Saxta kampaniyalar davam edir...

Bakı:

14°C

51%

7m/s

Əlaqə

AZ RU EN

Ana səhifə / Arxiv / Saxta kampaniyalar davam edir...

Saxta kampaniyalar davam edir...

01.02.2025 [11:16]

Vardanyanın xilasına hədəflənən məqsədli “piar”

Bakıda Ermənistan Respublikası və onun silahlı qüvvələri, o cümlədən Ermənistanın yaratdığı qanunsuz “Dağlıq Qarabağ respublikası” və onun qanunsuz silahlı birləşmələri tərəfindən törədilən cinayətlərdə təqsirli bilinən 15 nəfərin, o cümlədən Harutyunyan Arayik, Vardanyan Ruben, Qukasyan Arkadi, Sahakyan Bako, İşxanyan Davit, Babayan Davit, Mnatsakanyan Levon, Beglaryan Vasili, Qazaryan Erik, Allahverdiyan Davit və digərlərinin məhkəməsinin başlaması ilahi ədalətin nəhayət, öz yerini tapacağına böyük inam yaradıb. Adları çəkilən şəxslər müxtəlif maddələrlə ittiham olunurlar və layiqli cəzalarını almalıdırlar . Burada hansısa istisnalardan söhbət gedə bilməz. Bununla belə, ayrı-ayrı Avropa təsisatları, Rusiyanın müəyyən dairələri yenidən bəhs olun şəxslərin müdafiəsi yönündə fəaliyyətləri genişləndiriblər. Bu kontekstdə zamanında qondarma “DQR”in “dövlət naziri” postunu tutmuş Ruben Vardanyanın təəssübünü çəkənlərin sayının artması xüsusilə diqqət çəkir.

Aparılan qara piar

R.Vardanyanın kimliyi hər kəsə bəllidir. Çirkli pulların yuyulması yolu ilə özünə böyük sərvət toplayan və milyarderə çevrilən bu şəxs 44 günlük müharibədən sonra heç kəsin gözləmədiyi halda Xankəndidə zühur etdi. Azərbaycanın 2023-cü il sentyabrın 19-20-də keçirdiyi 23 saatlıq lokal xarakterli antiterror tədbirləri nəticəsində “DQR” süquta uğradı, Qarabağda separatizm yuvası dağıdıldı və digərləri ilə yanaşı, R.Vardanyan da həbsə alınaraq Bakıya gətirildi və onun barəsində istintaq başladı.

Qeyd edək ki, Bakıda istintaq dövründə belə müxtəlif mərkəzlər R.Vardanyanın müdafiəsi ilə bağlı saxta kampaniyalar keçiridi - bu xüsusda biz Fransanın, Avropa Parlamentinin, Avropa Şurası Parlament Assambleyasının, Almaniyadan olan Şvabe kimi deputatların canfəşanlığını xüsusi qeyd edə bilərik. Məhkəmə ərəfəsində qərəzli kampaniya daha da genişlənib. Halbuki, R.Vardanyanın pərdələnməsinə çalışıldığı fəaliyyətində cinayət tərkibi mövcuddur - bu isə hüquqi məsuliyyət yaradır.

Rubenin xiffətini çəkənlər

Maraqlıdır ki, onun barəsində Rusiya mətbuatında da əvvəllər informativ xarakterli yazılar dərc olunsa da, məlum təyyarə qəzasından sonra qara piar xarakterli materialların dərc olunması intensivləşib. Məsələn, “Vzqlyad” nəşri başlamış məhkəmə haqda materialında prosesin obyektivliyini şübhə altına almağa cəhd edib. Paralel olaraq, Rusiya prezidenti yanında İnsan Hüquqlarının Müdafiəsi Şurasının üzvü Yeva Merkaçeva Paşinyanı R.Vardanyanın müdafiəsində fəal mövqe tutmağa çağırıb. Onun qənaətinə görə, R.Vardanyanı “müharibədə iştirak etmiş digərləri ilə müqayisə etmək olmaz və o, “artsax”a münaqişənin kəskin mərhələsi bitəndən sonra gəlib”. Şuranın xanım üzvü, həmçinin R.Vardanyanın “humanitar fəaliyyətini” qeyd etməyi də yaddan çıxartmayıb.

Yeva Merkaçevanın özbaşına belə bir məzmunda açıqlama ilə çıxış etdiyini düşünmək sadəlövhlük olardı. Onu da nəzərə alaq ki, bu absurd açıqlama Ermənistanın Rusiyadan üz çevirdiyi ərəfədə səsləndirilib...

Azərbaycanın gücü və qətiyyəti

Kimlərin hansı iddiaları səsləndirməsindən asılı olmayaraq, Azərbaycan özünün milli gücünə əsaslanmaqla qətiyyətli mövqe sərgiləyir. Ölkəmiz daim suverenlik və müstəqillik prinsiplərindən çıxış edib və apardığı ardıcıl siyasətdə həmişə ədalət meyarını əsas götürüb. Azərbaycan indiyədək cəfəng iddialara, təzyiq cəhdlərinə baxmayaraq özünün ümumilli məqsədlərinə çatmağa nail olub - ərazi bütövlüyünü və suverenliyini tam təmin edib. İndi isə növbə bir sıra cinayətlərdə təqsirləndirilən şəxslərin cəzalandırılmasına çatıb. Onlar Azərbaycan əleyhinə hərbi və dövləti cinayətlər törətmiş şəxslərdirlər.Artıq məhkəmə prosesi başlayıb. Məlum cinayət işi üzrə 531 mindən çox zərərçəkmiş və onların nümayəndələri var.

Qara piarı aparılan R.Vardanyanın da layiq olduğu və ədalətli şəkildə cəza alacağına heç bir şübhə yoxdur. Ermənistan vətəndaşı olan, Azərbaycan Respublikasının Cinayət Məcəlləsinin işgəncə, muzdluluq, müharibə qanunlarını və adətlərini pozma, terrorçuluq, terrorçuluğu maliyyələşdirmə və digər maddələrlə təqsirləndirilən Ruben Vardanyanın məhkəmə prosesinin hazırlıq iclası yanvarın 27-də davam etdirilib. Xatırladaq ki, Ruben Vardanyan Azərbaycan Respublikası Cinayət Məcəlləsinin 100 (təcavüzkar müharibəni planlaşdırma, aparma), 107 (əhalini deportasiya etmə və ya məcburi köçürmə), 109 (təqib), 112 (beynəlxalq hüquq normalarına zidd azadlıqdan məhrumetmə), 113 (işgəncə), 114 (muzdluluq), 115 (müharibə qanunlarını və adətlərini pozma), 116 (silahlı münaqişə zamanı beynəlxalq humanitar hüquq normalarını pozma), 214 (terrorçuluq), 214-1 (terrorçuluğu maliyyələşdirmə) əməllərinin törədilməsində təqsirləndirilib.

Mübariz FEYİZLİ

Paylaş:

Baxılıb: 267 dəfə