Dünən Beynəlxalq Mətbuat Mərkəzində İnsan Haqları-XXI əsr Azərbaycan Fondu 2007-ci ilin insan hüquqlarının vəziyyəti ilə bağlı illik hesabatını açıqlayıb. Fondun direktoru Şahin Camalov çıxış edərək bildirib ki, hesabat insan hüquqlarının vəziyyətinin monitorinqi layihəsi çərçivəsində hazırlanıb. Səkkiz bölmədən ibarət hesabatda ölkədə baş verən hadisələr və faktlar öz əksini tapıb. Camal Şahinov çıxışında insan hüquqlarının pozulması hallarının daha çox real olduğu qadın, hərbi qulluqçu, qaçqın və məcburi köçkün, məhbus hüquqları, həmçinin beynəlxalq aləmdə daha çox önəm verilən məhkəmə sistemi, insan alveri, informasiya əldə etmək və söz azadlığı kimi aktual sahələrin tədqiq edildiyini deyib. Hesabatda bildirilib ki, 2007-ci ildə Azərbaycanda təkcə altı ay ərzində insan alveri ilə bağlı 187 cinayət faktı qeydə alınıb. Bunlardan 116-sı əxlaqsızlıq yuvası saxlama, 22-si fahişəliyə cəlb etmə, 44-ü insan alveri ilə bağlıdır. Yeri gəlmişkən insan alverinin qurbanlarından üç nəfəri azyaşlıdır.

Qeyd edək ki, hesabatın müzakirəsində insan haqları müdafiəçiləri ilə yanaşı, Rumıniya və Polşanın Azərbaycandakı səfirliklərinin nümayəndələri də iştirak ediblər.

Z.AĞAQIZI