Heç bir regional layihədə təmsil olunmayan işğalçı ölkə daxili və xarici siyasət nöqteyi-nəzərindən tamamilə fiaskoya uğrayıb
Məlum olduğu kimi, regional miqyasda baş verən son hadisələr işğalçı Ermənistanın nəinki müstəqil dövlət olmadığını, hətta hazırkı dönəmdə, sadəcə, hərbi baza, yaxud quberniya səciyyəsi daşıdığını bir daha təsdiqlədi. Elə son zamanlar istər erməni ekspertləri, istərsə də işğalçı ölkənin mediası Ermənistanın “forpost” kimi çıxış etdiyini xüsusi olaraq bəyan edirlər. Məsələn, “Armenia Today” yazır ki, Ermənistan beynəlxalq dəstəkdən məhrum olub. Bunun səbəbi isə xarici siyasətin əhəmiyyətsiz ambisiyalar üzərində qurulmasıdır: “Daxili müstəvidə repressiyaya əsaslanan, xarici platformada isə müstəqil olmayan və müəyyən qüvvələrin dağıdıcı maraqlarına xidmət edən siyasətin həyata keçirildiyi dövlətlə, əlbəttə ki, heç bir ölkə sıx əlaqə qurmaq istəməz”.
Məqalədə o da qeyd edilir ki, Ermənistanın beynəlxalq miqyasda mövqeyi olmadığından bu ölkənin heç bir prosesə təsir imkanı yoxdur. Diqqətə çatdırılıb ki, Ermənistanın, ümumiyyətlə, məsələlərə hər hansı strateji yanaşması yoxdur.
Dolayısıyla, görünən odur ki, işğalçı siyasəti ucbatından regional layihələrdə təmsil olunmayan Ermənistan daxili və xarici siyasət nöqteyi-nəzərindən, sözün əsl mənasında, fiaskoya uğrayıb. Bunun nəticəsidir ki, beynəlxalq mətbuat da Ermənistanın xarici siyasətinin tam bir iflas nümunəsi olduğunu qeyd edir, hətta bu ölkənin işğalçı siyasətini davam etdirməsini regional təhlükəsizliyə qarşı yönəlmiş hal kimi xarakterizə edir. Yeri gəlmişkən, ABŞ-ın nüfuzlu “The Hill” qəzetində dərc edilmiş məqalədə qeyd edilir ki, Ermənistan təbliğatdan geniş istifadə edərək bu ölkə tərəfindən Azərbaycan xalqına qarşı törədilən hərbi cinayətlərə bəraət qazandırmağa çalışır: “Əgər erməni lobbisinin nağıllarına inansaq, onda Azərbaycan “dəhşətli ölkədir”, Ermənistan isə “azad və cəsur insanların, ümidlər və demokratiya ölkəsidir”. Ermənistanın mənəviyyat və etika ilə bağlı problemləri mövcuddur ki, bu da onu beynəlxalq hüquq və insan haqları məsələlərinin müzakirəsi zamanı Azərbaycanın timsalında qonşu ölkələri hədələməyə məcbur edir”.
Məqalə müəllifi diqqətə çatdırıb ki, Ermənistan Azərbaycana hərbi təcavüz edib, bütün döyüşlər Azərbaycanın ərazisində aparılıb, ölkə ərazisinin bir hissəsi Ermənistanın işğalı altında qalmaqdadır. Bundan əlavə, 250 min azərbaycanlı Ermənistanda etnik təmizləməyə məruz qalıb: “Ermənistan bütün postsovet tarixində ən böyük insan hüquqları pozuntusunu - Xocalıda bir gecədə 600-dən çox azərbaycanlı, kürd və Məshəti türkünü vəhşicəsinə qətlə yetirməklə hərbi cinayət törədib. Bu cinayətdə iştirak edən şəxslər isə bu gün Ermənistanda prezident və müdafiə naziri vəzifələrini tuturlar”.
Məqalədə vurğulanır ki, əsl təcavüzkarın Ermənistan olmasına baxmayaraq, bu ölkəyə müstəqillik illərində ABŞ tərəfindən 3 milyard dollar dəyərində yardım göstərilib: “Təcavüzün qurbanı olan Azərbaycana isə yardımlar iki dəfə azdır. Bununla kifayətlənməyən Ermənistan işğal etdiyi Kəlbəcər rayonunun qızıl mədənlərində olduğu kimi, Azərbaycanın təbii sərvətlərini qanunsuz olaraq istismar edir”.
Müəllif sonda yazır ki, Ermənistan regionda sülhün bərqərar olması, həmçinin bir çox insanın pozulmuş hüquqlarının təmin olunması üçün öz qoşunlarını Azərbaycandan çıxarmalıdır.
Əlbəttə, Ermənistanın regional və beynəlxalq miqyasda təcrid vəziyyətinə düşməsi bu ölkə daxilində mövcud olan böhranın dərinləşməsini şərtləndirir. Sirr deyil ki, işğalçı siyasət həyata keçirən, xaricdən gələn ianələrə bel bağlayan və total tənəzzülün müşahidə olunduğu Ermənistan ciddi siyasi, iqtisadi və demoqrafik böhranla qarşı-qarşıyadır. Dərin iqtisadi tənəzzül və xaos insanların həyat şəraitini olduqca çətinləşdirdiyi üçün ekspertlər işğalçı ölkədə sosial inqilab çağırışlarının aktuallaşdığını bildirirlər. Ermənistanın sosial problemləri aradan qaldırmaq üçün kifayət qədər güc və potensiala malik olmaması nəticəsində yaranan problemlər hakimiyyətlə xalq arasında ciddi qarşıdurmaya zəmin yaradır. Bütün bunları nəzərə alan bir çox ekspertlərin qənaətinə görə, müstəqil siyasət yeritməyən Ermənistanın gələcəyi sual altındadır.
Nurlan QƏLƏNDƏRLİ