Çində karantin tədbirləri bir qədər yumşaldılıb

Bakı:

13 °C

76 %

4 m/s

Əlaqə

AZ RU EN

Ana səhifə / Dünya / Çində karantin tədbirləri bir qədər yumşaldılıb

Çində karantin tədbirləri bir qədər yumşaldılıb

01.12.2022 [15:00]

COVID-19 pandemiyasının ən ağır dövrünü yaşayan Çində tətbiq olunan karantin tədbirləri bir qədər yumşaldılıb.

AZƏRTAC xəbər verir ki, bir neçə gün ard-arda sutkalıq yoluxma sayında antirekordlar qeydə alındıqdan sonra son 2-3 gündə yoluxma sayı nisbətən azalıb. Səlahiyyətli qurumlar COVID-19 virusu ilə sərt mübarizə tədbirlərinin insanların gündəlik həyatına və iqtisadiyyata mənfi təsirlərini azaltmaq üçün karantin qaydalarını nisbətən yumşaltmağa qərar verib. Belə ki, hazırki dalğada ən ağır epidemik vəziyyətin müşahidə olunduğu şəhərlərdən olan Quancounun bir neçə rayonunda qapanmalar ləğv olunub. Yoluxmaların qeydə alındığı binaların sakinləri istisna olmaqla, əhalinin evlərini tərk etməsinə olan qadağa aradan qaldırılıb. Qapanma məqsədilə quraşdırılmış metal hasarlar sökülüb. Yoluxanlarla yaxın təmasda olanların imkan olduğu halda ev şəraitində təcrid olunmasına icazə verilib. Qapanmaların ləğv olunmasından sonra şəhərin Çonhua rayonunda orta məktəblərdə əyani dərslər bərpa olunub. Digər rayonlarda isə dərslərin bərpasına hazırlıq gedir.

Çinin xarici ticarət qapısı hesab olunan Quancouda metronun və tramvayların fəaliyyəti də bərpa olunub. Bununla belə, sakinlərə kütləvi toplaşmamaq da daxil olmaqla virusla fərdi mübarizə qaydalarına əməl etmək tövsiyə olunub.

Quancou şəhərinin səhiyyə komitəsinin direktor müavini Can İ bildirib ki, yoluxmalar aşkarlanan yaşayış binalarında və iş yerlərində qapanma dərhal tətbiq olunduğu kimi, onun aradan qaldırılması da mümkün qədər tez olacaq.

Çendu şəhərində isə məhəllələrə daxil olarkən test cavabının tələb edilməsi qaydası ləğv olunub. Cencou şəhərində marketlər, kinoteatrlar, taksi və metropolitenin fəaliyyəti bərpa edilib. Yüksək riskli zonalar istisna olmaqla digər yaşayış məhəllələrində adi həyat bərpa olunub. Şiciacuan şəhərində isə 5 dəfə keçirilmiş kütləvi test prosesinin nəticəsində yoluxma zəncirinin qırılması müəyyən edildikdən sonra həyatın mərhələli şəkildə normallaşmasına start verilib.

Pandemiyanın ən ağır dövrünü yaşayan paytaxt Pekində də karantin tədbirləri cüzi yumşaldılıb. Sosial fəaliyyəti olmayanların, o cümlədən distant formada təhsil alan və işləyənlərin gündəlik test vermək məcburiyyəti aradan qaldırılıb. Yoluxma aşkarlanan marketlərin bundan sonra yalnız 1 gün bağlı qalmasına qərar verilib. Şəhər hökuməti yüksək riskli zonalardakı yaşayış binalarının hasarlanmasını qadağan edib. Bununla belə, paytaxtda bütün əyləncə, istirahət və xidmət obyektləri bağlıdır, kafe və restoranlarda yerində xidmətlər göstərilmir, təhsil ocaqlarında dərslər yalnız distant formada təşkil olunur.

Çinin COVID-19 virusu ilə mübarizəsinə rəhbərlik edən Baş nazirin müavini xanım Sun Çunlan bildirib ki, “omikron” ştamının daha az patogenik olması, əhalinin böyük hissəsinin peyvənd olunması, Çinin virusla mübarizədə topladığı təcrübə əsas götürülərək, ölkədə COVID-19 pandemiyası ilə mübarizə yeni mərhələyə qədəm qoyub. O, səlahiyyətli qurumları virusla mübarizə tədbirlərini optimallaşdırmağa, yaşlı insanların vaksinasiyasını sürətləndirməyə çağırıb.

Paylaş:

Baxılıb: 673 dəfə