Ermənistanda bütün sahələr iflic vəziyyətdədir

Bakı:

26 °C

73 %

4 m/s

Əlaqə

AZ RU EN

Ana səhifə / Dünya / Ermənistanda bütün sahələr iflic vəziyyətdədir

Ermənistanda bütün sahələr iflic vəziyyətdədir

14.01.2021 [09:20]

Ekspertlər məğlub ölkənin müharibədən sonrakı durumunu “faciə” kimi qiymətləndirirlər
Məlum olduğu kimi, 44 günlük müharibədə Azərbaycanın qarşısında məğlubiyyətə düçar olaraq acınacaqlı duruma düşən Ermənistanda bütün sahələrdə böhran vəziyyəti hökm sürür. Yerli mətbuat yazır ki, müharibədən sonra Ermənistanda yaranan gərgin vəziyyət davam edir. Belə ki, ölkənin siyasi, iqtisadi, sosial, humanitar həyatı iflic vəziyyətdədir. Eyni zamanda, ölkədə kütləvi etiraz aksiyaları səngimək bilmir.
Qeyd edək ki, baş naziri istefa verməyə çağıran opponentləri Nikol Paşinyanı Moskva səfərinə görə də tənqid atəşinə tuturlar. “Panorama.am” yazır ki, keçmiş səfir Mikael Minasyan baş naziri heç olmasa, ömründə bir dəfə cəsarətli addım atmağa çağırıb: “Paşinyan belə yüksəksəviyyəli danışıqlara nə intellektual, nə də psixoloji cəhətdən hazır olub. Yalnız axmaq adam danışıqlardan bir gün əvvəl nə istədiyini və hansı nəticələr gözlədiyini “Facebook”da yaza bilər. Əslində, o, Moskvaya ilk dəfə gedən və hündürmərtəbəli binalara baxanda papağı düşən bir çoban kimi özünü aparıb. Zəif iradəli Nikol dəhşətli dərəcədə depressiyaya düşüb, bu, prinsipcə başadüşüləndir. Nəhayət, onun özü başa düşməlidir ki, bu vəzifə onun yeri deyil. Nikol, heç olmasa, bir cəsarətli addım at! “Mənim addımım”ı topla, fikrini de, çıx get!”.
Yeri gəlmişkən, qeyd edək ki, Rusiya mediası da Moskva görüşü zamanı Ermənistan baş nazirinin durumunu, jestlərini, qeyri-adekvat davranışını geniş müzakirə etməkdədir.
Bu arada, Paşinyan və komandasına qarşı yeni təşəbbüs qrupu ortaya çıxıb. “Sputnik-Ermənistan” yazır ki, erməni ziyalıları “Vətənin səsi” təşəbbüs qrupunu yaradıblar. Təşəbbüs qrupunun üzvü, kulturoloq Samvel Aroyan deyib ki, onların məqsədi Paşinyanın komandasını və baş nazirin özünü hakimiyyətdən uzaqlaşdırmaqdır. Öz növbəsində, təşəbbüs qrupunun digər bir üzvü, ədəbiyyatşünas Serj Srapionyan yeni hərəkatın 17 müxalif siyasi qüvvənin tələbini dəstəklədiyini bildirib: “Bəzi insanlar Paşinyan və komandasının hakimiyyətdə qalacağı təqdirdə gözlənilən təhdidlərin miqyasını təsəvvür etmirlər”.
Onu sözlərinə görə, 1988-ci ildə baş verən zəlzələ erməniləri bu müharibə qədər sındırmamışdı: “Çünki o dövrdə dağıntılar altında qalan insan Qorbaçova “Qarabağ məsələsi nə oldu?” sualını verirdi...”.
“News.am”ın yazdığına görə, Moskva görüşü və birgə bəyanata münasibət bildirən “Vətənin xilası naminə hərəkat”ın baş nazir postuna vahid namizədi Vazgen Manukyan isə deyib ki, N.Paşinyan ölkənin maraqlarını müdafiə edə bilmir: “Bu, Ermənistan üçün növbəti biabırçı məğlubiyyətdir. Ermənistan Azərbaycanın qərb bölgələri və Naxçıvanla nəqliyyat əlaqələrinin təhlükəsizliyinə zəmanət verir. 11 yanvar tarixli üçtərəfli görüş və birgə bəyanat bir daha təsdiqlədi ki, N.Paşinyan Ermənistanın və erməni xalqının maraqlarını müdafiə edə bilmir. Məğlubiyyətin simvolu getməlidir”.
Beləliklə, ağır sosial-iqtisadi böhran keçirən məğlub Ermənistanda daxili siyasi gərginlik də davam edir. Ümumiyyətlə, məğlub ölkədə xaos durumunun mövcud olduğu bütün səviyyələrdə etiraf edilir. Bu səbəbdən ekspertlər Ermənistanda müharibədən sonrakı vəziyyəti “faciə” kimi qiymətləndirirlər.
Qaşqay ZİYƏDDİNOĞLU

Paylaş:

Baxılıb: 874 dəfə