Türkiyənin “Takvim” qəzetində “İlham Əliyev yenidən seçilməlidir” sərlövhəli məqalə dərc edilib

Bakı:

28 °C

51 %

9 m/s

Əlaqə

AZ RU EN

Ana səhifə / Siyasət / Türkiyənin “Takvim” qəzetində “İlham Əliyev yenidən seçilməlidir” sərlövhəli məqalə dərc edilib

Türkiyənin “Takvim” qəzetində “İlham Əliyev yenidən seçilməlidir” sərlövhəli məqalə dərc edilib

17.07.2013 [11:16]

Türkiyənin “Takvim” qəzetinin köşə yazarı Bülənt Erandaçın “İlham Əliyev yenidən seçilməlidir” sərlövhəli məqaləsi dərc edilib.
AzərTAc xəbər verir ki, məqalədə Türkiyənin və Azərbaycanın Avrasiyanın nüfuzlu ölkələrindən olduğu diqqətə çatdırılır. Müəllif yazır ki, oktyabrın 16-da Azərbaycanda prezident seçkiləri keçiriləcək. Bu seçkidə Azərbaycan dövlətinin başçısı İlham Əliyevin üçüncü dəfə prezident seçilməsi Türkiyənin Qafqazdakı taleyi ilə sıx bağlıdır. Eyni dilə, eyni dinə, eyni tarixə malik olan Türkiyə-Azərbaycan əməkdaşlığının inkişafında İlham Əliyevin çox böyük xidmətləri vardır. İki liderin - Azərbaycan Prezidenti İlham Əliyevin və Türkiyənin Baş naziri Rəcəb Tayyib Ərdoğanın keçirdikləri görüşlərdə söylədikləri sözlərini xatırlasaq, İlham Əliyevin yenidən prezident seçilməsinin əhəmiyyətini daha yaxşı dərk edərik.
Sonra müəllif Azərbaycan Prezidenti İlham Əliyevdən sitat gətirir: “Bizim qəlblərimiz bir döyünür. Bizim dünyadakı ən mühüm qardaşımız, dostumuz, müttəfiqimiz Türkiyədir. Əminəm ki, Türkiyə üçün də dünyada bir nömrəli dost, qardaş və müttəfiq Azərbaycandır”. Baş nazir Rəcəb Tayyib Ərdoğanın fikirləri xatırladılır: “Aramızdakı qardaşlıq bağları çox güclüdür. Cənubi Qafqazda Türkiyə və Azərbaycan əməkdaşlığı olmadan heç bir mühüm regional və qlobal layihələr həyata keçirilə bilməz. Biz nə qədər birlikdə olarsaq, gücümüz də o qədər artacaqdır”.
Müəllif yazır ki, Qafqaza geosiyasi marağın yeni mərhələyə yüksəldiyi həqiqətdir. Yaxın Şərqdə baş verən hadisələrin daha geniş geosiyasi sahəyə təsir etməsi haqqında düşünmək lazımdır. Qlobal güclər, ABŞ, Rusiya, İngiltərə və Almaniyanın da Azərbaycana artan marağı nəzərə alınarsa “İlham Əliyev - Rəcəb Tayyib Ərdoğan” birliyinin nə qədər mühüm əhəmiyyət kəsb etdiyi daha aydın olar.
Bülənt Erandaç yazır ki, Ermənistan rəhbərliyi isə əvvəldən olduğu kimi, dağıdıcı mövqeyini davam etdirməkdədir. Bu vəziyyətdə bəzi güclərin Azərbaycanda sabitliyi pozmağa çalışması pis niyyətli planların olduğunu düşünməyə əsas verir. Problemi ədalətli şəkildə həll etmək əvəzinə, bölgənin bəzi ölkələrinin daha çox silahlandırılması istiqaməti seçilir. Bu isə vəziyyəti daha da ağırlaşdıra bilər.
Bildirilib ki, Azərbaycanın zəngin enerji resurslarına malik olması və Türkiyənin tranzit ölkə kimi əhəmiyyəti gələcəkdə hər iki ölkənin dünyadakı mövqeyini gücləndirir. Bu məsələdə Prezident İlham Əliyev Baş nazir Rəcəb Tayyib Ərdoğan ilə Bakıdakı görüşündə belə deyib: “Azərbaycanın çox böyük neft, təbii qaz resursları vardır. Türkiyə çox böyük iqtisadi gücə malik bir ölkədir. Biz bu resursları, tranzit imkanlarını, iqtisadi gücü birləşdirərək hər bir məsələdə dünyadakı mövqeyimizi qoruya biləcəyik. Çünki, bu gün dünya və Avropa üçün enerji təhlükəsizliyi məsələləri ön plana çıxır. Biz yaxşı bilirik ki, gələcəkdə Xəzər hövzəsində olan təbii resurslar dünya üçün böyük rol oynayacaq və Azərbaycan bu baxımdan yenə birinci sırada olacaqdır”.

Paylaş:

Baxılıb: 1200 dəfə