Rusiya-Ukrayna münasibətləri yenidən gərginləşib

Bakı:

11 °C

93 %

5 m/s

Əlaqə

AZ RU EN

Ana səhifə / Dünya / Rusiya-Ukrayna münasibətləri yenidən gərginləşib

Rusiya-Ukrayna münasibətləri yenidən gərginləşib

14.08.2009 [14:22]

Moskvanın son addımı Kiyevi narahat etməkdədir
Rusiya-Ukrayna münasibətləri yenidən gərginləşib. Rusiya prezidenti Dmitri Medvedev ölkəsinin silahlı qüvvələrinə dövlət sərhədlərindən kənarda hərbi əməliyyatlar aparmaq səlahiyyətinin verilməsini nəzərdə tutan qanun layihəsini Dumanın müzakirəsinə təqdim edib. Sözügedən layihə Rusiya Federasiyasının Silahlı Qüvvələrindən ölkə xaricində də istifadə olunmasını nəzərdə tutur. Qeyd edək ki, bu layihə Rusiya ilə münasibətləri gərgin olan Ukrayna və Gürcüstanı ciddi narahat edib. Bununla yanaşı, Dmitri Medvedev rəsmi Kiyevi keçən ilin avqustunda baş verən hadisələrdə Gürcüstanı müdafiə etməkdə və bu ölkəyə silah satmaqda gunahlandırıb. Statistikaya görə, 2008-ci il ərzində Ukrayna Gürcüstana 40 ədəd hərbi texnika verib, bu isə böyük rəqəm hesab edilmir.
Qeyd edək ki, son illər mütəmadi olaraq, Rusiya-Ukrayna münasibətlərində soyuqluq müşahidə edilir. Buna səbəb rəsmi Moskvanın Ukraynanı daim öz təsiri altında saxlamağa çalışmasıdır. Bir neçə il bundan öncə isə Ukraynada baş verən “narıncı” inqilab və ardınca prezident seçkilərində anti-Rusiya mövqeli Viktor Yuşşenkonun qələbə qazanması iki ölkə arasındakı münasibətlərdə daha çətin mərhələnin başlancığını qoydu. O vaxtdan sözügedən ölkələr arasında siyasi, iqtisadi, hərbi sahədə yaranan anlaşılmazlıqların ardı-arası kəsilmir. Bu ilin qışında Rusiya ilə Ukrayna arasında yaranan qaz münaqişəsindən sonra isə rəsmi Moskva bu ölkədən yan keçəcəyi nəzərdə tutulan “Cənub axını” layihəsinin reallaşdırılması üzrə səylərini artırıb.
Bu yaxınlarda isə iki ölkə arasında növbəti siyasi qalmaqal yaşanıb. Belə ki, Ukrayna səfirliyinin elçi-müşaviri İqor Berezkin Rusiyadan çıxarılıb. Belə hesab olunur ki, rəsmi Moskva Ukraynadakı səfirliyinin müşaviri Vladimir Lısenkonun qovulmasına cavab olaraq bu addımı atıb. Yaşanan diplomatik qalmaqala səbəb Rusiyanın Qara dəniz donanması ətrafında yaranan gərginlik olub. Tərəflər bir-birinə qarşı hədələri hələ də davam etdirirlər. Belə ki, rəsmi Kiyev Rusiyanın Odessadakı baş konsulunu “persona-non-qrata” elan edəcəyini, rəsmi Moskva isə buna cavab olaraq Ukraynanın Sankt-Peterburqdakı baş konsulunu ölkədən çıxaracağını bəyan edib.
Müşahidəçilərin fikrincə, son zamanlar iki ölkə arasındakı münasibətlərin daha da pisləşməsi, əslində, Ukraynada qarşıdan gələn növbəti prezidenti seçkiləri ilə bağlıdır. Hazırkı prezident Viktor Yuşşenkonun yenidən öz namizədliyini irəli sürəcəyi gözlənilsə də, görünür, Rusiya bu ölkədə hakimiyyətin dəyişəcəyinə inanır. Bu səbəbdən də iyun ayında Ukraynadan səfirini geri çağırdıqdan sonra belə rəsmi Moskva yeni təyin olunmuş səfir Mixail Zurabovu bu ölkəyə göndərməyə tələsmir. Dmitri Medvedev səfirin göndərilməsinin konkret müddətinin Ukrayna-Rusiya münasibətlərinin inkişafından asılı olacağını bildirib.
Hələlik isə onu demək olar ki, münasibətlərin sonrakı inkişafı seçkiqabağı vəziyyəti öz xeyrinə dəyişməyə çalışan Rusiyanın görəcəyi tədbirlərdən və rəsmi Kiyevin buna cavab reaksiyasından asılı olacaq.
Hülya MƏMMƏDLİ

Paylaş:

Baxılıb: 2117 dəfə