“Biz sona qədər öz mövqeyimizdə qalacağıq”

Bahar Muradova: ATƏT rəsmilərinin bölgəyə səfəri danışıq aparan tərəflərə və vasitəçilərə dəstək kimi qəbul olunmalıdır
“ATƏT Parlament Assambleyasının rəhbəri və Cənubi Qafqaz üzrə məruzəçinin bölgəyə səfəri Dağlıq Qarabağ münaqişəsinin həlli ilə bağlı danışıqlar prosesinə parlamentarların dəstəyini əldə etmək məqsədi güdür”. Bunu APA-ya açıqlamasında Milli Məclisin sədr müavini Bahar Muradova ATƏT PA-nın prezidenti Joao Soares və Cənubi Qafqaz üzrə məruzəçi Qoran Lenmarkerin martın 13-də Azərbaycana gözlənilən səfərinə münasibət bildirərkən deyib. Onun fikrincə, J.Suares və Q.Lenmarker Dağlıq Qarabağ probleminin mahiyyəti, məzmunu haqqında bir çoxlarından daha məlumatlıdır və məsələyə hərtərəfli bələddir: “Ona görə bu səfər bir daha onların özünün də qeyd etdiyi kimi, qərar qəbul olunması lazım gələn indiki məqamda tərəflərə və vasitəçilərə dəstək kimi qiymətləndirilməlidir”.
Bahar Muradova , həmçinin, deyib ki, ABŞ Konqresinin xarici əlaqələr komitəsinin qondarma erməni soyqırımı ilə bağlı qəbul etdiyi qətnaməyə Azərbaycan çox kəskin münasibət bildirib: “Düşünürəm ki, biz sona qədər öz mövqeyimizdə qalacaq və bu məsələyə kəskin etirazımızı bildirəcəyik. Çünki bu məsələnin parlamentlərdə müzakirəsi, ümumilikdə tarixi hadisələrə bir siyasi pəncərədən baxışa və buna uyğun siyasi münasibətlərin qurulmasına gətirib çıxarır. Bu da ölkələr arasında və xalqlar arasında münasibətlərin normallaşmasına yox, əksinə pisləşməsinə və ziddiyyətlərin yaranmasına gətirib çıxarır. Çünki, axtarsan hər bir xalqın və dövlətin tarixində buna bənzər hadisələr var və mən düşünürəm ki, tarixdə, keçmişdə olan bu kimi məsələlərə məhz tarixçilər, alimlər, araşdırmaçılar münasibət bildirməlidir. Siyasətçilərin işi isə günümüzdə olan reallıqları nəzərə alaraq, dövlətlər arasında, xalqlar arasında münasibətləri daha da normallaşdırmaqdır”.