Aydın Hüseynov: Azərbaycan valyuta ehtiyatlarının həcminə görə “20-lik ölkələri” qrupuna daxil olub

Bakı:

12 °C

76 %

10 m/s

AZ RU EN

Ana səhifə / İqtisadiyyat / Aydın Hüseynov: Azərbaycan valyuta ehtiyatlarının həcminə görə “20-lik ölkələri” qrupuna daxil olub

Aydın Hüseynov: Azərbaycan valyuta ehtiyatlarının həcminə görə “20-lik ölkələri” qrupuna daxil olub

05.06.2014 [08:58]

Beynəlxalq Valyuta Fondu (BVF) 2014-cü ildə Azərbaycanda maliyyə sabitliyinin və iqtisadi inkişafın davam edəcəyini proqnozlaşdırır. Fondun məlumatında deyilir ki, Azərbaycan hökumətinin son uğurları ölkənin beynəlxalq maliyyə bazarlarına çıxışına geniş stimul verir, həmçinin, valyuta ehtiyatlarının artması güclü sabitlik potensialını möhkəmləndirir. Yeni Azərbaycan Partiyası (YAP) Siyasi Şurasının üzvü, partiyanın İqtisadi məsələlər komissiyasının sədr müavini Aydın Hüseynovun fikrincə, ölkəmizdə həyata keçirilən düşünülmüş iqtisadi siyasət maliyyə-büdcə-valyuta ehtiyatlarının davamlı şəkildə artmasını təmin etməkdədir. Hazırda Azərbaycanın strateji valyuta ehtiyatları 54 milyard dollar səviyyəsinə çatıb və bu, regionda ən yüksək artım dinamikası deməkdir.
Aydın Hüseynov bildirib ki, hazırda Azərbaycanın valyuta ehtiyatları ümumi daxili məhsulun (ÜDM) təxminən 72 faizi səviyyəsinə çatıb və beynəlxalq normaları əhəmiyyətli üstələyir. Bu göstəriciyə görə Azərbaycan dünya ölkələrinin ilk “20-liyində” qərarlaşır. “Azərbaycanda valyuta ehtiyatları ölkənin xarici borcundan təxminən 11 dəfə çoxdur. Postsovet ölkələri ilə müqayisədə adambaşına düşən ən az xarici borc Azərbaycanda təşkil edir. Respublikamızda adambaşına düşən xarici borc orta statistik dünya göstəricisindən 17 dəfə, Rusiyanın göstəricisindən 8 dəfə, Qazaxıstanın göstəricisindən isə 7 dəfə aşağıdır”.
YAP-ın İqtisadi məsələlər komissiyasının sədr müavini bildirib ki, valyuta ehtiyatlarının yüksək artım tempi güclü makroiqtisadi buferin formalaşdırılması və ölkə iqtisadiyyatının xarici böhran təzahürlərinə həssaslığının azalması üçün əsas amildir. “Valyuta ehtiyatlarının artımı ölkənin iqtisadi inkişafının yüksək olmasına mühüm təsir göstərir. Cari ilin ötən 5 ayında Avropa və MDB ölkələrinin maliyyə ehtiyatlarının artım potensialına diqqət yetirsək, həmin dövlətlərdə valyuta ehtiyatlarının həcminin çoxalmasının 6-8 faiz civarında olduğunu görmək olar. Azərbaycanda isə valyuta ehtiyatlarının artım tempi 22-25 faiz təşkil edib. Onu da nəzərə almaq lazımdır ki, respublikamızın ümumi strateji maliyyə ehtiyatlarının formalaşmasında başlıca rolu neft ixracı amili oynayır və ötən aylar ərzində neft istehsalının və nəqlinin azalması baş versə də, ölkəmizin strateji valyuta ehtiyatları əhəmiyyətli dərəcədə artıb. Azərbaycan hökuməti digər iqtisadi resursların, qeyri-neft məhsullarının istehsalını və nəqlini artırmaqla, həmçinin, dünyanın etibarlı maliyyə qurumlarında saxlanılan valyuta sərvətlərinin səmərəli idarə olunması sayəsində mühüm irəliləyişlərə nail olub”.
A.Hüseynovun sözlərinə görə, nikbin proqnozlara əsasən, Azərbaycanın strateji valyuta ehtiyatları bu ilin sonuna qədər 58 milyard dollara çatacaq və ÜDM-in 80 faizini ötəcək.

Paylaş:

Baxılıb: 1267 dəfə