Xarici sərmayəçilərin Naxçıvana marağı artır

Bakı:

28 °C

51 %

10 m/s

Əlaqə

AZ RU EN

Ana səhifə / Siyasət / Xarici sərmayəçilərin Naxçıvana marağı artır

Xarici sərmayəçilərin Naxçıvana marağı artır

05.08.2010 [08:56]

Xarici tərəfdaşlarla sıx əlaqələrin yaranması Muxtar Respublikanın beynəlxalq bazarlara çıxışı üçün geniş imkanlar açır
Naxçıvan Muxtar Respublikasının zəngin iqtisadi resurslara malik olması və yüksək iqtisadi inkişafı qonşu dövlətlərin bu bölgəyə olan marağını daha da yüksəldir. Ermənistanın işğalçılıq siyasəti nəticəsində Azərbaycanın digər bölgələri ilə, xüsusilə də, paytaxtla, hava nəqliyyatı istisna olmaqla, nəqliyyat-kommunikasiya əlaqələrindən təcrid olunmuş vəziyyətə düşməsinə baxmayaraq, Muxtar Respublikanın qardaş Türkiyə və İranla sıx əlaqələri mövcuddur və bu münasibətlərin dinamikası hər il artır. Həmin ölkələr Naxçıvanın əlverişli coğrafi mühiti, iqlim şəraiti, zəngin xammal resursları və təbii ehtiyatlarının diversifikasiyasında yaxından iştirak edir, bu bölgənin iqtisadi təhlükəsizliyinin möhkəmlənməsində mühüm rol oynayır. Bu tendensiya isə Muxtar Respublikanın gücünün artmasına, bölgədə strateji mövqeyinin yüksəlməsinə səbəb olmaqdadır.
Bütün bu amillər son illərdə Naxçıvanın qonşu ölkələrlə yanaşı, digər dövlətlərlə də sıx əlaqələrinin yaranmasına impuls verib. MR-nın xarici dövlətlərlə qarşılıqlı siyasi-iqtisadi əməkdaşlıq münasibətlərinin genişlənməsi və birgə layihələrin həyata keçirilməsi intensiv xarakter alıb. Son 6 ildə Naxçıvan iqtisadiyyatına 1 milyard dollardan artıq sərmayə yatırılıb. Sərmayə qoyuluşunda Türkiyə, İran, Latviya, Almaniya, çin və digər ölkələrin investorları aparıcı yer tutur. Blokada şəraitində olmasına baxmayaraq, xarici tərəfdaşlarla sıx əlaqələri MR-nın beynəlxalq bazarlara çıxışına geniş imkanlar açır. Naxçıvanın əlverişli geocoğrafi mövqeyi isə bu bölgənin turizm potensialının zənginliyini göstərir və xarici investorlar burada ən böyük turizm obyektləri yaratmaq qərarına gəliblər.
Yeri gəlmişkən, ötən il Naxçıvanda Türkdilli ölkələrin Dövlət Başçılarının IX Zirvə Görüşündə türk ölkələri Naxçıvanın iqtisadi və turizm potensialı ilə daha yaxından tanış olublar və MR-nın iqtisadiyyatının müxtəlif sektorlarına kapital yatırmaq niyyətlərini bəyan ediblər. Türkdilli ölkələrin dövlət başçılarının Muxtar Respublikanın bir sıra obyektlərində, o cümlədən, bütün regionda ən məşhur turizm və sanatoriya mərkəzi kimi tanınan “Duzdağ” mərkəzində olması bu bölgəyə marağın daha da artması üçün stimul verir. Naxçıvanın iqtisadi resurslarından faydalanması bu ölkələrin sərmayədar kimi imkanlarının artmasına səbəb ola bilər.
Naxçıvan Muxtar Respublikasının investisiya baxımdan cəlbediciliyi və yaradılmış əlverişli sərmayə mühiti Türkiyə və İran investorlarının marağının artmasına səbəb olub və bu dinamizm özünü sərmayə qoyuluşlarında göstərir. Türkiyə Naxçıvanda potensial sərmayəçi kimi xüsusi paya malikdir. Qardaş ölkə bu bölgədə çox mühüm layihələri həyata keçirməyə nail olub və energetika, maşınqayırma, yüngül və yeyinti sənayesi, kənd təsərrüfatı, xidmət və digər sahələrdə təmsil olunur. Qars-Naxçıvan dəmir yolunun, Ərzurum-Naxçıvan qaz kəmərinin çəkilişi və Naxçıvan-İstanbul aviareysinin açılması Naxçıvanın regionda tranzit məkana çevrilməsinə səbəb olacaq.
Muxtar Respublikanın yüksək iqtisadi inkişafı və həyata keçirilən davamlı layihələr Naxçıvanın yaxın illərdə potensial ixracatçıya çevrilməsinə səbəb olacaq. Bu gün bu bölgədə istehsal olunan 35 növdə sənaye məhsulunun xarici ölkələrə ixrac olunması ixrac miqyasının daha da genişlənməsinə və Muxtar Respublikanın dünya iqtisadiyyatına inteqrasiyasının dərinləşməsinə təkan verəcək.
Elbrus CƏFƏRLİ

Paylaş:

Baxılıb: 1175 dəfə