Mir Cəlal Paşayevin seçilmiş əsərlərinin üçcildliyi qırğız dilində nəşr edilib

Azərbaycanın görkəmli yazıçısı və alimi, professor  Mir Cəlal Paşayevin seçilmiş əsərlərinin üçcildliyi Qırğızıstanın paytaxtı Bişkekdəki Türkdilli Dövlətlərin Siyasətinə Dəstək Fondunun və Azərbaycanda fəaliyyət göstərən “Avromed” şirkətinin dəstəyi ilə qırğız dilində nəfis şəkildə nəşr edilib. Üçcildliyi qırğız dilinə Qırğızıstan Milli Yazıçılar İttifaqının sədri Abdrahman Alımbayev, ittifaqın katibi Seyit Altımışov, yazıçı Mukan Asanaliyev çeviriblər. Bişkekdəki “Biyiktik” nəşriyyatında nəfiş şəkildə nəşr olunmuş üçcildliyin baş redaktoru Qırğızıstan Milli Elmlər Akademiyasının Dil və Ədəbiyyat İnstitutunun direktoru, akademik Abdıldacan Akmataliyev, redaktorları Qırğızıstanın xalq şairi Sooronbay Cusuyev, Qırğızıstanın  xalq yazıçısı Tölöqön Qasımbekov və Beynəlxalq Aytmatov Akademiyasının akademiki, xalq yazıçısı Cumadin Kadırovdur.
Üçcildliyin tərtibatçıları Ədibə Paşayeva, Novruz Məmmədov və Aqil Hacıyevdir. Kitabın baş məsləhətçisi Azərbaycan Milli Elmlər Akademiyasının müxbir üzvü Nizami Cəfərov, məsləhətçiləri  akademik, dünya şöhrətli yazıçı Çingiz Aytmatovun qardaşı İlgiz Aytmatov, Ədibə Paşayeva, Qənirə Paşayeva, Aqil Hacıyev, Cavanşir Məmmədov, Nüsrət Məmmədov, Hikmət Məmmədov və Nəsir Məmmədovdur.
Üçcildliyə ön sözü professor Aqil Hacıyev yazıb. Geniş oxucu kütləsi üçün nəzərdə tutulmuş, hər cildi 550 səhifə olan üçcildlik Qırğızıstanın bütün kitabxanalarına, elm və təhsil ocaqlarına pulsuz veriləcək.
Qırğızıstan Milli Yazıçılar İttifaqının sədri Abdrahman Alımbayev üçcildliyin qırğız dilinə tərcümə olunmasına və nəşrinə göstərdikləri köməyə görə Bişkekdəki Türkdilli Dövlətlərin Siyasətinə Dəstək Fondunun prezidenti Nüsrət Məmmədova, Azərbaycanda fəaliyyət göstərən “Avromed” şirkətinin baş direktoru Cavanşir Feyziyevə dərin minnətdarlığını bildirib. Yeni nəşrin Qırğızıstan-Azərbaycan ədəbi əlaqələrində müstəsna rol oynayacağına əminliyini bildirən Abdrahman Alımbayev vurğulayıb ki, bu nəşr Sovetlər birliyi dağılandan sonra Qırğızıstan və Azərbaycan ədəbi əlaqələrində ilk böyük hadisədir. A.Alımbayev əlavə edib ki, bu hadisənin Qırğızıstan və Azərbaycan tərəfindən geniş təbliğinə ehtiyac var. Akademik bildirib ki, Qırğızıstan alimləri bu kitab əsasında Mir Cəlalın yaradıcılığını tədqiq edəcək, yeni elmi əsərlər yazılacaq, dissertasiyalar müdafiə olunacaq.
Qeyd etmək yerinə düşər ki, Qırğızıstanda Mir Cəlal Paşayevin yaradıcılığına böyük maraq var. Görkəmli alim, yazıçı və pedaqoqun ədəbi və elmi irsinin  öyrənilməsi məqsədi ilə Qırğızıstan Milli Kitabxanasında Mir Cəlal adına Azərbaycan Ədəbiyyatı və Mədəniyyəti Mərkəzi açılıb. Bu yaxınlarda Bakıda Qırğızıstanın, Azərbaycanın və Qazaxıstanın görkəmli alim, yazıçı və jurnalistlərinin iştirakı ilə Mir Cəlal Paşayevin Bişkekdə  qırğız dilində nəşr olunmuş üçcildliyinin  təqdimat mərasiminin keçirilməsi nəzərdə tutulur.