təşkilatları Avrasiya Assosiasiyasının XXII qurultayı keçiriləcək. MDB ölkələrindən 100-ə yaxın iştirakçı və çoxsaylı qonaqların qatılacağı qurultayda hesabat məruzəsi dinləniləcək, qurumun qlobal dünyada rolu və vəzifələri, MDB ölkələrinin dövlət gənclər siyasəti, gənclərlə iş aparmağın müasir formaları və digər məsələlər müzakirə olunacaq. Tədbir çərçivəsində BDU-nun Həmkarlar Komitəsi MDB ölkələri universitetlərinin həmkarlar təşkilatları ilə əlaqələri dərinləşdirmək məqsədi ilə qarşılıqlı əməkdaşlıq haqqında bir sıra müqavilələr imzalamağı planlaşdırıb. Qurultay iştirakçılarının Azərbaycan rəhbərliyi tərəfindən qəbul ediləcəyi, həmkarlar təşkilatları rəhbərləri, BDU-nun rektoru ilə görüşəcəyi, Bakının görməli yerləri ilə tanış olacaqları gözlənilir. A.Məhərrəmovun sözlərinə görə, beynəlxalq tədbir BDU-nun 90 illiyinə həsr olunacaq.
“Universitet bütün gücünü Avropa təhsil sisteminin tələblərinə cavab verəcək səviyyəyə çatmağa yönəldib. Tam şəkildə Boloniya təhsil sisteminə qoşulub. 1919-cu ildə ilk mühazirə - Dubrovskinin rus dilində oxuduğu mühazirə hamının başa düşməsi üçün Azərbaycan dilinə tərcümə edilib. 90 il sonra universitetdə oxunan mühazirələr kompüterdə nəinki yazılı, hətta audio-video variantlarla təqdim edilir. İndi universitet tələbələri istədiyi təhsil proqramını seçə bilir, istədiyi müəllimin mühazirəsini dinləmək imkanına malikdir”, - deyən A.Məhərrəmov tətbiq edilən yeniliklərdən də danışıb. Onun sözlərinə görə, universitetdə ilk növbədə elmin inkişafına çalışılır. Tələbə və müəllimləri həvəsləndirmək, elmi fəaliyyətlərini qiymətləndirmək məqsədi ilə “50+50 qrantı” həyata keçirilir. 50 aparıcı mütəxəssis və 50 tələbə, magistr və aspirantın təqdim etdikləri elmi işə qrant ayrılır. A.Məhərrəmov qrantın təqdim olunan işlərin əhəmiyyətinə görə müəyyənləşdirildiyini, buna baxmayaraq, gənc müəllimlərə üstünlük verildiyini də söyləyib.
A.Məhərrəmovun sözlərinə görə, BDU indi yetişdirdiyi şəxsiyyətlərlə tanınır: “Universitetin məzunu olmuş ümummilli liderimiz Heydər Əliyevin adını çəkmək kifayət edir ki, BDU haqqında beynəlxalq rəy formalaşsın”.
Rektor deyib ki, ümummilli lider Heydər Əliyev BDU-nu daim diqqətdə saxlayıb. Prezident İlham Əliyevin də BDU-nun 90 illiyinin qeyd edilməsi ilə bağlı Sərəncamından aydın görünür ki, dövlət başçısı universitetə, onun tarixi fəaliyyətinə yüksək qiymət verir. Bu münasibət ümumilikdə təhsil sistemində özünü göstərir. “ölkənin iqtisadi imkanları intellektual sərvətə çevrilməlidir”, fikrini rəhbər tutan dövlət başçısı təhsildə islahatlara və gənclərin xaricdə təhsilinə xüsusi diqqət yetirir.
RUHİYYƏ

Paylaş:

Baxılıb: 1205 dəfə