Azərbaycan-Rumıniya əməkdaşlığının səviyyəsi məmnunluq doğurur

Prezident İlham Əliyev Rumıniyanın iqtisadiyyat naziri, Azərbaycan-Rumıniya hökumətlərarası komissiyanın həmsədri Adriyan Vidyanunun başçılıq etdiyi nümayəndə heyətini qəbul edib
Azərbaycan Respublikasının Prezidenti İlham Əliyev dünən Rumıniyanın iqtisadiyyat naziri, Azərbaycan-Rumıniya hökumətlərarası komissiyanın həmsədri Adriyan Vidyanunun başçılıq etdiyi nümayəndə heyətini qəbul edib. Dövlətimizin başçısı Azərbaycan ilə Rumıniya arasında əlaqələrin uğurla inkişaf etdiyini, əməkdaşlığımızın səviyyəsinin məmnunluq doğurduğunu bildirib, əlaqələrimizin genişlənməsində yüksək səviyyəli qarşılıqlı səfərlərin əhəmiyyətini qeyd edib. İqtisadi əlaqələri yeni sahələrlə daha da zənginləşdirməyin zəruriliyini vurğulayan Prezident İlham Əliyev ümidvar olduğunu bildirib ki, Rumıniyanın iqtisadiyyat naziri, Azərbaycan-Rumıniya hökumətlərarası komissiyanın həmsədri Adriyan Vidyanunun başçılıq etdiyi nümayəndə heyətinin ölkəmizə səfəri uğurlu keçəcək və əməkdaşlığımızın daha da möhkəmləndirilməsi işinə xidmət edəcək. Rumıniyanın iqtisadiyyat naziri, Azərbaycan-Rumıniya hökumətlərarası komissiyanın həmsədri Adriyan Vidyanu Rumıniya Prezidenti Trayan Beseskunun salamlarını dövlətimizin başçısına çatdırıb. O bildirib ki, Rumıniya Prezidenti Azərbaycan Prezidentinin Buxarestə rəsmi səfərini səbirsizliklə gözləyir. Bu səfərin Rumıniya üçün əhəmiyyətli olacağını deyən Adriyan Vidyanu ölkəsinin Azərbaycan ilə ikitərəfli münasibətlərin genişləndirilməsinə ümidlə baxdığını qeyd edib. Dövlətimizin başçısı Prezident Trayan Beseskunun salamlarına görə minnətdarlığını bildirib, onun da salamlarını Rumıniyanın dövlət başçısına çatdırmağı xahiş edib.