Xocavəndli məcburi köçkünlər “Bakı-2015” məşəl estafetinin unudulmaz sevincini yaşadılar

Bakı:

7 °C

93 %

5 m/s

Əlaqə

AZ RU EN

Ana səhifə / İdman / Xocavəndli məcburi köçkünlər “Bakı-2015” məşəl estafetinin unudulmaz sevincini yaşadılar

Xocavəndli məcburi köçkünlər “Bakı-2015” məşəl estafetinin unudulmaz sevincini yaşadılar

13.05.2015 [10:23]

Mayın 9-da xocavəndli məcburi köçkünlərin məskunlaşdıqları Beyləqan rayonu ərazisindəki Xocavənd qəsəbəsində bayram əhval-ruhiyyəsi hökm sürürdü. Minlərlə məcburi köçkün əllərində gül-çiçək və bayraqlar “Bakı-2015” birinci Avropa Oyunlarının məşəlini qarşılamaq, məşəl estafetinin sevincini şəxsən yaşamaq üçün qəsəbənin küçələrinə axışırdı.
AZƏRTAC xəbər verir ki, birinci Avropa Oyunlarının məşəli günün ikinci yarısında 320 ailəlik qəsəbədə böyük coşqu və alqış sədaları ilə qarşılanıb. Alov estafetini Xocavənd rayonundan olan məşəlçi - sambo, döyüş sambosu, əlbəyaxa döyüş və jiu-jitsu üzrə dünya çempionu Bəxtiyar Abbasov qəbul edib. Sonra 3,2 kilometr məsafədə məşəl yürüşü başlanıb. On nəfər idmançı məşəli bir-birinə ötürərək qəsəbədəki Dövlət Bayrağı meydanına gəlib. Yol boyu düzülən xocavəndlilər estafet iştirakçılarını hərarətlə qarşılayıblar.
Alov estafetinin sonuncu iştirakçısı - qarışıq döyüş növləri və döyüş sambosu üzrə dünya çempionu Şəhriyar Abbasov məşəli səhnəyə qaldırıb. Minlərlə xocavəndlinin alqış sədaları göyə ucalıb. Səmaya sülh göyərçinləri və şarlar buraxılıb. Məşəlin alovu ilə yandırılan çırağı Salakətin kənd tam orta məktəbinin şagirdi Aytac Rüstəmli rayon ictimaiyyətinə təqdim edib. Çıraq yarışların sonuna qədər “Bakı 2015”-in rəmzi kimi rayonda saxlanılacaq. Mərasimdə Atəşgah məbədində birinci Avropa Oyunları məşəlinin alovlandırılması mərasiminin əks olunduğu videoçarx nümayiş etdirilib.
Salakətin kənd tam orta məktəbin müəllimi Telli Alıyeva təəssüratlarını AZƏRTAC-ın müxbiri ilə bölüşərək deyib: “Bu gün birinci Avropa Oyunlarının məşəli Xocavənd qəsəbəsində alovlanmağa başladı. Bu, 20 ildən çox köçkün həyatı yaşayan xocavəndli məcburi köçkünlər üçün böyük hadisədir. Məşəlin qəsəbəmizə gəlməsi ilə xocavəndlilərin ürəyində heç vaxt sönməyən ümid məşəli daha da alovlandı. İnanırıq ki, hazırda erməni işğalı altında olan ata-baba torpaqlarımız azad ediləcək, belə möhtəşəm mərasimləri orada da keçirə biləcəyik”.
Qəsəbə sakini Məhərrəm Nəsirov isə fikirlərini belə ifadə edib: “80 yaşım var. Yaşadığım illər ərzində çox hadisələrin şahidi olmuşam. Ancaq bu gün yaşadığım sevinc və keçirdiyim qürur hissi bambaşqadır. İnanıram ki, irəlidə xalqımızı hələ çox-çox fərəh doğuracaq günlər gözləyir. Avropa Oyunlarının məşəlinin qəsəbəmizə də gəlməsi biz köçkünləri çox sevindirdi. Bu anı bizə bəxş etdiyinə görə Prezident İlham Əliyevə minnətdarıq”.
Alqışların ucaldığı və məşəlin şəfəq saçdığı meydan insanların sabaha olan dərin inamından xəbər verirdi. Çox keçməz ki, bu gün Xocavənd qəsəbəsində şölələnən bu məşəl Ali Baş Komandanın rəhbərliyi ilə işğaldan azad ediləcək yurd yerlərində də alovlanar.

Paylaş:

Baxılıb: 1744 dəfə