Azərbaycan özünü dünyada etibarlı tərəfdaş kimi təsdiq edib

Ana səhifə / Arxiv / Azərbaycan özünü dünyada etibarlı tərəfdaş kimi təsdiq edib

Azərbaycan özünü dünyada etibarlı tərəfdaş kimi təsdiq edib

24.01.2023 [11:46]

Prezident İlham Əliyevin 2023-cü ilin 17 yanvar tarixində Davosda Çinin CGTN (China Global Television Network) televiziya kanalına müsahibəsi ilə əlaqədar açıqlama verən Yeni Azərbaycan Partiyası Binəqədi rayon təşkilatının sədri Vüsar İsmayılovun sözlərinə görə Azərbaycan dövlət başçısı İlham Əliyevin rəhbərliyi ilə həyata keçirdiyi uğurlu beynəlxalq iqtisadi layihələr nəticəsində etibarlı tərəfdaş kimi təsdiq edib. Bir çox dövlətlərlə qarşılıqlı maraq doğuran münasibətlər əsasında formalaşmış neft, qaz və enerji layihələri dövlətlərin inkişafına, xalqların daha da yaxınlaşmasına önəmli töhfədir. Azərbaycan təkcə Cənubi Qafqaz, MDB məkanında deyil, artıq Avropanın enerji xəritəsində əhəmiyyətli rol oynayır və Avropa ölkələrinin enerji təhlükəsizliyinə mühüm dəstək göstərir.

Qarşılıqlı hörmətin rəmzi olaraq dövlətlərin bir-birinə olan etimadı daha da artır, uğurlu iqtisadi münasibətlər növbəti mərhələlərdə digər sahələrdə də qarşılıqlı əlaqələrin qurulmasına və ikitərəfli dostluq, əməkdaşlıq münasibətlərinin inkişafına gətirib çıxarır: “Əminliklə deyə bilərik ki, bu gün iqtisadi əməkdaşlıq əlaqələrinin durmadan artması nəticəsində perspektiv əməkdaşlıq əlaqələri müxtəlif və daha geniş sahələri əhatə edir. Əməkdaşlıq üçün çox möhkəm siyasi platforma qurulub. Eyni zamanda dövlət başçısının da qeyd etdiyi kimi, ölkəmizdə geniş investisiya mühiti yaranıb və bu şəraitdən səmərəli istifadə edən dövlətlərin və şirkətlərin sayı artmaqdadır”.

Prezident İlham Əliyev müsahibəsində Çinlə ikitərəfli münasibətlərin uğurlu inkişafından da məmnunluğunu ifadə edib: “Artıq 30 ildir davam edən Azərbaycan-Çin əlaqələri bizim etibarlı tərəfdaş və bir-birinə etibar edən dostlar olduğumuzu sübut edir. Bu günkü inkişaf göstəriciləri gələcək münasibətlərimizin sağlam təməllər üzərində qurulduğunu göstərir. Hər iki ölkə bir-birinin ərazi bütövlüyünü və suverenliyini dəstəkləyir. Möhkəm siyasi platforma ilə yanaşı, Çinlə iqtisadi əməkdaşlığımız uğurlu və hər iki ölkənin və xalqlarımızın maraqlarına uyğun şəkildə qurulur”.

Rayon təşkilatının sədrinin sözlərinə əsasən Azərbaycan xarici siyasi kursunda dövlətlər uğurlu əlaqələrin qurulmasına böyük önəm verir. Ölkəmiz verdiyi bütün vədlərə sadiq qalaraq, təkcə sözdə deyil, əməldə də etibarlı və güvənilir tərəfdaşdır. Məhz bu baxımdan digər dövlətlər Azərbaycanla müxtəlif sahələr üzrə birgə layihələrin reallaşdırılmasında maraqlıdır. Çünki dövlət başçısı İlham Əliyevin müdrik və uzaqgörən siyasəti, təşəbbüskarlığı sayəsində sülhün və təhlükəsizliyin təmin edilməsinə, ölkələrin və xalqların inkişafına xidmət edən beynəlxalq əhəmiyyətli layihələr uğurla icra edilməkdədir. Bu gün aparılan danışıqlar gələcəkdə də bu istiqamətdə layihələrin həyata keçiriləcəyindən xəbər verir.

Paylaş:

Baxılıb: 105 dəfə