IV Şuşa Qlobal Media Forumu: Azərbaycanın beynəlxalq informasiya diplomatiyasında yeni mərhələ

Bakı:

29 °C

51 %

6 m/s

Əlaqə

AZ RU EN

Ana səhifə / Arxiv / IV Şuşa Qlobal Media Forumu: Azərbaycanın beynəlxalq informasiya diplomatiyasında yeni mərhələ

IV Şuşa Qlobal Media Forumu: Azərbaycanın beynəlxalq informasiya diplomatiyasında yeni mərhələ

14.07.2026 [15:12]

Prezident İlham Əliyevin IV Şuşa Qlobal Media Forumunda çıxışı müasir beynəlxalq münasibətlər sistemində medianın roluna, informasiya təhlükəsizliyi məsələlərinə və Azərbaycanın regional və qlobal miqyasda artan nüfuzuna dair mühüm mesajlarla yadda qalmışdır. Şuşa şəhərində keçirilən forum təkcə media nümayəndələrinin bir araya gəldiyi beynəlxalq platforma deyil, eyni zamanda Azərbaycanın yeni geosiyasi reallıqlar fonunda formalaşdırdığı informasiya diplomatiyasının mühüm tərkib hissəsidir.

Bu gün dünyada informasiya məkanı dövlətlərarası münasibətlərin əsas istiqamətlərindən birinə çevrilmişdir. Müharibələr və siyasi qarşıdurmalar artıq yalnız hərbi meydanlarda deyil, informasiya platformalarında da aparılır. Saxta xəbərlər, dezinformasiya kampaniyaları və siyasi manipulyasiyalar beynəlxalq təhlükəsizliyə ciddi təhdid yaradır. Belə bir şəraitdə Prezident İlham Əliyevin forumdakı çıxışı Azərbaycan dövlətinin informasiya siyasətinin prioritetlərini aydın şəkildə ortaya qoydu.

Dövlət başçısı çıxışında qeyd etdi ki, həqiqətlərin beynəlxalq ictimaiyyətə çatdırılması, obyektiv jurnalistikanın təşviqi və dezinformasiyaya qarşı mübarizə müasir dövrün əsas vəzifələrindəndir. Xüsusilə Vətən müharibəsi dövründə Azərbaycan informasiya cəbhəsində də mühüm uğurlar əldə etmiş, beynəlxalq media vasitəsilə ölkəmizin haqlı mövqeyini dünya ictimaiyyətinə çatdıra bilmişdir.

Şuşada belə bir forumun keçirilməsi xüsusi siyasi və mənəvi əhəmiyyət daşıyır. Şuşa şəhəri Azərbaycan xalqının tarixi, mədəni və mənəvi dəyərlərinin simvolu olmaqla yanaşı, artıq beynəlxalq dialoq məkanına çevrilmişdir. İşğaldan azad olunduqdan sonra burada keçirilən çoxsaylı beynəlxalq tədbirlər Azərbaycanın bölgədə yaratdığı yeni reallıqların dünyaya təqdim edilməsinə xidmət edir.

Prezident İlham Əliyevin çıxışında səsləndirdiyi əsas məqamlardan biri də regional sülh və əməkdaşlıq məsələləri olmuşdur. Dövlət başçısı vurğulamışdır ki, Azərbaycan Cənubi Qafqazda uzunmüddətli sabitliyin və təhlükəsizliyin təmin edilməsində maraqlıdır. Bunun üçün ölkəmiz qarşılıqlı hörmətə və beynəlxalq hüququn norma və prinsiplərinə əsaslanan münasibətlərin formalaşdırılmasını dəstəkləyir.

Forum çərçivəsində səsləndirilən fikirlər Azərbaycanın beynəlxalq media ilə əməkdaşlığa verdiyi əhəmiyyəti də nümayiş etdirdi. Müxtəlif ölkələrdən gəlmiş jurnalistlərin azad edilmiş ərazilərlə tanış olması, aparılan quruculuq işlərini öz gözləri ilə görməsi həqiqətlərin dünya ictimaiyyətinə birbaşa çatdırılması baxımından mühüm əhəmiyyət kəsb edir.

Bu gün Azərbaycan enerji təhlükəsizliyi, nəqliyyat dəhlizləri və beynəlxalq əməkdaşlıq layihələri vasitəsilə qlobal siyasətdə mühüm aktorlardan birinə çevrilmişdir. Bütün bunlar ölkəmizin beynəlxalq nüfuzunun artmasına və informasiya diplomatiyasının imkanlarının genişlənməsinə şərait yaradır.

IV Şuşa Qlobal Media Forumu bir daha sübut etdi ki, Azərbaycan yalnız regional lider deyil, həm də qlobal informasiya dialoqunun fəal iştirakçısıdır. Prezident İlham Əliyevin forumdakı çıxışı ölkəmizin gələcək inkişaf prioritetlərini, sülhə və əməkdaşlığa sadiqliyini, eləcə də obyektiv və məsuliyyətli media mühitinin formalaşdırılmasına verdiyi töhfəni bir daha nümayiş etdirdi.

Şuşadan dünyaya ünvanlanan mesaj aydındır: müasir dünyada həqiqətin müdafiəsi, informasiya təhlükəsizliyinin təmin olunması və beynəlxalq əməkdaşlığın genişləndirilməsi qlobal sabitliyin əsas şərtlərindəndir. Azərbaycan isə bu prosesdə öz prinsipial və konstruktiv mövqeyi ilə mühüm rol oynamaqda davam edir.

Elnur Qəhrəmanov,

YAP Gədəbəy rayon təşkilatının əməkdaşı

Paylaş:

Baxılıb: 286 dəfə