QHT-lərə Dövlət Dəstəyi Şurasının sədri SƏLİS e-vətəndaş proqramının tətbiqinə dair brifinq keçirib

Bakı:

25 °C

42 %

4 m/s

AZ RU EN

Ana səhifə / Sosial / QHT-lərə Dövlət Dəstəyi Şurasının sədri SƏLİS e-vətəndaş proqramının tətbiqinə dair brifinq keçirib

QHT-lərə Dövlət Dəstəyi Şurasının sədri SƏLİS e-vətəndaş proqramının tətbiqinə dair brifinq keçirib

25.06.2019 [10:00]

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, Milli Məclisin deputatı Azay Quliyev iyunun 24-də SƏLİS (Sürətli Əlaqələndirmə və Layihələrin İdarəetmə Sistemi) e-vətəndaş proqramının tətbiqinə dair brifinq keçirib.
AZƏRTAC xəbər verir ki, Azay Quliyev elektron vətəndaş proqramının nəticələrinin sevindirici olduğunu söyləyib. O deyib: “Bizim məqsədimiz fəaliyyətimizin maksimum dərəcədə əlçatanlılığını və dövlət vəsaitinin xərclənməsi prosesində vətəndaşların iştirakını təmin etməkdir. Burada ictimai nəzarət elementi var. Layihələrin sayı 265 idi, onların 11-i texniki səbəblərdən qiymətləndirmə prosesinə buraxılmadı. Lakin 254 layihə ekspertlərin və vətəndaşların qiymətləndirilməsi üçün onların ixtiyarına verilmişdi. 10 min 930 vətəndaş bu prosesdə iştirak edib. Biz vətəndaşların məlumatlanması üçün həm universitetlərdə, həm də bölgələrimizdə proqramın təqdimatını keçirdik. Təxminən 73 şəhər və rayonu əhatə edən prosesdə 12 min 491 rəy daxil olub. Bu rəylərdən 11 min 271- i qeydiyyata alınıb. Vətəndaş istədiyi qədər layihəni qiymətləndirə bilərdi. Qiymətləndirmə prosesində 3 səs bir bal hesablanırdı. Hər bir səsin arxasında vətəndaşın rəyi olmalı idi. Bəzi vətəndaşlar verdikləri səsi əsaslandırmaq istəmirdilər. Buna görə də 1220 səs silinməli oldu. Səslərin silinmə səbəbləri qeydiyyatdan keçmək üçün lazım olan məlumatların düzgün qeyd olunmaması, əsaslandırılmayan rəylərin olması, eyni rəylərin müxtəlif vətəndaşlar tərəfindən təqdim olunmasıdır. Bundan başqa, QHT sədri özünün təqdim etdiyi layihəyə rəy verməsi, rəylərdə gizli olmasına baxmayaraq, QHT-nin adının qeyd olunması, rəylərin verilən səsə adekvat olmaması, layihələrin bəndlərinin köçürülərək rəy kimi təqdim olunması və rəylərin məzmuna uyğun olmaması səbəbindən bəzi səslər silinib. Deputatın adından istifadə edib rəy verənlər də oldu. Təbii ki, onlar da nəzərə alınmadı”.
Şura sədri keçid balı toplayan layihələrin sayı barədə də məlumat verib: “Ekspertlərdən yekun keçid balı (60 və daha çox) toplanmış layihələrin sayı 101, vətəndaşlardan keçid bal (20 və daha çox) toplayanların sayı 101, həm ekspertlərdən, həm də vətəndaşlardan keçid balı toplayan 30, vətəndaş rəyləri 0 olan layihələrin sayı 59-dur. 1- 20 bal arası toplayan layihələrin sayı isə 94-dür. Biz burada maksimum çalışdıq ki, həm ekspertlər, həm də vətəndaşlardan bal toplamış layihələr arasında balanslaşdırmanı təmin edək”.
Sədr maliyyələşən layihələrdə vətəndaş rəyinin nəzərə alınma faizinə toxunaraq söyləyib ki, vətəndaşların qiymətləndirmə balı nəzərə alınaraq maliyyələşdirilən layihələrin sayı 67, ekspertlərin balı nəzərə alınaraq maliyyələşdirilən layihələrin sayı 45 təşkil edib: “Layihələr Şuranın “Qrant müsabiqəsinin keçirilməsi Qaydaları”nın 7 saylı əlavəsinə layihələrin maliyyələşməsi üçün müəyyən tələb olunan meyarlara cavab vermədikdə, vətəndaş qiymətləndirilməsi prosesində səsvermə qaydalarının pozulması halı aşkar edildikdə, layihənin mövzusu müsabiqə istiqamətinə uyğun olmadıqda, layihəni təqdim edən QHT-nin qanunvericiliyə riayət etməməsi və ya həmin QHT-nin Şura qarşısında götürdüyü müqavilə öhdəliyinin yerinə yetirilməməsi haqqında Katibliyin arayışı olduqda onlar maliyyələşdirilməyib”.
Azay Quliyev artıq bu gündən Apellyasiya Komissiyasının fəaliyyətə başladığını da vurğulayıb: “QHT-lər 5 iş günü ərzində apellyasiya şikayəti verə bilərlər. Bizim Apellyasiya Komissiyamız bu şikayətlərə baxış keçirərək yenidən qiymətləndirilmə aparılmasını təmin edəcəklər”.

Paylaş:

Baxılıb: 588 dəfə