Ədliyyə Nazirliyində AŞPA-nın həmməruzəçiləri ilə görüş

Bakı:

28 °C

59 %

11 m/s

Əlaqə

AZ RU EN

Ana səhifə / Siyasət / Ədliyyə Nazirliyində AŞPA-nın həmməruzəçiləri ilə görüş

Ədliyyə Nazirliyində AŞPA-nın həmməruzəçiləri ilə görüş

17.06.2016 [10:07]

İyunun 16-da ədliyyə naziri Fikrət Məmmədov Avropa Şurası Parlament Assambleyası (AŞPA) Monitorinq Komitəsinin həmməruzəçiləri Sezar Florin Preda və Stefan Şennak ilə görüşüb.
Ədliyyə Nazirliyinin mətbuat xidmətindən AZƏRTAC-a bildiriblər ki, görüşdə Azərbaycan ilə Avropa Şurası arasında səmərəli əməkdaşlığı qeyd edən F.Məmmədov Avropa Şurasına üzv qəbul olunduqdan sonra ölkəmizdə həyata keçirilən demokratik hüquqi islahatlardan danışıb. Nazir qanunvericilik bazasının təkmilləşdirilməsi, məhkəmə sisteminin müstəqilliyinin gücləndirilməsi, vətəndaş cəmiyyətinin inkişafı istiqamətində görülən genişmiqyaslı işlər barədə məlumat verib, Avropa Şurasının “2014-2016-cı illər üçün Azərbaycan ilə bağlı Fəaliyyət Planı” çərçivəsində müxtəlif sahələr üzrə mühüm layihələrin həyata keçirildiyini qeyd edib.
Müzakirələr zamanı qonaqlar Azərbaycan Prezidenti İlham Əliyevin siyasi iradəsi ilə insan hüquqlarının təmin olunması istiqamətində atılan addımları, o cümlədən dövlətimizin başçısının təşəbbüsü ilə cinayət qanunvericiliyinə iqtisadi sahədə bəzi cinayətlərin dekriminallaşdırılması ilə bağlı dəyişikliklərin edilməsini, habelə məhkumların sayının azaldılmasını maraqla qarşılayıblar. Eyni zamanda, Azərbaycanın birinci xanımı, Heydər Əliyev Fondunun prezidenti Mehriban Əliyevanın təşəbbüsü ilə elan olunmuş amnistiya qərarının icrasına başlanılmasından və bu humanist aktın 10 minədək insana şamil edilməsindən məmnunluq ifadə olunub.
Həmməruzəçilər, həmçinin bütün Avropada aktual olan ədalət mühakiməsinin səmərəliliyinin artırılması istiqamətində ölkəmizdə həyata keçirilən islahatlar, o cümlədən hakimlərin Avropada örnək kimi dəyərləndirilən ən şəffaf seçimi barədə məlumatlandırılıb. Qonaqlar məhkəmə-hüquq sistemindəki islahatları təqdir edib, Ədliyyə Nazirliyi ilə səmərəli qarşılıqlı fəaliyyəti vurğulayaraq, əlaqələrin bundan sonra da uğurla davam etdiriləcəyinə əminliklərini bildiriblər.
Görüşdə əməkdaşlığın perspektivləri, qanunvericiliyin təkmilləşdirilməsi, alternativ cəza növlərinin tətbiqi və digər mövzular üzrə faydalı fikir mübadiləsi aparılıb, maraq doğuran məsələlərə aydınlıq gətirilib.
Tədbirdə Avropa Şurasının Bakıdakı Ofisinin rəhbəri xanım Draqana Filipoviç və Azərbaycanın AŞPA-da daimi nümayəndə heyətinin rəhbəri, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov iştirak ediblər.
Sonra qonaqlar nazirlikdə Ədliyyə tarixi muzeyi ilə tanış olublar.

Paylaş:

Baxılıb: 818 dəfə