Azərbaycan xalqının tarixində elə günlər var ki, həmin günlər təkcə təqvimdə əlamətdar tarix kimi deyil, milli yaddaşımızda qürur, birlik və qəhrəmanlıq rəmzi kimi yaşayır. 8 Noyabr – Zəfər Günü də məhz belə möhtəşəm tarixlərdəndir. Bu gün xalqımızın illərlə qəlbində yaşatdığı torpaq həsrətinin sona çatmasının, dövlətimizin gücünün, ordumuzun rəşadətinin və milli birliyimizin təntənəsidir.

2020-ci il sentyabrın 27-də başlayan Vətən müharibəsi Azərbaycan tarixində yeni bir mərhələnin başlanğıcı oldu. 44 gün davam edən müharibə zamanı Azərbaycan Ordusu Ali Baş Komandanın rəhbərliyi ilə torpaqlarımızın azadlığı uğrunda misilsiz qəhrəmanlıq göstərdi. Noyabrın 8-də Şuşanın azad edilməsi müharibənin taleyində həlledici dönüş yaratdı və xalqımızın Zəfər sevincini daha da yüksəltdi. Şuşanın azad olunması hərbi-strateji əhəmiyyəti ilə yanaşı, Azərbaycan mədəniyyətinin və milli ruhunun rəmzi şəhərinin yenidən öz sahibinə qovuşması idi.

Bu tarixi Qələbənin siyasi və mənəvi təməlləri Ulu Öndər Heydər Əliyevin müəyyən etdiyi dövlətçilik strategiyası ilə sıx bağlıdır. Heydər Əliyev müstəqil Azərbaycanın möhkəm dövlət kimi formalaşması, milli ordunun qurulması, ölkənin müdafiə qüdrətinin artırılması və xalqımızın milli birliyinin qorunması istiqamətində müstəsna xidmətlər göstərmişdir. Onun uzaqgörən siyasəti nəticəsində dövlətçilik ənənələri möhkəmlənmiş, müasir Azərbaycan Ordusunun yaradılması və inkişafı üçün mühüm zəmin formalaşmışdır. Ulu Öndərin “ordu quruculuğu”na verdiyi önəm və Vətənə sədaqət ideyası sonrakı illərdə də dövlət siyasətinin əsas istiqamətlərindən biri olmuşdur.

Ulu Öndərin siyasi kursunu uğurla davam etdirən Prezident, Müzəffər Ali Baş Komandan İlham Əliyevin rəhbərliyi ilə Azərbaycan dövlətinin iqtisadi, siyasi və hərbi potensialı davamlı şəkildə gücləndirildi. Ordunun maddi-texniki bazası yeniləndi, müasir silah və texnika alındı, hərbi qulluqçuların peşəkarlığının artırılmasına xüsusi diqqət yetirildi. Eyni zamanda, beynəlxalq müstəvidə Azərbaycanın haqlı mövqeyi ardıcıl və qətiyyətlə müdafiə olundu. 2020-ci ildə xalq–Prezident–ordu birliyi Zəfərin başlıca amillərindən birinə çevrildi.

Vətən müharibəsində Azərbaycan əsgər və zabitləri böyük cəsarət, peşəkarlıq, döyüş əzmi və fədakarlıq nümayiş etdirdilər. Çətin relyef və mürəkkəb döyüş şəraitində aparılan əməliyyatlar ordumuzun yüksək hazırlığını, müasir hərb sənətinə yiyələndiyini və Vətənə bağlılığını bütün dünyaya göstərdi. Şuşanın sıldırım qayalıqlardan keçərək azad edilməsi Azərbaycan hərb tarixinin ən parlaq qəhrəmanlıq nümunələrindən biri kimi yadda qaldı. Bu Zəfər şəhidlərimizin canı, qazilərimizin sağlamlığı, əsgər və zabitlərimizin əzmi bahasına qazanıldı.

Zəfərimizin ən böyük qəhrəmanları Vətən uğrunda canından keçən şəhidlərimizdir. Onların əziz xatirəsi xalqımızın qəlbində daim yaşayacaq. Qazilərimizin fədakarlığı, müharibə iştirakçılarının xidmətləri və arxa cəbhədə çalışan insanların əməyi də bu böyük Qələbənin ayrılmaz hissəsidir. Şəhid ailələrinə, qazilərə və müharibə veteranlarına göstərilən diqqət və qayğı dövlətimizin və cəmiyyətimizin mənəvi borcudur.

8 Noyabr – Zəfər Günü bizə bir daha sübut edir ki, milli birlik, güclü dövlətçilik, qətiyyətli rəhbərlik və qüdrətli ordu hər bir xalqın ən böyük dayağıdır. Bu Qələbə gələcək nəsillərə Vətən sevgisi, torpağa bağlılıq, milli həmrəylik və müstəqilliyimizi qorumaq məsuliyyəti aşılayır. Şuşanın azadlığı ilə tariximizə yazılan Zəfər dastanı Azərbaycan xalqının iradəsinin və yenilməz ruhunun təntənəsidir.

Bu əlamətdar gündə Ulu Öndər Heydər Əliyevin əziz xatirəsini ehtiramla yad edir, Müzəffər Ali Baş Komandan İlham Əliyevin rəhbərliyini, rəşadətli Azərbaycan Ordusunun qəhrəmanlığını və xalqımızın birliyini xüsusi minnətdarlıqla qeyd edirik. Vətən uğrunda canından keçən bütün şəhidlərimizə Allahdan rəhmət, qazilərimizə şəfa, veteranlarımıza möhkəm cansağlığı arzulayırıq. Zəfərimiz əbədi, Azərbaycanımız daim müstəqil və qüdrətli olsun!

Ayaz Novruzov

YAP Culfa rayon Camaldın kənd ərazipartiya təşkilatının sədri