Davamlı regional inkişafın gözəl nümunəsi

Bakı:

17 °C

72 %

2 m/s

Əlaqə

AZ RU EN

Ana səhifə / Gündəm / Davamlı regional inkişafın gözəl nümunəsi

Davamlı regional inkişafın gözəl nümunəsi

30.09.2025 [12:14]

Azərbaycanın timsalında regional inkişafın gözəl nümunəsini izləmək mümkündür. Son iyirimi ildən artıq müddətdə Prezident İlham Əliyevin imzaladığı sərəncamlar əsasında qəbul olunan regionların sosial-iqtisadi inkişafına dair müvafiq dövlət proqramlarının uğurlu icrası çərçivəsində reallaşdırılan layihələr sayəsində ölkənin bütün bölgələrində yeni reallıqlar yaranıb. Qürurverici haldır ki, hazırda əksər regionlarla paytaxt Bakı və digər iri şəhərlər arasında müxtəlif parametrlər baxımından fərq aradan qalxıb. Böyük həcmlərdə dövlət investisiya qoyuluşu hesabına yaradılan müasir infrastruktur, sənaye müəssisələri, aqroparklar bölgələrimizdə qeyri-neft sektorunun, özəl bölmənin inkişafına güclü stimul verməklə yanaşı, yerli sakinlərin biznesə qoşulmalarını, əmək bazarına çıxışlarını əhəmiyyyətli dərəcədə asanlaşdırır ki, bu da son nəticədə bütün ölkə üzrə yüksək vətəndaş məmnunluğunu təmin edir. Bu günlərdə Prezident İlham Əliyev regionlara növbəti səfəri çərçivəsində Gəncə şəhərində və Yevlax rayonunda daha bir neçə müasir infrastruktur obyektinin açılışına qatılıb və Özünün dəyərli tövsiyələrini verib.

Bölgələrdə müasir idman infrastrukturu yaradılır

Müasir dövlət kimi inkişaf edən Azərbaycanda bütün ölkə üzrə idmanın kütləviliyinə nail olunması hədəflənib. Bu məqsədlə 2004-cü ildən bəri respublikamızda 50-yə yaxın olimpiya-idman kompleksi tikilərək istifadəyə verilib. Bu idman komplekslərində bir qayda olaraq yeniyetmələrin və gənclərin idmanın müxtəlif növləri ilə məşğul olmaları üçün hər cür şərait yaradılır. Daha bir belə yüksəksəviyyəli idman obyekti Yevlaxda istifadəyə verilib. Prezidenti İlham Əliyev sentyabrın 27-də Yevlax Olimpiya İdman Kompleksinin açılışında iştirak edib.

Gənclər və idman naziri Fərid Qayıbov dövlətimizin başçısına kompleksdə yaradılan şərait barədə məlumat verib. Bildirilib ki, tikintisinə 2024-cü ildə başlanılan kompleksin ərazisi 5,8 hektardır. Burada açıq havada idman meydançaları, stadion, 1100 tamaşaçı yerlik universal idman, güləş, cüdo, bədii gimnastika, boks, kikboksinq, taekvondo, karate, fitnes və trenajor zalları, üzgüçülük hovuzu yaradılıb. Bunlardan başqa, kompleksdə iclas zalı, kafe, hakim, məşqçilər, həkim, şərhçilər üçün otaqlar, restoran, 42 yerlik mehmanxana binası da fəaliyyət göstərəcək.

Azərbaycanın bu günlərdə ev sahibliyi etdiyi Müstəqil Dövlətlər Birliyi ölkələrinin III Oyunları zamanı boks idman növü üzrə yarışlar Yevlax Olimpiya İdman Kompleksində təşkil olunur.

Son illərdə idman sahəsində görülmüş məqsədyönlü işlər nəticəsində Azərbaycan beynəlxalq yarışların keçirildiyi əsas mərkəzlərdən birinə çevrilib. Müxtəlif idman yarışları üzrə Dünya və Avropa çempionatları, həmçinin Birinci Avropa Oyunları, İslam Həmrəyliyi Oyunları, Formula 1 kimi mötəbər tədbirlərin uğurla təşkili Azərbaycanın bu sahədə yüksək təşkilatçılıq bacarığını nümayiş etdirib. Müstəqil Dövlətlər Birliyi ölkələrinin III Oyunlarının Azərbaycanda keçirilməsi də ölkəmizə beynəlxalq idman ictimaiyyəti tərəfindən olan etimadın təzahürüdür.

Gəncənin nəqliyyat parkının yenilənməsinə böyük töhfə

Regionlarda xidmət sektorunun yüksək səviyyəyə qaldırılması da Azərbaycanın yeni reallıqları sırasında yer alır. Azərbaycan dövlətinin əsas məqsədlərindən biri vətəndaşlar üçün bütün rahatlıqların təmin edilməsidir. Bu hədəfə nail olmaqdan ötrü ardıcıl addımlar atılır. Prezident İlham Əliyev sentyabrın 27-də “BakuBus” MMC-nin Gəncə Avtoparkının açılışında iştirak edib.

Rəqəmsal inkişaf və nəqliyyat naziri Rəşad Nəbiyev dövlətimizin başçısına avtoparkda yaradılan şərait barədə məlumat verib.

Üç yüz yerlik avtobus parkının inşasına bu ilin yanvarında başlanılıb. Ümumi sahəsi 10 hektar olan parkda texniki baxış və təmir postları, avtomatlaşdırılmış uçot sistemli yanacaq təsərrüfatı, saatda 60 avtobusun yuyulması gücünə malik kompleks inşa edilib. Avtobus parkının yaradılması ilə 675 nəfər işlə təmin olunub. Onlardan 553 nəfəri sürücü, 122 nəfəri isə inzibati və texniki heyətdir.

“BakuBus” MMC Gəncə şəhərində 18 mövcud və 2 yeni marşrut xətti üzrə fəaliyyət göstərəcək. Şəhərə yüksək ekoloji standarta - EURO6-ya cavab verən 280 avtobus gətirilib ki, onlardan da 45-i 54, 186-sı 63, 49-u isə 102 sərnişin tutumuna malikdir.

Bu layihənin həyata keçirilməsi, ilk növbədə, paytaxt Bakıdan sonra respublikanın ən böyük şəhəri olan Gəncənin nəqliyyat-sərnişin daşıma infrastrukturunun müasirləşdirilməsi baxımından çox mühüm rol oynayır. Bu, eyni zamanda, sərnişinlərin rahat, təhlükəsiz şəkildə mənzilbaşına çatmasına imkan yaradır, şəhərin nəqliyyat parkının yenilənməsinə böyük töhfə verir. Həmçinin yeni iş yerlərinin açılmasında da belə layihələrin rolu önəmlidir.

Gəncə şəhəri üzrə aparılan genişmiqyaslı təhlil və araşdırmalar nəticəsində marşrut şəbəkəsi yenidən formalaşdırılıb. Mövcud 32 marşrut xəttində optimallaşdırma aparılıb, 22 marşrut xəttinin fəaliyyət göstərməsi müəyyən olunub.

Əhəmiyyətli yeniliklərdən biri də ictimai nəqliyyatda qabaqcıl rəqəmsal texnologiyaların tətbiqidir. Gəncədə fəaliyyət göstərən bütün avtobuslarda gedişhaqqını “CityCard” nağdsız ödəniş sistemi, istənilən bank kartları, həmçinin mobil ödəniş vasitələri ilə ödəmək mümkündür.

Sərnişindaşıma sahəsinin optimallaşması çərçivəsində Dəmiryol Vağzalının qarşısında Nəqliyyat Mübadilə Məntəqəsi yaradılıb. Burada dəmir yolu ilə avtomobil nəqliyyatının qarşılıqlı əlaqəsi öz əksini tapıb.

Əhalinin gediş-gəlişi və sıxlığın çox olduğu ərazilərdə 34 müasir dayanacaq pavilyonu quraşdırılıb.

Yol infrastrukturunun yaxşılaşdırılması istiqamətində 97 küçədə asfalt örtüyünün yenilənmə işləri aparılıb, 128 kilometr xətlənmə işləri icra olunub. Şəhərdə təhlillər aparılaraq mikromobillik zolaqlarının salınması üçün uyğun yerlər müəyyənləşdirilib.

Taksi nəqliyyat vasitələri üçün cəlbetmə məntəqələrinin müəyyən edilməsi istiqamətində də işlər aparılıb və 10 ünvanda taksi duracağı üçün yer təyin olunub.

Gəncə şəhər stadionunda istər yerli, istərsə də beynəlxalq səviyyəli yarışlar keçiriləcək

Hazırda respublikamızın ikinci ən böyük şəhəri olan Gəncədə əlamətdar günlər yaşanır - Nizami yurdu III MDB Oyunlarına ev sahibliyi edir. Oyunlara hazırlıq çərçivəsində şəhərdə böyük miqyaslı abadlıq-quruculuq işləri həyata keçirilib, o cümlədən şəhər stadionunun inşası reallaşdırılıb. Prezident İlham Əliyev sentyabrın 27-də Gəncə Stadionunun açılışında iştirak edib.

Bildirilib ki, ərazisi 10 hektardan çox olan stadionun tamaşaçı tutumu 15 min 343 nəfərdir. Ərazidə AFFA tərəfindən köməkçi məşq meydançaları və futbol akademiyasının binası tikilib. Stadionda futbolçular üçün soyunub-geyinmə, konfrans, tibb, hakimlər, texniki heyət üçün otaqlar və digər zəruri sahələr yaradılıb. UEFA-nın 4-cü kateqoriya standartlarına uyğun inşa edilən arena müasir işıqlandırma, səs, yayım, internet, təhlükəsizlik sistemləri ilə təchiz olunub.

Qeyd edək ki, Prezident İlham Əliyev 2023-cü ilin oktyabrında stadionun tikintisi ilə bağlı Sərəncam imzalayıb. Onun təməli isə ötən ilin aprelində dövlətimizin başçısı tərəfindən qoyulub. Bu ilin avqustunda Prezident İlham Əliyev və birinci xanım Mehriban Əliyeva stadionda aparılan tikinti işlərinin gedişi ilə tanış olublar.

Belə müasir idman arenalarının istifadəyə verilməsi ölkəmizin digər bölgələrində olduğu kimi, Gəncədə də istər yerli, istərsə də beynəlxalq yarışların yüksək səviyyədə keçirilməsinə hərtərəfli şərait yaradacaq.

Mübariz ABDULLAYEV

Paylaş:

Baxılıb: 625 dəfə