Dora Bakoyanni Milli Məclisdə olub

Ölkəmizdə  səfərdə olan ATƏT-in fəaliyyətdə olan sədri, Yunanıstanın xarici işlər naziri xanım Dora Bakoyanni dünən Milli Məclisdə olub. Xanım nazir Milli Məclisin iclas zalına baxıb, parlamentdəki Heydər Əliyev Xatirə zalı ilə tanış olub. Sonra qonaq Milli Məclisin sədri Oqtay Əsədovla görüşüb. Milli Məclisin sədri bildirib ki, Azərbaycan ilə  Yunanıstan arasındakı əlaqələr yüksələn xətlə inkişaf edir: “Dövlətlərimizin başçılarının qarşılıqlı səfərləri münasibətlərimizin genişlənməsi üçün yaxşı zəmin yaradıb. Azərbaycan Prezidenti İlham Əliyevin bu ilin fevralında Yunanıstana dövlət səfəri əlaqələrimizin hərtərəfli inkişafına böyük töhfələr verib”.
Sonra O.Əsədov Ermənistan-Azərbaycan, Dağlıq Qarabağ münaqişəsi barədə ətraflı məlumat verib. O deyib ki,  ATƏT-in Minsk qrupu münaqişəsinin həlli istiqamətində 15 ildir ki, iş aparır: “Lakin problemin yoluna qoyulması ilə bağlı irəliləyişlər ATƏT-ə məhz sizin sədrlik etdiyiniz indiki dövrdə müşahidə edilməkdədir. İnanırıq ki, Dağlıq Qarabağ münaqişəsinin ədalətli həlli ilə bağlı səylərinizi bundan sonra da əsirgəməyəcəksiniz”.
Səmimi görüş və qonaqpərvərliyə görə minnətdarlığını bildirən xanım Dora Bakoyanni Azərbaycan ilə Yunanıstan arasındakı əlaqələrin hazırkı səviyyəsindən razılığını ifadə edib. Qonaq, həmçinin Azərbaycan Prezidenti İlham Əliyevin bu ilin fevralında Yunanıstana dövlət səfərini məmnunluq hissi ilə xatırladıb və bu səfərdən sonra əməkdaşlığımızın inkişafında yeni mərhələ yarandığını qeyd edib. Dora Bakoyanni Ermənistan-Azərbaycan, Dağlıq Qarabağ probleminin yoluna qoyulması istiqamətində səylərini əsirgəməyəcəyini diqqətə çatdırıb.
Görüşdə qarşılıqlı maraq doğuran digər məsələlər də müzakirə olunub.