Azərbaycanın üç boksçusu İtaliyada boks üzrə keçirilən Avropa olimpiya təsnifat turnirinin növbəti mərhələsinə vəsiqə qazanıb. Yarışın ilk günü Rahib Bəylərov (75 kq) çernoqoriyalı Bosko Draskoviçə 20:15 hesabı ilə qalib gəlib. Növbəti mərhələdə boksçumuzun rəqibi irlandiyalı Darren Saderlend olacaq. Şotlandiya idmançısı Stefan Simmonsu (91 kq) məğlub edən Elçin Əlizadə (13:8) isə növbəti döyüşdə Çernoqoriya təmsilçisi Milorad Qayoviçlə qarşılaşacaq.

Azərbaycan yığmasının heyətində David Arjba (91 kq-dan yuxarı) da uğurlu çıxışı ilə yadda qalıb. Boksçumuz Finlandiya idmançısı Robert Helleniusu asanlıqla məğlub edib-22:5. Növbəti mərhələdə onun rəqibi Yunanıstan təmsilçisi Şotz Georgiyos olacaq.

İlk döyüşlərdə məğlub olan Aslan Bayramovla (69 kq) Elnur Qədirov (81 kq) isə yarışda çıxışını dayandırıblar.

Dünən rinqə Azərbaycanın daha 4 boksçusu çıxıb. Ceyhun Abiyev (48 kq) Bedak Pal ilə (Macarıstan), Şahin İmranov (57 kq) Mixal Yanosla (Macarıstan), Ramal Amanov (60 kq) Caka Kovaçiçlə (Sloveniya), Emil Məhərrəmov (64 kq) isə Milan Piperski (Serbiya) ilə qarşılaşıb.