Bakıda Azərbaycan-Qazaxıstan Hökumətlərarası Komissiyasının 12-ci iclası keçirilib

Bakı:

13 °C

71 %

8 m/s

Əlaqə

AZ RU EN

Ana səhifə / İqtisadiyyat / Bakıda Azərbaycan-Qazaxıstan Hökumətlərarası Komissiyasının 12-ci iclası keçirilib

Bakıda Azərbaycan-Qazaxıstan Hökumətlərarası Komissiyasının 12-ci iclası keçirilib

05.12.2015 [11:16]

Dekabrın 4-də Bakıda Azərbaycan-Qazaxıstan İqtisadi Əməkdaşlıq üzrə Hökumətlərarası Komissiyasının 12-ci iclası keçirilib. İclasda “Azərbaycan Respublikası Hökuməti və Qazaxıstan Respublikası Hökuməti arasında sənaye mülkiyyətinin mühafizəsi sahəsində əməkdaşlıq haqqında 1998-ci il 23 oktyabr tarixli Sazişdə dəyişikliklər edilməsi barədə” Protokol imzalanıb.
AZƏRTAC xəbər verir ki, iclasa Hökumətlərarası Komissiyanın Azərbaycan tərəfindən həmsədri, energetika naziri Natiq Əliyev və Qazaxıstan tərəfdən isə həmsədr, bu ölkənin energetika naziri Vladimir Şkolnik başçılıq ediblər. Görüşdə Azərbaycan ilə Qazaxıstan arasındakı siyasi və iqtisadi əlaqələrin yüksək səviyyədə olduğu bildirilib. Qeyd edilib ki, bu əlaqələrin inkişafında Azərbaycan-Qazaxıstan Hökumətlərarası Komissiyası təqdirəlayiq fəaliyyət göstərir.
İclasda Azərbaycan ilə Qazaxıstan arasında ikitərəfli münasibətlərin müxtəlif sahələrdə uğurla inkişaf etdiyi vurğulanıb və əlaqələrin bundan sonra daha da genişlənəcəyinə əminlik ifadə olunub. İki ölkə arasında iqtisadi sahə ilə yanaşı mədəniyyət, turizm və humanitar sahələrdə əməkdaşlığın daha da inkişaf etdirilməsi üçün potensialın olduğu qeyd edilib.
Azərbaycanın energetika naziri Natiq Əliyev və Qazaxıstanın energetika naziri Vladimir Şkolnik tərəfindən Azərbaycan-Qazaxıstan İqtisadi Əməkdaşlıq üzrə Hökumətlərarası Komissiyasının 12-ci iclasının Protokolu imzalanıb.
Sonra iclasın yekunları ilə bağlı mətbuat konfransı keçirilib. Komissiyanın Azərbaycan tərəfindən həmsədri, energetika naziri Natiq Əliyev deyib ki, iclasda iki ölkə arasındakı əlaqələrin hazırki vəziyyəti müzakirə edilib. Həmçinin, iclasda neft sektoru ilə yanaşı, qeyri-neft sektorunun, xüsusən də iki ölkə arasındakı nəqliyyat infrastrukturunun genişləndirilməsi məsələləri nəzərdən keçirilib.
Komissiyanın Qazaxıstan tərəfindən həmsədri Vladimir Şkolnik isə bu vaxta kimi iki ölkə arasında 100-dən çox rəsmi sənədin imzalandığını xatırladıb. Bildirib ki, həmin sənədlərin əksəriyyəti neft-qaz və enerji sektorunu əhatə edir. V.Şkolnik iki ölkənin kənd təsərrüfatı, nəqliyyat və digər sahələrdə də əməkdaşlığının genişləndirilməsi üçün böyük imkanların olduğunu deyib.
Qeyd edək ki, Azərbaycan ilə Qazaxıstan arasında əməkdaşlığın genişləndirilməsi və dərinləşdirilməsi məqsədilə yaradılmış İqtisadi əməkdaşlıq üzrə Hökumətlərarası Komissiyasının indiyədək 11 iclası keçirilib. Komissiyanın fəaliyyət dövrü iki ölkə arasında ticari-iqtisadi, yanacaq-enerji, nəqliyyat, kənd təsərrüfatı, mədəniyyət, turizm, ətraf mühit, rabitə və yüksək texnologiyalar, eləcə də digər sahələrdə əlaqələrin daha da genişləndirilərək dərinləşməsinə töhfə verib.

Paylaş:

Baxılıb: 1249 dəfə