"MOSSAD" Əhmədinejadı oğurlamağa hazırlaşır

İsrailli nazir İran prezidentinin məhkəmə qarşısına çıxarılacağını iddia edir
İsrailin "MOSSAD" kəşfiyyat xidmətinin keçmiş rəhbərlərindən olan Rafi Eytan İran prezidenti Mahmud Əhmədinejadla bağlı sensasion bəyanatla çıxış edib.
Lent.az–ın Türkiyə mətbuatına istinadən verdiyi məlumata görə, hazırda sosial məsələlər üzrə dövlət naziri postunu tutan Eytan İsrailin Əhmədinejadı beynəlxalq məhkəmə önünə çıxartmaq üçün oğurlaya biləcəyini bəyan edib.
Nazir Almaniyanın nüfuzlu "Der Spiegel" jurnalına müsahibəsində İran prezidenti kimi bir şəxsin yerinin beynəlxalq məhkəmə olduğunu vurğulayıb. Qeyd edək ki, Eytan "MOSSAD" agentlərinin 1960–cı ildə keçmiş faşist liderlərindən olan Adolf Eicmanı necə qaçırdıqları və "ölüm mələyi" adı alan doktor Yosef Mengelenin qaçırılmasının niyə təxirə salındığını açıqlaması ilə gündəmə gəlmişdi. Alman jurnalına müsahibəsində də yenidən həmin mövzuya qayıdan israilli nazir "belə əməliyyatların tarixə atıldığını güman etməyə dəyməz" deyib. Jurnalistin bu bəyanatla nə demək istədiyi sualını cavablandıran Eytan Əhmədinejadın oğurlana biləcəyini bildirib: "Bəyanatımda tam ciddiyəm. Zəhər saçan, başqa millətləri məhv etmək istəyənlər bu cür aqibət yaşayacaqlarını gözləməlidirlər".