“Bakı-2015”in çempion iştirakçıları”

Bakı:

23 °C

47 %

4 m/s

Əlaqə

AZ RU EN

Ana səhifə / İdman / “Bakı-2015”in çempion iştirakçıları”

“Bakı-2015”in çempion iştirakçıları”

28.05.2015 [11:11]

Cari ilin iyun ayında ölkəmizdə keçiriləcək “Bakı-2015” ilk Avropa Oyunları ölkəmizin və Avropanın idman tarixində mühüm hadisə olacaq. 12-28 iyun tarixləri arasında baş tutacaq Oyunlarda 49 ölkədən 6000-dən çox idmançının yarışacağı gözlənilir. Oyunların proqramına 28 yay olimpiya idman növündən 15-i, həmçinin, 2 qeyri-olimpiya idman növü daxildir. Oyunlarda iştirak edən idmançıların siyahısına nəzər saldıqda görünür ki, ilk Avropa Oyunları “qoca qitə” üçün xüsusi əhəmiyyət kəsb edir. Çünki burada Dünya, Avropa və Olimpiya çempionları iştirak edəcəklər.
Xəbər verdiyimiz kimi, “Yeni Azərbaycan” qəzeti olaraq oxucuları ilk Avropa Oyunlarında iştirak edəcək dünyaca məşhur idmançıların bir qismi ilə tanış edəcəyik. Beləliklə, “Bakı-2015”in çempion iştirakçıları” rubrikamızı davam etdiririk.
“Bakı-2015” ilk Avropa Oyunlarında iştirak edəcək idmançılardan biri avarçəkmə üzrə böyük nailiyyətlər əldə etmiş danimarkalı Rene Holten Poulsendir. Onun idmana marağı ekskursiya zamanı ilk dəfə olaraq avarçəkmə idmançısını görməklə yaranıb. Pekin Yay Olimpiya Oyunları onun üçün beynəlxalq müsabiqələr sırasında ən yaddaqalanıdır, çünki Olimpiya Oyunlarında ilk dəfə iştirak etməsinə baxmayaraq o, medal əldə edə bilib. Həmin nailiyyətindən sonra o deyib ki, bu uğuru onun idman karyerasını davam etdirməyə təkan oldu. Çoxsaylı nailiyyətləri ilə yanaşı, “Hər zəman hər hansı bir sahə üzrə heç kimin edə bilməyəcəyini edən yeganə şəxs olmaq istəmişəm” sözləri ilə idman ictimaiyyətinin yaddaşında qalan R.H.Poulsen 2013-cü ildə keçirilmiş Avropa Çempionatında 2 qızıl medal və “Pekin-2008” Yay Olimpiya Oyunlarında bürünc medal qazanıb. İlk Avropa Oyunlarında iştirak etməyi səbirsizliklə gözlədiyini deyən idmançı bu Oyunlarda böyük nailiyyət qazanmaq iddiasındadır.
“Bakı-2015” ilk Avropa Oyunlarında iştirak edəcək digər idmançı isə belçikalı cüdoçu Şarlin van Snikdir. “London-2012” Yay Olimpiya Oyunlarının bürünc mükafatçısı Snik bir çox müsabiqələrin qalibi qismində fəxri kürsüdə yer alaraq ölkəsini layiqincə təmsil edib. O, “Bakı-2015” ilk Avropa Oyunlarının əhəmiyyətini xüsusi vurğulayaraq burada iştirakın böyük əhəmiyyət kəsb etdiyini bildirib. Təsadüfi deyil ki, onun mayın 23-24-də Mərakeşdə cüdo üzrə “World Masters” beynəlxalq turnirində iştirakdan imtina etməyinin səbəbi ilk Avropa Oyunlarına qatılması olub. İdmançı bildirib: “Bakıda təşkil olunacaq birinci Avropa Oyunlarında yüksək nəticə əldə etmək üçün “World Masters” beynəlxalq turnirinə qatılmayacağam. Tarixdə ilk dəfə təşkil olunacaq Avropa Oyunlarına ciddi hazırlaşıram. Çalışacağam ki, Bakıda medalçılar sırasında yer alım”.
NURLAN

Paylaş:

Baxılıb: 940 dəfə