“Bakı-2015”-in məşəl estafeti qədim Beyləqanda

Bakı:

7 °C

93 %

5 m/s

Əlaqə

AZ RU EN

Ana səhifə / İdman / “Bakı-2015”-in məşəl estafeti qədim Beyləqanda

“Bakı-2015”-in məşəl estafeti qədim Beyləqanda

13.05.2015 [10:26]

Azərbaycan Prezidenti İlham Əliyevin birinci Avropa Oyunlarının Bakıdakı Atəşgah məbədində alovlandırdığı məşəl respublikamızın bölgələrini dolaşaraq mayın 9-da qədim Beyləqan şəhərinə gətirilib.
AZƏRTAC xəbər verir ki, şəhərin qərb girişində məşəlin təntənəli qarşılanma mərasimi olub. Minlərlə beyləqanlının alqış sədaları altında Uşaq-Gənclər İdman Məktəbinin məşqçi müəllimi Əli Sarıyev birinci Avropa Oyunlarının rəmzi qapısında məşəli qəbul etdikdən sonra estafet rayon mərkəzinə doğru istiqamət götürüb. On məşəlçi 3,1 kilometr məsafədə yürüşə başlayıb. Onlar şəhərin mərkəzi küçələrindən və Heydər Əliyev prospektindən keçərək Ulu öndərin adını daşıyan parka gəliblər. “Məhsul” Kənd Könüllü İdman Cəmiyyətinin sərbəst güləş üzrə məşqçi müəllimi Nofəl Hüseynov məşəli burada qurulmuş səhnəyə qaldıraraq kasanı və çırağı alovlandırıb. Birinci Avropa Oyunlarının sonuna qədər şəhərdə yanacaq çırağı isə 1 nömrəli tam orta məktəbin şagirdi Fatimə Kazımlı rayon ictimaiyyətinə təqdim edib.
Mərasimdə aprelin 26-da birinci Avropa Oyunlarının məşəlinin Bakıda Atəşgah məbədində alovlandırılması mərasiminin əks olunduğu videoçarx nümayiş etdirilib.
Məşəl Heydər Əliyev Parkına gətirilərkən tədbir iştirakçıları daha bir əlamətdar hadisənin - yeni ailə quran iki gəncin nikah mərasiminin də şahidi olublar. Rayonun Birinci Aşıqlı kənd sakinləri Qadir Paşayevlə Əsmayə Paşayevanın nikahı məhz bu unudulmaz gündə rəsmiləşdirilib.
Estafet iştirakçılarını böyük coşqu ilə qarşılayan rayon sakinləri arasında gənclər üstünlük təşkil edib. Əlinəzərli kəndindən gəlmiş Zaur Quliyev sevincini AZƏRTAC-ın müxbiri ilə bölüşərək deyib: “Biz beyləqanlı gənclər birinci Avropa Oyunlarının ölkəmizdə keçirilməsindən və məşəl estafetinin bu gün doğma rayonumuzda alovlandırılmasından sonsuz fərəh və qürur hissi keçiririk. Bu tarixi hadisə Azərbaycanı dünyada müasir, demokratik, tolerant, sülhsevər, daim inkişaf edən, qüdrətlənən bir dövlət kimi bir daha tanıdacaq. Buna görə rayon gəncləri adından Prezident İlham Əliyevə və ilk Avropa Oyunları Təşkilat Komitəsinin sədri Mehriban Əliyevaya minnətdarlığımı bildirirəm”.
Beyləqan şəhər 2 nömrəli tam orta məktəbin müəllimi Lamiyə Əliyeva isə deyib: “Bu günlər respublikamızın əhalisi böyük fərəh içərisindədir. Azərbaycanı bölgə-bölgə dolaşan birinci Avropa Oyunlarının məşəli indi bizim rayonumuzda alovlanmağa başladı. Bu möhtəşəm mərasimi izləmək üçün minlərlə beyləqanlı küçələrə axışıb. Gördüyünüz kimi, uşaqdan ahıla kimi hamı bayram əhval-ruhiyyəsindədir. Respublikamızın gündən-günə çiçəklənməsinə və bugünkü unudulmaz günə görə ölkəmizin hər bir vətəndaşı kimi azərbaycanlı olmağımla fəxr edirəm”.
Tarixi hadisəni sevincini yaşayan rayon sakini Tofiq Sadıqov fikirlərini belə ifadə edib: “Azərbaycan birinci Avropa Oyunlarının həyəcanı ərəfəsindədir. Biz bu gün ölkənin digər bölgələrində olduğu kimi, Beyləqanda da məşəlin necə coşqu və fəxarətlə qarşılandığını gördük. Bütün bu alqışlar xalqımızın Avropa Oyunlarına verdiyi yüksək dəyərin və keçirdiyi sevinc hissinin göstəricisidir. İnanıram ki, bütün dünyanın diqqət mərkəzində olan bu möhtəşəm idman bayramı yüksək səviyyədə keçəcək. Birinci Avropa Oyunları Azərbaycanın beynəlxalq aləmdə nüfuzunu daha da artıracaq”.

Paylaş:

Baxılıb: 1728 dəfə