Siyasi etimaddan strateji gələcəyə

Bakı:

25 °C

61 %

2 m/s

Əlaqə

AZ RU EN

Ana səhifə / Arxiv / Siyasi etimaddan strateji gələcəyə

Siyasi etimaddan strateji gələcəyə

03.08.2026 [18:55]

Beynəlxalq münasibətlərdə dövlətlərin bir-birinə verdiyi ən böyük dəyər qarşılıqlı etimaddır. Məhz etimad olduqda siyasi dialoq dərinləşir, iqtisadi layihələr genişlənir, imzalanan sənədlər isə formal xarakter daşımayaraq real nəticələr doğurur. Prezident İlham Əliyevin Qırğızıstana dövlət səfəri də göstərdi ki, Azərbaycan ilə Qırğızıstan arasında münasibətlər məhz belə möhkəm etimad üzərində qurulub. Çolpon-Atada keçirilən görüşlər və əldə olunan razılaşmalar iki qardaş ölkənin əməkdaşlığının uzunmüddətli strateji xarakter daşıdığını bir daha təsdiqlədi.

Səfərin ən mühüm nəticəsi olan müttəfiqlik münasibətləri haqqında Müqavilə iki dövlət arasında əməkdaşlığı yeni siyasi mərhələyə yüksəltdi. Bu sənədin əhəmiyyəti yalnız hüquqi çərçivənin genişlənməsi ilə məhdudlaşmır. Müqavilə göstərir ki, Azərbaycan və Qırğızıstan regional və beynəlxalq məsələlərdə bir-birini etibarlı tərəfdaş kimi görür, gələcək inkişaf strategiyalarını da qarşılıqlı dəstək prinsipi üzərində qururlar. Müttəfiqlik statusu, əslində, uzun illər ərzində formalaşmış dostluğun və strateji tərəfdaşlığın məntiqi davamıdır.

Dövlətlərarası Şuranın üçüncü iclası zamanı səsləndirilən fikirlər də bu reallığı təsdiqlədi. Tərəflər əməkdaşlığın bütün istiqamətlər üzrə genişləndirilməsi əzmində olduqlarını nümayiş etdirdilər. Xüsusilə iqtisadiyyat, investisiya, nəqliyyat, enerji, turizm, təhsil və humanitar sahələr üzrə qarşıya qoyulan məqsədlər münasibətlərin çoxşaxəli inkişaf etdiyini göstərir. Bu istiqamətlər gələcək illərdə iki ölkə arasında əməkdaşlığın əsas hərəkətverici qüvvəsinə çevriləcək.

Prezident İlham Əliyevin çıxışında diqqət çəkən məqamlardan biri Qırğızıstanın inkişafına verilən səmimi qiymət idi. Bu yanaşma Azərbaycanın dost ölkələrin uğurlarını öz uğuru kimi qəbul edən xarici siyasət fəlsəfəsinin növbəti təzahürü oldu. Eyni zamanda Qarabağın bərpasına göstərilən dəstəyə görə minnətdarlığın ifadə edilməsi, Ağdamdakı Manas adına məktəbin qardaşlığın rəmzi kimi dəyərləndirilməsi humanitar əməkdaşlığın siyasi münasibətləri daha da möhkəmləndirdiyini göstərdi. Səfər çərçivəsində dövlət başçılarının qarşılıqlı şəkildə ali dövlət ordenləri ilə təltif olunması da xüsusi siyasi məna daşıyır. Prezident İlham Əliyevə birinci dərəcəli “Manas” ordeninin təqdim edilməsi Azərbaycanın Qırğızıstan üçün etibarlı və strateji tərəfdaş kimi qəbul edildiyini nümayiş etdirdi. Prezident Sadır Japarovun “Heydər Əliyev” ordeni ilə təltif olunması isə Azərbaycanın qardaş ölkə ilə münasibətlərə verdiyi yüksək dəyərin ifadəsi oldu. Bu qarşılıqlı ehtiram münasibətlərin gələcək inkişafı üçün əlavə mənəvi və siyasi stimul yaradır.

Mətbuata bəyanatlar zamanı səsləndirilən fikirlər də göstərdi ki, tərəflər artıq konkret nəticələr əldə etmiş əməkdaşlığı daha geniş miqyasda davam etdirmək niyyətindədirlər. Qırğız-Azərbaycan Fondunun fəaliyyətinin genişləndirilməsi, investisiya layihələrinin artırılması, nəqliyyat və logistika imkanlarından birgə istifadə perspektivləri, turizm sahəsində yeni təşəbbüslər bunun real göstəriciləridir. Bütün bunlar münasibətlərin yalnız siyasi dialoqdan ibarət olmadığını, real iqtisadi məzmun qazandığını təsdiqləyir.

Prezident İlham Əliyevin Qırğızıstana dövlət səfəri Azərbaycanın xarici siyasətinin ardıcıllığını və etibarlılığını növbəti dəfə nümayiş etdirdi. Bu səfər nəticəsində qəbul olunan qərarlar iki ölkə arasında əməkdaşlığın daha da möhkəmlənməsinə xidmət etməklə yanaşı, Türk dünyasında inteqrasiyanın güclənməsinə də mühüm töhfə verir. Ən əsası isə Çolpon-Atada atılan addımlar göstərdi ki, Azərbaycan ilə Qırğızıstanın müttəfiqliyi bugünün siyasi uğuru olmaqla kifayətlənməyəcək, gələcəyin də möhkəm strateji dayaqlarından birinə çevriləcək.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 298 dəfə