Onlar baş örtüyü ilə bağlı Konstitusiya dəyişikliyinin ləğvini istəyir

Türkiyə müxalifəti universitetlərdə baş örtüyündən istifadəyə icazə verən Konstitusiya dəyişikliyinin ləğvi tələbi ilə Konstitusiya Məhkəməsinə müraciət edib. APA-nın xəbərinə görə, müraciət dünən Cümhuriyyət Xalq Partiyası və Demokratik Sol Partiyasından olan 111 və bir müstəqil millət vəkilinin imzası ilə Konstitusiya Məhkəməsinə təqdim olunub. 48 səhifəlik müraciətdə dəyişikliyin ləğv olunması və ya yox sayılması, həmçinin işə baxıldığı müddətdə Konstitusiya dəyişikliyinin tətbiqinin dayandırılması xahiş edilir.

Xatırladaq ki, Türkiyə Böyük Millət Məclisi fevralın 9-da ali təhsil müəssisələrində baş örtüyündən (türban) istifadə olunmasına icazə verən Konstitusiya dəyişikliyi təklifini qəbul edib.