Diplomatların qətli...

Bakı:

6 °C

65 %

5 m/s

Əlaqə

AZ RU EN

Ana səhifə / Arxiv / Diplomatların qətli...

Diplomatların qətli...

23.05.2025 [08:59]

ABŞ-İsrail münasibətlərinə təsir edəcəkmi?

İsrail səfirliyinin iki əməkdaşı Vaşinqtondakı Yəhudi Muzeyi qarşısında öldürülüb. Hadisə mayın 21-də axşam saatlarında baş verib. İsrailin Vaşinqtondakı səfirliyinin sözçüsü Tal Naim Koen bildirib ki, səfirliyin iki əməkdaşı muzeydə yəhudilərin tədbirinə qatılarkən yaxın məsafədən atəşə tutulub.

Qatil kimdir?

Şəhər polis rəisi Pamela Smit isə deyib ki, həlak olan diplomatlar kişi və qadın olub. Artıq İsrail səfirliyinin əməkdaşlarını güllələməkdə şübhəli bilinən şəxs saxlanılıb. Pamela Smitin sözlərinə görə, şübhəli şəxs Çikaqodan olan 30 yaşlı Elias Rodriqezdir. Atışmadan əvvəl onun muzeyin ətrafında dolaşdığı müşahidə edilib. Hadisə zamanı həmin şəxs dörd nəfərlik qrupa yaxınlaşaraq tapançadan iki nəfərə atəş açıb. Hücum zamanı onun “Fələstinə azadlıq!” şüarları səsləndirdiyi bildirilir. Atışmadan sonra qatil muzeyə daxil olub və mühafizəçi tərəfindən saxlanılıb.

Tramp hadisəni “antisemitizmə əsaslanan” akt adlandırıb

ABŞ Prezidenti Donald Tramp Vaşinqtonda, Yəhudi Muzeyi qarşısında İsrail səfirliyinin iki əməkdaşının ölümü ilə nəticələnən hadisəni “antisemitizmə əsaslanan” akt adlandırıb. Ağ Ev rəhbəri bununla bağlı “Truth Social” sosial şəbəkəsindəki səhifəsində paylaşım edib. “Kolumbiya Dairəsində açıq-aşkar antisemitizm motivləri ilə törədilən bu dəhşətli qətllər indi dayandırılmalıdır! ABŞ-də nifrət və radikalizmə yer yoxdur”, - deyə Tramp qətlə yetirilən diplomatların ailələrinə başsağlığı verib.

İsrail səfirliklərdə təhlükəsizlik tədbirlərini gücləndirəcək

İsrail Prezidenti İsaak Hersoq və ABŞ Dövlət katibi Marko Rubio da hadisəni pisləyiblər. İsrailin Baş naziri Binyamin Netanyahu isə bəyan edib ki, İsrail dünya ölkələrində səfirliklərində təhlükəsizlik tədbirlərini gücləndiriləcək: “Mən İsrail missiyalarının, dövlət nümayəndələrinin təhlükəsizliyinin gücləndirilməsi barədə göstəriş verdim”. Netanyahu ABŞ Prezidenti Donald Trampa və Baş prokuror Pem Bondiyə “antisemitizmə qarşı aydın mövqelərinə görə” təşəkkür edib.

Politoloq: Belə hadisələr iki ölkənin münasibətlərini pozmayacaq

Bəs sözügedən qətl hadisəsi ABŞ-İsrail münasibətlərinə mənfi təsir edə bilərmi? Məsələ ilə bağlı qəzetimizə açıqlama verən politoloq İlyas Hüseynov bildirib ki, ABŞ-la İsrail arasında elə sağlam bağlar formalaşıb ki, iki dövlətin nəinki strateji tərəfdaş və müttəfiq, hətta bundan bir qədər də möhkəm münasibətlərinin olduğunu söyləmək olar. Onun sözlərinə görə, belə hadisələr iki ölkənin münasibətlərini pozmayacaq: “7 oktyabr 2023-cü ildə İsrailə qarşı hücumdan sonra ABŞ-ın siyasi elitasında təmsil olunan şəxslər yəhudi olduqlarını bəyan edir, İsrailə ABŞ siyasi xadimi kimi yox, yəhudi kimi gəldiklərini dönə-dönə vurğulayırdılar. Bu fakt münasibətlərin yüksək səviyyəsini açıq şəkildə göstərir”.

ABŞ-İsrail əlaqələrinə kölgə salmaq istəyən qüvvələrin də olduğunu deyən politoloq qeyd edib ki, İranın nüvə obyektlərinə ABŞ-ın dəstəyi ilə hücum etmək planlarına qarşı çıxan dairələr də mövcuddur. “Amma hesab edirəm ki, hər hansı insident, o cümlədən ABŞ-da İsrail diplomatlarının öldürülməsi iki ölkənin münasibətlərində soyuqluğa səbəb ola bilməz. Çünki münasibətlər çox dərin kök atıb. Bunun da tarixi, ideoloji, həm də biznes-korporativ əsasları var. Transmilli korporasiyalar, onların dünyada hegemon mövqeyi ABŞ-la İsrail arasında yaranan məsələlərin dinc yolla həllinə gətirib çıxarır”,- deyə İ.Hüseynov vurğulayıb.

N. BAYRAMLI

Paylaş:

Baxılıb: 240 dəfə