Dağ-mədən və metallurgiya sənayesində yeni mərhələ

Bakı:

21 °C

83 %

4 m/s

Əlaqə

AZ RU EN

Ana səhifə / YAP xəbərləri / Dağ-mədən və metallurgiya sənayesində yeni mərhələ

Dağ-mədən və metallurgiya sənayesində yeni mərhələ

24.09.2026 [10:30]

Azərbaycan iqtisadiyyatının şaxələndirilməsi, qeyri-neft sektorunun inkişaf etdirilməsi və ölkənin təbii sərvətlərindən səmərəli istifadə olunması son illərdə həyata keçirilən iqtisadi siyasətin mühüm istiqamətlərindən biridir. Bu baxımdan dağ-mədən və metallurgiya sənayesinin inkişafı ölkənin sənaye potensialının genişləndirilməsi, yeni istehsal sahələrinin yaradılması və ixrac imkanlarının artırılması baxımından xüsusi əhəmiyyət daşıyır.

22 sentyabr 2026-cı ildə Möhtərəm Prezident İlham Əliyev cənablarının sədrliyi ilə “Azərbaycan Respublikasında 2027–2030-cu illərdə dağ-mədən (metal filizləri) və metallurgiya sənayesinin inkişafına dair Dövlət Proqramı”na həsr olunmuş müşavirənin keçirilməsi də bu istiqamətdə qarşıya qoyulan yeni hədəflərin müzakirəsi baxımından mühüm tədbir oldu. Prezident çıxış edərək dağ-mədən və metallurgiya sənayesinin ölkə iqtisadiyyatı üçün perspektivli sahələrdən biri olduğunu vurğuladı və Dövlət Proqramının əsas istiqamətləri barədə fikirlərini bildirdi.

Möhtərəm Prezident cənab İlham Əliyev çıxışında xüsusilə dağ-mədən sənayesində yalnız filiz hasilatının artırılmasının deyil, filizin emalından son məhsulun istehsalına qədər tam dəyər zəncirinin ölkə daxilində formalaşdırılmasının vacibliyini qeyd etdi. Bu yanaşma xammalın daha yüksək əlavə dəyərə malik məhsula çevrilməsinə, sənaye müəssisələrinin inkişafına və ölkənin ixrac potensialının genişlənməsinə şərait yarada bilər.

Dövlət Proqramının əsas istiqamətlərindən biri mineral xammal bazasının genişləndirilməsi və mövcud yataqların iqtisadi dövriyyəyə daha fəal cəlb edilməsidir. “Dəmirli”, “Söyüdlü”, “Filizçay”, “Daşkəsən”, “Ortakənd” və digər yataqlar üzrə layihələrin həyata keçirilməsi nəzərdə tutulur. Eyni zamanda Qarabağ və Şərqi Zəngəzur ərazilərində geoloji kəşfiyyat işlərinin genişləndirilməsi də proqramın gələcək imkanları sırasında göstərilir.

Proqram çərçivəsində zənginləşdirmə müəssisələrinin, pelet və briketlənmiş dəmir istehsalı sahələrinin, həmçinin yüksək əlavə dəyərə malik polad və alüminium məhsullarının istehsalının inkişaf etdirilməsi nəzərdə tutulur. Beləliklə, məqsəd təbii ehtiyatların yalnız xammal formasında deyil, daha yüksək emal mərhələlərindən keçərək hazır və yarımfabrikat məhsullar şəklində daxili və xarici bazarlara çıxarılmasıdır.

Müşavirədə təqdim edilən məlumatlara əsasən, 2027–2030-cu illərdə Dövlət Proqramının icrası üçün ümumilikdə 5,3 milyard manat investisiya tələb olunur. Bunun 1,1 milyard manatının dövlət büdcəsi, 2,2 milyard manatının dövlət müəssisələrinin vəsaitləri, 2 milyard manatının isə özəl vəsaitlər hesabına formalaşdırılması nəzərdə tutulur. Proqramın nəticəsində növbəti dörd il ərzində sektorun əlavə dəyərinin və illik ixrac potensialının 2,6 dəfə artırılması hədəflənir.

Möhtərəm Prezident cənab İlham Əliyev çıxışında sənaye layihələrinin həyata keçirilməsi ilə yanaşı, ekoloji məsələlərin də xüsusi əhəmiyyət daşıdığını bildirdi. Dağ-mədən fəaliyyətinin təbiətə təsirinin nəzərə alınması, ekoloji ekspertizanın aparılması və mövcud ekoloji normalara əməl olunması Dövlət Proqramının mühüm prinsipləri kimi diqqətə çatdırıldı. Bu yanaşma iqtisadi inkişafla ətraf mühitin qorunması arasında tarazlığın təmin edilməsini nəzərdə tutur.

Dövlət Proqramının icrasında “AzerGold”un fəaliyyəti də xüsusi yer tutur. Şirkətin həyata keçirəcəyi strateji layihələr sırasında “Söyüdlü” qızıl yatağının işlənməsi, “Daşkəsən” dəmir filizi layihəsi və “Filizçay” yatağının istismara hazırlanması kimi istiqamətlər qeyd olunub. “Daşkəsən” layihəsi çərçivəsində illik 2 milyon ton isti briketləşdirilmiş dəmir istehsalı gücünün yaradılması nəzərdə tutulur. Bu isə ölkənin qara metallurgiya sahəsində yeni istehsal imkanlarının formalaşmasına xidmət edə bilər.

Möhtərəm Prezident cənab İlham Əliyevin rəhbərliyi ilə həyata keçirilən uğurlu və məqsədyönlü iqtisadi siyasətin mühüm istiqamətlərindən biri Azərbaycanın təbii və sənaye potensialından daha səmərəli istifadə etməklə dayanıqlı iqtisadi artımın təmin edilməsidir. Dağ-mədən və metallurgiya sənayesinin inkişafına dair yeni Dövlət Proqramı da məhz bu strateji xəttin davamı kimi mühüm əhəmiyyət daşıyır. Qarşıdakı illərdə nəzərdə tutulan layihələrin ardıcıl şəkildə həyata keçirilməsi Azərbaycanın sənaye potensialının daha da güclənməsinə, yeni istehsal sahələrinin və iş yerlərinin yaradılmasına, ixrac imkanlarının genişlənməsinə və ölkə iqtisadiyyatının şaxələndirilməsinə mühüm töhfələr verə bilər.

Bu baxımdan, 2027–2030-cu illəri əhatə edən Dövlət Proqramı yalnız ayrı-ayrı dağ-mədən və metallurgiya layihələrinin həyata keçirilməsini deyil, Azərbaycanın gələcək sənaye inkişafının yeni mərhələsinin formalaşdırılmasını hədəfləyir. Möhtərəm Prezident cənab İlham Əliyevin müəyyən etdiyi strateji məqsədlər və qarşıya qoyduğu konkret vəzifələr əsasında bu sahədə yaradılacaq yeni istehsal imkanları ölkəmizin iqtisadi qüdrətinin daha da artırılmasına, milli sənayenin rəqabət qabiliyyətinin yüksəldilməsinə və Azərbaycanın gələcəkdə regional və beynəlxalq sənaye-iqtisadi əməkdaşlıqda mövqelərinin daha da möhkəmlənməsinə xidmət edəcəkdir.

Paşa Hadıyev
YAP Qazax rayon təşkilatının sədr müavini

Paylaş:

Baxılıb: 163 dəfə