Fevralın 28-də Avrasiya Hüquqşünaslar Assosiasiyası və ABŞ-ın Beynəlxalq Respublikaçılar İnstitutunun (İRİ) təşkilatçılığı ilə vətəndaşların siyasi hüquqları və siyasi partiyalar haqqında qanunvericiliyin təkmilləşdirilməsi məsələlərinə həsr olunmuş geniş tədbir keçiriləcək. Tədbir ABŞ-ın Azərbaycandakı səfirliyinin kiçik qrantlar proqramı çərçivəsində maliyyələşdirilir və Avrasiya Hüquqşünaslar Assosiasiyası tərəfindən həyata keçirilir. ABŞ-ın Beynəlxalq Respublikaçılar İnstitutu isə bu prosesdə könüllü iştirak etməklə yanaşı, tədbirin keçirilməsində Avrasiya Hüquqşünaslar Assosiasiyası ilə əməkdaşlıq edəcək.

Qeyd edək ki, tədbirdə Avrasiya Hüquqşünaslar Assosiasiyasının sədri Nadir Adilov və İRİ-nin ölkə üzrə direktoru Jake Jones açılış nitqi ilə çıxış edəcəklər. Daha sonra qanunvericilik təşəbbüsü qaydasında parlamentə təqdim olunmuş “Siyasi partiyalar haqqında” Qanun layihəsi Milli Məclisin deputatı, Böyük Quruluş Partiyasının sədri, hüquqşünas Fazil Qəzənfəroğlu tərəfindən iştirakçıların nəzərinə çatdırılacaq. Tədbirə dəvət olunmuş müxtəlif iqtidar və müxalifətyönümlü siyasi partiya sədrlərinin, deputatların, QNT, həmçinin, beynəlxalq təşkilat nümayəndələrinin iştirakı ilə geniş müzakirələr keçiriləcək. Tədbirin nəticəsi olaraq qeyd edilən təkliflər qanunun təkmilləşdirilməsi  məqsədilə Milli Məclisə göndəriləcək. Tədbirdən sonra siyasi partiyalar haqqında qanunvericiliyin təkmilləşdirilməsi sahəsində ictimai məlumatlandırma  məqsədilə bir sıra KİV-də xüsusi buraxılışlar dərc olunacaq. Bu prosesdə də Avrasiya Hüquqşünaslar Assosiasiyası ABŞ-ın Respublikaçılar İnstitutu ilə sıx əməkdaşlıq edəcək.

Z.AĞAQIZI