Heydər Əliyev
yeni azerbaycan logo

Ana səhifə / Xəbər lenti / Radikal müxalifətin antimilli siması

Radikal müxalifətin antimilli siması

09.09.2021 [08:49]

Yaxud dağıdıcı düşərgə təmsilçiləri ermənipərəst mövqedən çıxış edərək işğaldan azad olunmuş ərazilərdə aparılan bərpa-quruculuq işlərini hədəfə almağa çalışırlar


Radikal müxalifət düşərgəsinin işğaldan azad edilmiş ərazilərimizdə aparılan bərpa-quruculuq işlərinə qarşı qara piar kampaniyası aparması heç kimə sirr deyil. Dağıdıcı müxalifət, eləcə də onların xaricdəki uzantıları görülən işlərin əhəmiyyətini azaltmağa çalışır, ermənilərin apardıqları çirkin təbliğata dəstək verməyə niyyətlənirlər. Ermənipərəst radikal düşərgənin sosial şəbəkələrdə “fəal” üzvlərindən sayılan Qənimət Zahid də öz şəriklərindən geri qalmamaq üçün bu dəfə Füzuli rayonunda istifadəyə verilmiş Beynəlxalq Hava Limanına qarşı qərəzli təbliğat aparmaqdadır. Təbii ki, onun bu uğursuz cəhdi də digərləri kimi fiaskoya məhkumdur.
Məsələ ilə bağlı fikirlərini bölüşən Milli Məclisin deputatı, YAP İdarə Heyətinin üzvü Azər Badamov Füzuli Beynəlxalq Hava Limanının həm siyasi, həm iqtisadi, həm də tarixi əhəmiyyətə malik olduğunu diqqətə çatdırıb. Millət vəkilinin sözlərinə görə, 44 günlük Vətən müharibəsində zəfər qazanan Azərbaycan dövləti yeni siyasi, iqtisadi reallıqlar yaratmaqla yanaşı, həm də regionun təhlükəsizliyinin təminatçısına çevrilib. “Azərbaycan dövləti Qarabağda hava məkanının təhlükəsizliyini təmin etmək gücündədir. Füzuli Hava Limanı beynəlxalq statuslu hava limanıdır və burada həm sərnişindaşıma, həm də yükdaşımaların həyata keçirilməsi gələcəkdə bölgənin iqtisadi baxımdan dirçəlməsi üçün geniş imkanlar açır. Azərbaycan Füzuli Beynəlxalq Hava Limanının inşasını reallaşdırmaqla həm ilk təcrübə yaradır, həm də təbii ki, bölgənin bərpasını sürətləndirmiş olur. Nəqliyyat infrastrukturunun təkmilləşdirilməsi, şübhəsiz ki, həm bu bölgədə yaşayan insanların rifahını təmin edəcək, həm də bölgənin turizm imkanlarını artıracaq. Bu baxımdan, radikal müxalifətin artıq görülən işləri hədəfə almağa çalışması, sosial şəbəkələrdə qara piar kampaniyası aparması narahatlıqdan və qısqanclıqdan irəli gəlir. Onlar anlayırlar ki, görülən işlər Azərbaycanın gələcəkdə imkanlarının daha da genişlənməsinə yol açacaq”.
Milli Məclisin deputatı İlham Məmmədov da işğaldan azad olunmuş ərazilərdə aparılan bərpa prosesinin, o cümlədən yeni hava limanlarının inşasının Azərbaycanın gücünün və qüdrətinin ifadəsi olduğunu deyib. Onun sözlərinə görə, radikal müxalifətin görülən işlərə qarşı apardığı çirkin təbliğat onların əsl simasını bir daha Azərbaycan cəmiyyətinə göstərmiş oldu. “44 günlük Vətən müharibəsindən keçən dövr ərzində üç rayonda - Füzuli, Zəngilan və Laçında yeni hava limanlarının tikilməsi istiqamətində görülən işlər bir sıra məqamlardan xəbər verir. Yeni hava limanlarının tikilməsi həm bu regionun turizm potensialından səmərəli istifadə etməyə imkan verir, həm də yeni kommunikasiya xətti üzrə yükdaşımaları asanlaşdırır. Ermənipərəst mərkəzlər anlayırlar ki, qalib Azərbaycan bu əraziləri yenidən dirçəldib cənnətə çevirəcək. Bu baxımdan, xəyanətkarların kimlərin dili ilə danışdığı gün kimi aydındır. Ömrünü, həyatını Azərbaycan dövlətinə, xalqına böhtan atmaq və ləkə yaxmaqla keçirən, xaricdəki ermənipərəst qüvvələrin buyruq qulu olan radikal müxalifətin Vətən müharibəsi zamanı və ondan sonrakı dövrdə etdiyi xəyanətlərdən sonra yenidən bu cür mövqe nümayiş etdirməsi bir daha radikal düşərgə təmsilçilərinin xalqımıza və dövlətimizə qarşı düşmən münasibəti bəslədiklərini göstərir”, - deyə İ.Məmmədov əlavə edib.
Pərviz SADAYOĞLU

Paylaş
Baxılıb: 46 dəfə

Xəbər lenti

Hamısına bax

31 389 vaksin vurdurdu

20 Oktyabr 16:49

ARXİV
B Be Ça Ç Ca C Ş
1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31