Siyasi proseslərə baxış bucağı dəyişir

Bakı:

19 °C

94 %

4 m/s

Əlaqə

AZ RU EN

Ana səhifə / Siyasət / Siyasi proseslərə baxış bucağı dəyişir

Siyasi proseslərə baxış bucağı dəyişir

13.01.2022 [10:23]

Qazaxıstan hadisələri türk birliyinin möhkəmləndirilməsi çağırışlarının artmasına səbəb olub

Pərviz Sadayoğlu

Qazaxıstanda baş verən hadisələrin ardından KTMT-nin sülhməramlı kontingentinin çağırılmasının bu ölkədə müəyyən narazılıqlar yaratması sirr deyil. Ölkə ictimaiyyəti bununla bağlı həm sosial şəbəkələrdə, həm də kütləvi informasiya vasitələrində müəyyən çağırışlar edirlər. Maraqlıdır ki, bu çağırışlarda narazılıqlarla yanaşı, türk birliyinin vacibliyi ilə bağlı elementlər də yer alır. Qazax xalqı Türk Dövlətləri Təşkilatının (TDT) fəallığının daha da artırılmasının zəruriliyini önə çəkir.

Ümumiyyətlə, son proseslər Qazaxıstanla yanaşı, digər türkdilli ölkələrdə də mühüm təsirlərə yol açıb. O baxımdan ki, region ölkələrinin ictimai fəalları, siyasi ekspertləri türk birliyinin daha da möhkəmlənməsinin vacibliyini qəti surətdə bildirirlər. Hətta təşkilat üzvü olan dövlətlər arasında daha sıx və intensiv əlaqələrinin qurulması məsələsi də əsas müzakirə predmetlərindəndir.

Məsələ ilə bağlı fikirlərini bölüşən Milli Məclisin Beynəlxalq münasibətlər və parlamentlərarası əlaqələr komitəsinin üzvü, TÜRKPA-nın və 2014-2018-ci illərdə Türkdilli Dövlətlərin Əməkdaşlıq Şurasının Baş katibi olmuş Ramil Həsən Qazaxıstanın hər zaman Türk dünyasının aparıcı dövlətlərdən biri olduğunu diqqətə çatdırıb. Millət vəkili qeyd edib ki, bu gün orada baş verənlər həqiqətən də üzücüdür.

Yaxın zamanlarda, bu ölkədə sabitliyin təmin olunacağına ümid etdiyini bildirən R.Həsənin fikrincə, baş verən hadisələrin nəticəsi olaraq bəzi maraqlı nüanslar ortaya çıxmaqdadır: “Təbii ki, bu məsələ Qazaxıstanın daxili işidir. Bu mənada, məsələ ilə bağlı hər hansı siyasi dəyərləndirmə aparmaq çox çətindir. Bununla belə, Qazaxıstan həm də Türk dünyasının bir parçasıdır. Proseslərin inkişafı isə artıq cəmiyyətdə böyük təsir oyatmaqdadır. O baxımdan ki, Qazaxıstan cəmiyyətində siyasi proseslərə baxış bucağı dəyişir. Qeyd edim ki, bu hal digər türk dövlətlərinə də sirayət etməkdədir. Artıq türk birliyinə münasibət daha istidir. Eyni zamanda, baş verənlərin fonunda Mərkəzi Asiyada Qərbə inteqrasiya meyllərinin artması da müşahidə edilir. Türk Dövlətləri Təşkilatının nüfuzu da Mərkəzi Asiyada artmaqdadır. Bu hal açıq şəkildə görünür. Sosial şəbəkələrdə, internet resurslarında bu tipli açıqlamalara daha tez-tez rast gəlmək mümkündür. Bu isə onu deməyə əsas verir ki, perspektivdə TDT-nin fəallığının artmasının şahidi ola bilərik. Hər bir halda, Qazaxıstanda sabitliyin təmin olunması ən vacib məsələdir. Bu problemin daha da kəskinləşməsinə yol vermək olmaz”.

Paylaş:

Baxılıb: 773 dəfə