Milli Varlığımızın Səsi: Ana Dili

Bakı:

26 °C

65 %

5 m/s

Əlaqə

AZ RU EN

Ana səhifə / YAP xəbərləri / Milli Varlığımızın Səsi: Ana Dili

Milli Varlığımızın Səsi: Ana Dili

29.07.2026 [15:16]

Hər bir xalqın varlığını, milli-mənəvi dəyərlərini və tarixi yaddaşını yaşadan, onu müstəqil millət kimi formalaşdıran ən qüdrətli vasitə onun ana dilidir. Avqust ayının 1-də ölkəmizdə Azərbaycan Əlifbası və Azərbaycan Dili Gününün geniş qeyd olunması müstəqil dövlətçilik tariximizdə sadəcə təqvim hadisəsi deyil, milli mənliyimizə, dilimizin saflığına və zənginliyinə göstərilən ali dövlət qayğısının bariz təcəssümüdür. Tarixin sərt sınaqlarından, sıxışdırmalarından alnıaçıq çıxan Azərbaycan dili bu gün suveren dövlətimizin başlıca rəmzlərindən biri kimi özünün ən parlaq inkişaf dövrünü yaşayır.

Dövlət dilimizin inkişaf yoluna nəzər salarkən aydın görünür ki, bu müqəddəs xəzinənin qorunub saxlanması böyük cəsarət və uzaqgörən siyasi iradə tələb etmişdir. Ötən əsrin mürəkkəb ideoloji şəraitində, milli dillərin sıxışdırıldığı və ana dili məsələsini qabardanların təqiblərə məruz qaldığı bir dövrdə Ümummilli Lider Heydər Əliyev misilsiz qətiyyət nümayiş etdirdi. Bütün süni maneələrə və siyasi təzyiqlərə rəğmən, Ulu Öndər ziyalılarımızı və xalqımızı ana dilinin dövlət dili statusu uğrunda mübarizəyə səfərbər etdi. Məhz onun misilsiz cəsarəti sayəsində Azərbaycan dili hələ sovet dövründə konstitusiya səviyyəsində dövlət dili kimi təsbit olundu. Müstəqillik qazanıldıqdan sonra da ana dilimizin hüquqi bazasının möhkəmləndirilməsi, latın qrafikalı əlifbaya tam keçidin təmin edilməsi və dil gününün təsis olunması müstəqil dil siyasətimizin sarsılmaz təməlini qoydu.

Ümummilli Lider Heydər Əliyev dilimizin mənəvi gücünü, əvəzsiz ləzzətini və bədii zənginliyini hər zaman yüksək qiymətləndirərək bildirirdi: “Özümüzün dilimiz var – Azərbaycan dili və çox da gözəl dilimiz var, çox zəngin dilimiz var, çox belə ləzzətli dilimiz var. Mənim üçün Azərbaycan dili hər şeydən əzizdir. Millətin milliliyini saxlayan onun dilidir.” Ulu Öndərin xüsusilə gənclərə ünvanladığı “Başqa dilləri yaxşı bilin, amma bunlardan yaxşı öz Azərbaycan dilimizi öyrənin. Əgər bunu bilməsən, sən tam azərbaycanlı olmursan” çağırışı bu gün də hər birimiz üçün milli tərbiyə meyarıdır.

Ümummilli Liderin ana dilimizin qorunması istiqamətindəki müdrik siyasi xətti bu gün Prezident İlham Əliyev tərəfindən yeni keyfiyyət müstəvisində inamla davam etdirilir. Dövlət başçısının qərarları ilə latın qrafikasında kütləvi nəşrlərin işıq üzü görməsi, dünya ədəbiyyatı incilərinin dilimizə tərcümə edilməsi, rəqəmsal məkanda Azərbaycan dilinin mövqelərinin gücləndirilməsi və dövlət dilinin normalarına nəzarət mexanizmlərinin təkmilləşdirilməsi bu sahəyə göstərilən diqqətin əyani sübutudur.

Müasir dövrdə qloballaşmanın mənfi təsirləri, yad kəlmələrin dilimizə əsassız axını və kütləvi informasiya vasitələrində müşahidə olunan dil qüsurları fonunda Prezident İlham Əliyevin nümayiş etdirdiyi mövqe hər birimiz üçün fəaliyyət proqramıdır. Dövlət başçısı bu məsələni milli təhlükəsizlik prioritetləri sırasına qaldıraraq bəyan etmişdir: “Azərbaycan dilinin saflığının qorunması hər bir Azərbaycan vətəndaşının işi olmalıdır... Biz xalq kimi, millət kimi öz dilimizi qorumasaq, onda yavaş-yavaş bizim milli kimliyimiz də sarsıla bilər. Azərbaycan dili o qədər zəngindir ki, heç bir xarici kəlməyə ehtiyac yoxdur. Müstəqil dövlətin olmadığı dövrlərdə azərbaycanlıları bir xalq kimi qoruyan, assimilyasiya olunmağa imkan verməyən Azərbaycan mədəniyyəti, Azərbaycan dili olmuşdur.”

Bu gün dünyada 50 milyondan çox soydaşımızın ana dili olan Azərbaycan dili həm də qlobal müstəvidə vahid milli həmrəyliyimizin əsas dayağıdır.

Yekun olaraq deyə bilərik ki, ana dilimiz bizim müqəddəs milli varlığımız, keçmişimizlə gələcəyimiz arasında mənəvi körpümüzdür. Hər birimiz dərk etməliyik ki, Azərbaycan dilinin orijinal quruluşunu, axıcılığını və zəngin söz ehtiyatını qoruyub gələcək nəsillərə ötürmək təkcə dilçilərin və ya ziyalıların deyil, hər bir vətəndaşın müqəddəs borcudur. Xalq şairi Bəxtiyar Vahabzadənin dediyi kimi:

“Ana dilim, səndədir xalqın əzəl tarixi,

Səndədir öz mənliyim, səndədir milli ruhum...”

Dövlətimizin qətiyyətli siyasi iradəsi, Ulu Öndərin zəngin irsi və Prezident İlham Əliyevin ana dilimizə göstərdiyi ali diqqət zəmin yaradır ki, Azərbaycan dili bundan sonra da müstəqil dövlətçiliyimizin, milli birliyimizin və sarsılmaz mənəviyyatımızın əbədi simvolu kimi qürurla səslənəcəkdir.

Zahir Qəhrəmanov

YAP Şirvan şəhər təşkilatının sədri

Paylaş:

Baxılıb: 324 dəfə