40 min ailə - 173 min insan...

AZ RU EN

Ana səhifə / Arxiv / 40 min ailə - 173 min insan...

40 min ailə - 173 min insan...

11.08.2022 [10:05]

Ünvanlı dövlət sosial yardım proqramı ilə əhatə olunub

MÜBARİZ

Azərbaycanın ardıcıl siyasətində sosial sferanın prioritetliyi təmin olunur. Ölkədə daim vətəndaşların rifah halının yaxşılaşdırılmasına, gəlir imkanlarının artırılmasına hesablanan təşəbbüslər irəli sürülərək onların operativ qaydada icrası təmin edilir. Bu baxımdan ölkə üzrə ünvanlı dövlət sosial yardım proqramının əhatə dairəsinin genişləndirilməsi və bu proqram çərçivəsində dövlət dəstəyindən yararlanan ailələrə ödənilən vəsaitin məbləğinin mütəmadi qaydada artırılması də diqqət çəkir.

Ədalətli resurs bölgüsü

Azərbaycanın dərinməzmunlu sosial siyasətini səciyyələndirən əsas cəhətlərdən biri ondan ibarətdir ki, ölkədə ədalətli resurs bölgüsü təmin edilir və qayğıya ehtiyacı olan bütün vətəndaşlar dövlət tərəfindən dəstəklənirlər. Respublikamızda Prezident İlham Əliyevin təşəbbüsü ilə belə bir qayda formalaşıb: İqtisadiyyat böyüdükcə, gəlirlər artdıqca sosial sferaya daha artıq həcmlərdə vəsaitlər yönəldilir. Bunun təsdiqi olaraq qeyd edək ki, son illərdə sosial ödənişlərdə ciddi artımlar qeydə alınıb. O cümlədən dövlət başçısının imzaladığı müvafiq Fərman və sərəncamlar əsasında son 3 il yarım ərzində respublikamızda 4 milyon vətəndaşı əhatə edən 3 sosial islahat paketinin icrası yüksək səviyyədə təmin olunub. Bunun üçün dövlət büdcəsindən əlavə olaraq 6 milyard manat, yəni ölkənin icmal büdcəsinin 20 faizindən çox vəsait ayrılıb. Bəhs olunan dövrdə minimum əməkhaqqı 2,3 dəfə, əməkhaqqı fondu 2,2 dəfə artıb və əməkhaqqı fonduna əlavə 8 milyard manat vəsait yönəldilib. Eləcə də median əməkhaqqıda 86 faiz, minimum pensiyada 2,2 dəfə, orta aylıq pensiyada 75 faiz artım baş verib. Müvafiq kateqoriyadan olan vətəndaşlara ödənilən sosial müavinət və təqaüdlərdə də 3,5 dəfə artım qeydə alınıb. Müavinət və təqaüd istiqaməti üzrə ayrılan illik vəsaitin həcmi 2018-ci ilə nisbətən 400 milyon manatdan 1 milyard manatadək artaraq 1,4 milyard manata çatıb.

Ünvanlı sosial yardımlarda artımlar

Respublikamızda sosial ədalət pinsipi əsasında reallaşdırılan layihələrdən biri də aztəminatlı ailələr üçün nəzərdə tutulan ünvanlı dövlət sosial yardım proqramıdır. Azərbaycan hətta çətin keçən pandemiya dövründə də ünvanlı dövlət sosial yardım proqramında hansısa bir ixtisarlara yol vermədi. Prezident İlham Əliyev bu proqramın icrasını şəxsi nəzarətində saxlayır. Dövlət başçısı öz çıxışlarında ünvanlı sosial yardımların təyinatında və ödənilməsində şəffaflığın təmin edilməsi ilə bağlı mesajlarını dəfələrlə diqqətə çatdırıb. Prezident İlham Əliyev əmək və əhalinin sosial müdafiəsi naziri Sahil Babayevi qəbul edərkən bir daha bildirib ki, hələ də dövlət dəstəyinə ehtiyacı olan vətəndaşların dövlət təminatı təmin edilsin və bu vətəndaşların sayı artırılsın.

Dövlət başçısının tapşırıqlarına uyğun olaraq ölkə üzrə ünvanlı dövlət sosial yardım proqramının əhatə dairəsinin genişləndirilməsi məqsədilə müvafiq tədbirlər görülür. Ünvanlı sosial yardımın təyinatı şərtlərinin yumşaldılması, aztəminatlı ailələrin sosial yardım proqramına əlçatanlığının artırılması, tələb olunan sənədlərin sayının azaldılması belə tədbirlərin tam olmayan siyahısını təşkil edir. Qaydalara əsasən, müvafiq kateqoriyadan olan vətəndaşlara ünvanlı sosial yardımlar ehtiyac meyarına uyğun müəyyənləşdirilir. Respublikamızda bu il üçün ehtiyac meyarı artırılaraq 200 manata çatdırılıb. Ehtiyac meyarı artdıqca yardımın məbləğinin də artması baş verir. Əmək və Əhalinin Sosial Müdafiəsi Nazirliyindən bildirilib ki, sosial yardım sisteminin təkmilləşdirilməsi işləri qarşıdakı dövrdə də davam edəcək.

Reallaşdırılan tədbirlərin məntiqi nəticəsi olaraq ünvanlı sosial yardımların məbləği əhəmiyyətli dərəcədə artıb. Ölkəmizdə digər sosial ödənişlər kimi, ünvanlı sosial yardımların məbləği də artmaqda davam edir. 2022-ci ilin iyul ayında 1 ailəyə ödənilən ÜDSY-nin məbləği artaraq, 260,2 manatdan 360,0 manata çatıb. Bu da ötən ilin müvafiq dövrü ilə müqayisədə 38,3 faiz artım deməkdir. Qeyd edək ki, hazırda ölkəmizdə 40 min ailə üzrə 173 min nəfər ünvanlı dövlət sosial yardımı proqramı ilə əhatə olunur.

Paylaş:

Baxılıb: 451 dəfə