Milli Musiqi Günü: Şəhərin hər yerindən gələn milli səs...

Bakı:

17 °C

94 %

2 m/s

Əlaqə

AZ RU EN

Ana səhifə / Mədəniyyət / Milli Musiqi Günü: Şəhərin hər yerindən gələn milli səs...

Milli Musiqi Günü: Şəhərin hər yerindən gələn milli səs...

18.09.2026 [08:30]

Hər səhər işə gedərkən metroya düşürəm. İnsanların tələsdiyi, bir-birini tanımayan yüzlərlə insanın eyni istiqamətə hərəkət etdiyi bu məkanın özünəməxsus bir səsi var. Amma bəzən o səs-küyün içindən bir musiqi yüksəlir və hər şey bir anlıq dəyişir...

Metroda səslənən həzin milli musiqi tək mənim yox, mənim kimi minlərlə sərnişinin ürəyinə toxunur. Kimisi yol gedə-gedə musiqiyə qulaq asır, kimisi bir anlıq fikrə gedir, kimisi üzündə təbəssümlə yoluna davam edir. Musiqinin sehrli tərəfi də elə budur: insanı bəzən xəyal qurmağa, bəzən sevincə, bəzən şənlənməyə, bəzən də kövrəlməyə vadar edir.

Bəlkə də metro kimi hər gün minlərlə insanın keçdiyi bir məkanda milli musiqinin səslənməsi təsadüfi seçim deyil. Çünki musiqi yalnız qulaqla eşidilən sənət deyil. O, yaddaşdır, hissdir, kimlikdir. Bir melodiyanı eşidərkən bəzən sözə ehtiyac qalmır. Musiqi insanın içində çoxdan mövcud olan, amma ifadə edə bilmədiyi duyğuları oyadır.

Bu gün 18 sentyabr - Milli Musiqi Günüdür. Bu tarix həm də Azərbaycan professional musiqisinin banisi, dahi bəstəkar Üzeyir Hacıbəylinin doğum günüdür. Ümummilli Lider Heydər Əliyevin təşəbbüsü ilə 1995-ci ildən etibarən hər il sentyabrın 18-i ölkəmizdə Milli Musiqi Günü kimi qeyd olunur.

Üzeyir bəyin adı Azərbaycan musiqisinin elə bir mərhələsi ilə bağlıdır ki, onun yaradıcılığından danışarkən təkcə bəstəkardan yox, bütöv bir musiqi məktəbinin formalaşmasından danışırıq.

O, milli musiqi xəzinəmizi yeni janr və formalarla zənginləşdirdi. “Leyli və Məcnun”la Şərqdə ilk operanın əsasını qoydu, “Koroğlu” operası ilə Azərbaycan professional musiqisinin ən möhtəşəm nümunələrindən birini yaratdı. Üzeyir Hacıbəyli həm də Azərbaycan Xalq Cümhuriyyətinin dövlət himninin musiqisinin müəllifidir. Müstəqilliyimizin bərpasından sonra həmin himn Azərbaycan Respublikasının Dövlət Himni kimi yenidən qəbul edildi.

Onun fəaliyyəti yalnız bəstəkarlıqla məhdudlaşmırdı. Musiqişünas, publisist, dramaturq, pedaqoq kimi Azərbaycan mədəniyyətinin müxtəlif sahələrində iz qoyan Üzeyir Hacıbəyli milli musiqi təhsilinin və bəstəkarlıq məktəbinin inkişafında böyük rol oynadı. 2025-ci ildə imzalanmış sərəncamda da onun Şərqdə ilk operanın yaradıcısı, musiqişünas-alim, publisist, dramaturq və pedaqoq kimi çoxşaxəli fəaliyyəti xüsusi qeyd olunur.

Bəlkə də Üzeyir bəyin yaradıcılığının ən mühüm xüsusiyyətlərindən biri milli olanı müasir və universal dillə ifadə edə bilməsi idi. O, Şərq və Qərb musiqi ənənələrini bir araya gətirərək Azərbaycan musiqisinin dünyaya açılan qapılarından birini yaratdı.

Bu gün onun musiqisinin metroda, parklarda, meydanlarda səslənməsi də həmin irsin gündəlik həyatımıza toxunan tərəfidir.

Çünki mədəniyyət yalnız muzeylərdə, kitabxanalarda, konsert salonlarında yaşamamalıdır. Bəzən onu küçədə, parkda, metroda eşitməliyik. İnsan işə gedərkən, dostuna görüşə tələsərkən, yaxud sadəcə şəhərin bir başından digər başına gedərkən milli musiqi ilə qarşılaşmalıdır. Bu, xüsusilə şəhərimizə gələn turistlər üçün də maraqlı bir təcrübədir. Onlar Bakının tarixi binalarını, İçərişəhərini, Xəzər sahilini görməklə yanaşı, Azərbaycanın səsini də eşidə bilərlər.

Biz bəzən ölkəmizi turistlərə yalnız “nə görmək olar?” sualı üzərindən təqdim edirik. Halbuki “nə eşitmək olar?” sualı da ən azı onun qədər maraqlıdır.

Azərbaycanı görmək mümkündür - tarixi abidələrimiz, qədim şəhərlərimiz, muzeylərimiz, təbiətimiz bunun üçündür. Amma Azərbaycanı eşitmək də mümkündür. Tarın səsində, kamançanın nisgilində, muğamın dərinliyində, Üzeyir bəyin yaratdığı musiqilərdə...

Və bəlkə də şəhərin ən gözəl tərəfi budur: səhər tələsik addımlarla metroya daxil olan insan axınının içində bir musiqi səslənir və bir neçə dəqiqəlik hamımız eyni hissin içində birləşirik.

Musiqinin sərhədi yoxdur. O, yaşından, peşəsindən, dünyagörüşündən asılı olmayaraq hər kəsə toxuna bilir.

Bu gün Üzeyir Hacıbəylinin xatirəsini yad edərkən onun əsərlərinə yalnız keçmişin yadigarı kimi baxmayaq. Onun yaratdığı musiqini yaşadaq, dinləyək, gələcək nəsillərə ötürək.

Çünki milli musiqi sadəcə keçmişimizin səsi deyil.

O, bu günümüzün də səsidir.

Havar Şəfiyeva

Paylaş:

Baxılıb: 563 dəfə