Sentyabrda "Bakı Körfəzi Dəniz Körpüsü" Layihəsinin təqdimatı keçiriləcək

Koreyanın "Dong Sung Engineering" şirkəti cari ilin sentyabr ayında "Bakı Körfəzi Dəniz Körpüsü" Layihəsinin təqdimatını keçirəcək. Bu barədə "APA–Economics"ə Azərbaycan Nəqliyyat Nazirliyi nəqliyyat siyasəti və iqtisadiyyat şöbəsinin müdiri Sədrəddin Məmmədov məlumat verib.
S.Məmmədovun sözlərinə görə, bu ilin sonuna qədər layihənin texniki–iqtisadi əsaslandırmasının son variantı Azərbaycan hökumətinə təqdim ediləcək: "Bundan sonra körpünün tikintisi ilə bağlı qərarın qəbul edilməsi nəzərdə tutulur. Hazırda şirkət körpünün təqdimatını hazırlamaqla məşğuldur".
Avqust ayının ortalarında şirkətin mütəxəssisləri Bakıya gələrək Azərbaycan Nəqliyyat Nazirliyi ilə birgə layihə ilə bağlı müzakirələr aparacaqlar.
Şıx qəsəbəsindən Zığ qəsəbəsinə qədər dənizin üzərindən salınacaq körpünün əsas hissəsinin (dənizin üzərindəki hissə) uzunluğu 14,5 km təşkil edəcək. Bakını əhatə edən Dairəvi Yola birləşəcək körpünün kommunikasiyaları ilə birlikdə ümumi uzunluğunun isə 26 km olacağı gözlənilir.
Qeyd edək ki, körpünün bir hissəsi dor ipləri, bir hissəsi isə dayaqlar üzərində tikiləcək. Körpünün altından 40 min tona qədər dedveydi olan gəmilər keçə biləcək. Dəniz körpüsü gəmilərin hərəkətinə mane olmamaq üçün hündür dayaqlar üzərində inşa olunacaq. Körpünün dayanıqlığını və elastikliyini təmin etmək məqsədi ilə kanatlardan istifadə olunacaq.
Koreya tərəfi bu körpünün tikintisinə təxminən 1 mlrd. ABŞ dolları həcmində vəsait ayıracaq. Ümumilikdə, dəniz körpüsünün 2015–ci ilə qədər tikilib istifadəyə verilməsi planlaşdırılır.