“İki sahil” qəzeti redaksiyasının kollektivinə

Bakı:

21 °C

83 %

4 m/s

Əlaqə

AZ RU EN

Ana səhifə / Sosial / “İki sahil” qəzeti redaksiyasının kollektivinə

“İki sahil” qəzeti redaksiyasının kollektivinə

10.07.2021 [09:58]

Bu gün çağdaş Azərbaycan mətbuatının inkişafında özünəməxsus yeri və rolu olan “İki sahil” qəzetinin ilk sayının işıq üzü görməsindən 30 il keçir. Qəzet bu müddət ərzində zəngin və şərəfli inkişaf yolu keçərək üzərinə düşən vəzifələri layiqincə yerinə yetirib, milli maraqların müdafiəsinə, sağlam ictimai rəyin formalaşmasına, tarixi ənənələrimizin və milli-mənəvi dəyərlərimizin qorunmasına mühüm töhfələr verib.

Xüsusi qeyd etmək lazımdır ki, müstəqilliyin ilk illərində ölkəmizdə xaos, anarxiya, böhran və tənəzzülün hökm sürdüyü bir şəraitdə “İki sahil” mətbu orqan kimi tarixi missiya yerinə yetirib, milli maraqların ətrafında sıx birləşmiş vətənpərvər şəxsiyyətlərin real tribunasına çevrilib. Ən əsası, “İki sahil” Azərbaycan xalqının ölkəmizin xilası və qurtuluşu naminə ulu öndər Heydər Əliyevə çağırışını, məşhur “91-lər”in ölkəmizin ictimai-siyasi həyatında mühüm rol oynayan Yeni Azərbaycan Partiyasının yaradılması ilə bağlı Ümummilli Liderə müraciətini və Ulu Öndərin bu müraciətə cavabını öz səhifələrində dərc edən ilk mətbu nəşrlərdən biri olub.

Dövlətçiliyə xidmət etməyi fəaliyyətinin əsas prinsipi kimi müəyyənləşdirən bu mətbu orqan ulu öndər Heydər Əliyevin milli maraqlara əsaslanan inkişaf siyasətinin, Ümummilli Liderimizin zəngin ideyalarının və əbədiyaşar irsinin fəal təbliğatçısı olub. “İki sahil”, eyni zamanda, görkəmli dövlət xadimi Heydər Əliyevin qurucusu olduğu Yeni Azərbaycan Partiyasının fəaliyyətini geniş işıqlandırmaqla Azərbaycan dövlətçiliyinə xidmət vəzifəsini uğurla yerinə yetirib. Təsadüfi deyil ki, ulu öndər Heydər Əliyev Yeni Azərbaycan Partiyasının yaradılmasının 2-ci ildönümü münasibətilə keçirilən ümumrespublika müşavirəsində “İki sahil” qəzetinin fəaliyyətini və rolunu yüksək dəyərləndirib.

Bu gün müasir nəşr nümunəsi olan bu mətbu orqan tarixi missiyasından irəli gələn məqsədyönlü fəaliyyəti çərçivəsində Prezident İlham Əliyevin milli maraqlara əsaslanan siyasətinin, ümumxalq partiyası olan YAP-ın fəaliyyətinin, azərbaycançılıq ideologiyasının təbliğində, Azərbaycan həqiqətlərinin ölkə və dünya ictimaiyyətinə çatdırılmasında çox mühüm rol oynayır. Jurnalistikanın təməl prinsiplərinə hər zaman hörmətlə və sədaqətlə yanaşan, cəmiyyətin informasiya tələbatının ödənilməsi ilə əlaqədar insanlara doğru, dəqiq və operativ xəbər çatdıran “İki sahil” qəzeti 44 günlük Vətən müharibəsi dövründə də Azərbaycan reallıqlarını geniş işıqlandırmaq və erməni yalanlarını ifşa etmək istiqamətində öz üzərinə düşən vəzifələri layiqincə yerinə yetirib.

Bir sözlə, “İki sahil” qəzetinin səhifələrində son 30 ildə müstəqillik dövrümüzün tarixi salnaməsi əks olunub. Əminliklə söyləmək olar ki, milli mətbuatımızın nümunəvi nəşrlərindən olan və müasir çağırışlara uyğun məqsədyönlü fəaliyyəti ilə fərqlənən qəzet bundan sonra da Azərbaycanın tarixi nailiyyətlərinin müjdəçisi olacaq, informasiya platformasında ümummilli mənafenin qorunması işində aktiv rol oynayacaq.

“İki sahil” qəzeti redaksiyasının bütün kollektivini 30 illik yubiley münasibətilə səmimi qəlbdən təbrik edir, yeni yaradıcılıq uğurları və davamlı müvəffəqiyyətlər arzu edirik.

Yeni Azərbaycan Partiyasının Mərkəzi Aparatı

09 iyul 2021-ci il

Paylaş:

Baxılıb: 809 dəfə