Azərbaycan-Gürcüstan ikitərəfli münasibətləri çox möhkəm və proqnozlaşdırıla biləndir

Bakı:

16 °C

55 %

9 m/s

Əlaqə

AZ RU EN

Ana səhifə / Gündəm / Azərbaycan-Gürcüstan ikitərəfli münasibətləri çox möhkəm və proqnozlaşdırıla biləndir

Azərbaycan-Gürcüstan ikitərəfli münasibətləri çox möhkəm və proqnozlaşdırıla biləndir

22.05.2009 [10:03]

Xəbər verdiyimiz kimi, mayın 20-də “Gülüstan” sarayında Azərbaycan Respublikasının Prezidenti İlham Əliyevin adından Gürcüstan Prezidenti Mixeil Saakaşvilinin şərəfinə rəsmi ziyafət verilib. Dövlət başçıları ziyafətdə nitq söyləyiblər.
Azərbaycan Prezidenti İlham Əliyev Gürcüstan dövlətinin başçısını və nümayəndə heyətini salamlayaraq söyləyib ki, Azərbaycan və Gürcüstan arasında münasibətlərin tarixi çox qədimdir: “Xalqlarımız həmişə yanaşı, qonşuluqda, sülh və mehribanlıq şəraitində yaşamış, həmişə bir-birinə kömək etmişlər. Bu gün iki müstəqil dövlətin inkişafına, əməkdaşlığa və həm təhlükəsizliyimizi, həm də iqtisadi firavanlığımızı təmin edən, qlobal dünya prosesləri üçün böyük əhəmiyyətə malik olan layihələrdə iştirakına kömək edən münasibətlərin möhkəm təməli budur”.
Dövlət başçısı İlham Əliyev diqqətə çatıdırıb ki, Azərbaycan-Gürcüstanın ikitərəfli münasibətləri çox möhkəm və proqnozlaşdırıla biləndir: “ölkələrimizin fəal iştirakı ilə regionda çox iri infrastruktur layihələri həyata keçirilmişdir, indi onlar artıq qlobal miqyaslı gələcək layihələr üçün bazadır. Bu, ilk növbədə, energetikaya aiddir. Bu gün biz həmin sahədə əməkdaşlığın miqyasını daha da genişləndirmək üçün əlavə konkret addımları müzakirə etdik. Neft və qaz sahəsi ilə yanaşı, elektroenergetika sahəsində əməkdaşlıq da böyük maraq doğurur. Burada çox böyük potensial mövcuddur və bizim imkanlarımız bir-birini tamamlayır. Biz elektrik enerji dəhlizinin mövcud neft-qaz dəhlizlərini tamamlaması üçün ciddi səy göstərəcəyik. Biz ölkələrimizin nəqliyyat təhlükəsizliyinin təmin edilməsi prosesində fəal iştirak edirik. Gürcüstan və Azərbaycan Qərb ilə Şərq arasında nəqliyyat kommunikasiyalarının mühüm hissəsidir. Bu, təkcə coğrafiya deyil, həm də infrastruktur sahəsində qazanılmış nailiyyətlərdir. Başqa sözlə, biz iqtisadi sahədə nəzərdə tutduqlarımızın hamısını yerinə yetiririk”.
“Gürcüstan dinamik inkişaf edən, həm siyasi, həm də iqtisadi islahatların fəal həyata keçirildiyi islahatçı ölkə kimi investorlar üçün çox böyük maraq doğurur” - deyən Prezident İlham Əliyev bildirib ki, Azərbaycan şirkətləri, ilk növbədə, ARDNŞ Gürcüstanın çox mühüm investorlarından biridir: “ARDNŞ-in sərmayələri artıq bu gün yüz milyonlarla ölçülür, gələcəkdə isə yəqin ki, milyardlarla ölçüləcəkdir. Bunlar həm yanacaqdoldurma stansiyaları şəbəkəsi, həm neft məhsulları satışı, həm Gürcüstanın qazlaşdırılması, həm də təbii qazla təmin edilməsidir. Biz Gürcüstanın enerji təhlükəsizliyini tam təmin etmək və qış dövründə qaz ehtiyatlarından daha səmərəli istifadə etmək üçün gələcəkdə qaz anbarları tikilməsi məsələlərini müzakirə etdik. Bununla da, gələcək layihələr üçün artıq bu gün baza olan tamamilə yeni regional şərait yaranır”.
Prezident İlham Əliyev söyləyib ki, Gürcüstan və Azərbaycan hərəsi öz yolu ilə - inkişaf, tərəqqi yolu ilə gedən iki qonşu, qardaş və müstəqil ölkələrdir: “Bizim nəzərdə tutduqlarımızı tam həcmdə təmin etmək üçün, əlbəttə, regionda sülh olmalıdır. Fikrimcə, bu, belə də olacaqdır. Biz buna çalışırıq və fikrimcə, buna nail olacağıq”.
Gürcüstan Prezidenti Mixeil Saakaşvili Azərbaycan dövlətinin başçısına müraciətlə deyib: “Əgər Azərbaycan bizim arxamızda dayanmasaydı, bilmirəm biz indi harada olardıq və ümumiyyətlə mövcud olardıqmı?”.
Gürcüstan Prezidenti Azərbaycanın müstəqilliyinin möhkəmləndirilməsində ulu öndər Heydər Əliyevin siyasi müdrikliyinin və Prezident İlham Əliyevin cəsarətli addımlarının həlledici rolundan danışıb. O, Azərbaycan Prezidenti İlham Əliyevin təkcə region üçün deyil, bütövlükdə dünya üçün, Avropa üçün çox böyük siyasi xadim olduğunu vurğulayıb. M.Saakaşvili qeyd edib ki, qonşu dövlət kimi Azərbaycan cətin anlarda Gürcüstana işıq və qaz verib. Gürcü xalqı bunu heç zaman unutmayacaq. Gürcüstanın dövlət başçısı deyib ki, bizi bağlayan tellər təkcə neft kəməri, elektrik xətləri deyil, insanlar arasındakı əlaqələrdir. Nitqinin sonunda Mixeil Saakaşvili Azərbaycan xalqına və Azərbaycanın dövlət başçısına ən xoş arzularını çatdırıb.

Paylaş:

Baxılıb: 1317 dəfə