Azərbaycanın ən titullu cüdoçusu Elçin İsmayılov bu ilin avqustunda keçiriləcək XXIX Pekin Yay Olimpiya Oyunlarında iştirak etməyəcək. Buna 26 yaşlı cüdoçunun lisenziya xarakterli yarışlarda uğursuz çıxışı səbəb olub. O, son bir ayda Gürcüstan, Fransa, Avstriya və Almaniyada keçirilmiş Dünya Kuboklarında medal qazana bilməyib.

Nəticədə aktivindəki lisenziya xallarını artıra bilməyən E.İsmayılov reytinq cədvəlində 27-ci pilləyə enib. Digər təmsilçimiz Ramil Qasımov (66 kq) isə 90 xalla 8-ci yerdə qərarlaşdığından bu çəkidə məhz onun olimpiadaya yollanmaq şansı böyükdür. E.İsmayılov ötən həftə Hamburq şəhərində təşkil edilmiş super kateqoriyalı Dünya Kubokunda uğursuzluğa düçar olduğundan praktiki olaraq, lisenziya qazanmaq şansını itirib. Nəticədə yığmanın məşqçilər korpusu dördqat Avropa çempionunu Hamburqdan Bakıya yola salıb. E.İsmayılovun dördgünlük beynəlxalq təlim-məşq toplanışında və həftə sonu Çexiyanın paytaxtı Praqada keçiriləcək Dünya Kubokunda iştirakı məqsədəuyğun sayılmayıb. Dünya Kubokundan başqa, qarşıda lisenziya xarakterli yalnız bir yarış - Avropa çempionatı (11-13 aprel, Portuqaliya) var. E.İsmayılov Çexiyada uğur qazansaydı belə, reytinq cədvəlində R.Qasımova çata bilməyəcəkdi və qitə birinciliyinə aparılmayacaqdı. Çünki Avropa çempionatında ölkəmizin şərəfini hər çəkidə bir cüdoçu qoruyacaq. Turnirdə 66 kq çəki dərəcəsində E.İsmayılov deyil, R.Qasımovun güləşəcəyi isə heç bir şübhə doğurmur.

Qeyd edək ki, indiyədək E.İsmayılov iki dəfə olimpiadada qüvvəsini sınayıb. Sidney və Afina Yay Olimpiya Oyunlarına qatılmış həmyerlimiz hər iki cəhddə mükafat qazana bilməyib.