Türkdilli dövlətlər arasında münasibətlər davamlı olaraq möhkəmlənir

Bakı:

28 °C

54 %

10 m/s

Əlaqə

AZ RU EN

Ana səhifə / Siyasət / Türkdilli dövlətlər arasında münasibətlər davamlı olaraq möhkəmlənir

Türkdilli dövlətlər arasında münasibətlər davamlı olaraq möhkəmlənir

08.09.2018 [10:24]

Ekspertlərin qənaətincə, Zirvə görüşü türkdilli dövlətlər arasında münasibətlərin uğurla inkişaf etdiyini və geniş perspektivlərə malik olduğunu nümayiş etdirdi
Müasir beynəlxalq münasibətlər sistemində regional, beynəlxalq təhlükəsizlik və əməkdaşlıq məsələləri mühüm əhəmiyyət kəsb edir. Yeni geostrateji şəraitdə ayrı-ayrı coğrafi məkanlarda təhlükəsizliyin təmin olunmasını şərtləndirən əhəmiyyətli amillərdən biri qarşılıqlı faydalı əlaqələrin və inteqrasiya prosesinin davam etdirilməsidir. Bu kontekstdə türkdilli dövlətlər arasında müxtəlif sahələri əhatə edən çoxşaxəli münasibətlərin inkişafı və əməkdaşlığın dərinləşdirilməsi böyük önəmə malikdir. Qırğız Respublikasının Çolpon-Ata şəhərində Türkdilli Dövlətlərin Əməkdaşlıq Şurasının VI Zirvə görüşünün keçirilməsi isə bu baxımdan mühüm strateji əhəmiyyət daşıyır. Ekspertlərin qənaətincə, Zirvə görüşü türkdilli dövlətlər arasında münasibətlərin uğurla inkişaf etdiyini və geniş perspektivlərə malik olduğunu nümayiş etdirdi.
Milli Məclisin deputatı Tahir Rzayev qeyd edib ki, mühüm məqamlarla yadda qalan Türkdilli Dövlətlərin Əməkdaşlıq Şurasının VI Zirvə görüşü türkdilli dövlətlər arasında dostluq və əməkdaşlıq münasibətlərinin daha da möhkəmlənməsinə xidmət edir: “Zirvə görüşündə türkdilli dövlətlər arasında müxtəlif sahələrdə əməkdaşlıq əlaqələrinin inkişafına dair müzakirələr aparıldı. Hesab edirəm ki, bu Zirvə görüşü türkdilli dövlətlər arasında qarşılıqlı faydalı münasibətlərin inkişafına müstəsna töhfələr verəcək”.
“Zirvə görüşündə türkdilli dövlətlər arasında iqtisadi əməkdaşlığın inkişafı və dərinləşdirilməsi də diqqət mərkəzində oldu. Əlbəttə, indiki şəraitdə türkdilli dövlətlər arasında iqtisadi əməkdaşlığın dərinləşdirilməsi həm ikitərəfli, həm də çoxşaxəli münasibətlərin inkişafı baxımından strateji əhəmiyyətə malikdir. Ticarət dövriyyəsinin artırılması və investisiya layihələrinin reallaşdırılması bu kontekstdə böyük önəm daşıyır”, - deyə millət vəkili əlavə edib.
T.Rzayev vurğulayıb ki, Azərbaycan türkdilli dövlətlərlə əməkdaşlıq əlaqələrinin inkişafına xüsusi önəm verir. “Ölkəmiz türkdilli dövlətlər arasında əlaqələrin güclənməsində maraqlıdır”, - deyə millət vəkili əlavə edib.
Milli Məclisin deputatı Sona Əliyeva isə deyib ki, dünyanın mövcud geosiyasi şərtləri fonunda türkdilli dövlətlər arasında əməkdaşlıq münasibətləri bu gün daha aktual və vacib xarakter daşıyır. Onun sözlərinə görə, xüsusilə Avrasiya məkanında mühüm proseslərin baş verdiyi zamanda türkdilli dövlətlər arasında səmərəli və uğurlu əlaqələrin mövcud olması regional təhlükəsizlik, o cümlədən beynəlxalq inteqrasiya kontekstində çox mühüm əhəmiyyətə malikdir. “Qırğız Respublikasının Çolpon-Ata şəhərində Türkdilli Dövlətlərin Əməkdaşlıq Şurasının VI Zirvə görüşünün keçirilməsi bu baxımdan böyük önəm kəsb edir. Türkdilli dövlətlər arasında əməkdaşlıq əlaqələrinin uğurla inkişaf etməsi sevindirici haldır”, - deyə millət vəkili əlavə edib.
S.Əliyeva qeyd edib ki, hazırda türkdilli dövlətlər arasında intensiv təmaslar həm tərəflər arasında münasibətlərin inkişafı, həm də regional və beynəlxalq əməkdaşlıq baxımından önəmlidir. “Azərbaycan türkdilli dövlətlərlə olduqca səmərəli və qarşılıqlı faydalı əməkdaşlıq əlaqələrinə malikdir. Bu əlaqələr, əsas etibarilə, siyasi, iqtisadi, nəqliyyat, energetika, ticarət və humanitar sahələri əhatə edir. Yəni Azərbaycan türkdilli dövlətlərlə müxtəlif sahələrdə sıx əməkdaşlıq əlaqələrini uğurla davam etdirir. Ötən müddət ərzində türkdilli dövlətlər arasında çoxşaxəli, genişmiqyaslı əlaqələrin inkişafı istiqamətində strateji əhəmiyyətə malik olan çox mühüm addımlar atılıb, əhəmiyyətli və uğurlu nəticələr, nailiyyətlər əldə edilib”, - deyə Milli Məclisin deputatı əlavə edib.
Nurlan QƏLƏNDƏRLİ

Paylaş:

Baxılıb: 573 dəfə