Hərbi təzyiq, yoxsa beşinci sanksiya paketi?

Bakı:

24 °C

69 %

3 m/s

Əlaqə

AZ RU EN

Ana səhifə / Siyasət / Hərbi təzyiq, yoxsa beşinci sanksiya paketi?

Hərbi təzyiq, yoxsa beşinci sanksiya paketi?

17.03.2022 [10:24]

Qərb Rusiyanı dalana sıxışdırmaq niyyətindədir

PƏRVİZ

Martın 24-də NATO-nun Ukraynadakı vəziyyət və alyansın müdafiə qabiliyyətinin artırılması ilə bağlı fövqəladə sammiti keçiriləcək. Bu barədə təşkilatın baş katibi Yens Stoltenberq çərşənbə axşamı özünün twitter səhifəsində yazıb. “Mən martın 24-də NATO-nun mənzil-qərargahında fövqəladə sammit çağırdım. Biz Rusiyanın Ukraynaya müdaxiləsini, Ukraynaya güclü dəstəyimizi, NATO-nun çəkindirici və müdafiə qabiliyyətinin daha da gücləndirilməsini müzakirə edəcəyik”, - NATO-nun baş katibi bildirib.

Toplantıda Amerika Birləşmiş Ştatlarının Prezidenti Cozef Bayden də iştirak edəcək. Bu barədə ABŞ-ın NATO-dakı Nümayəndəliyi məlumat yayıb. Ağ Evin sözçüsü Cen Psaki isə Baydenin həm də Avropa Şurasının zirvə toplantısına qatılacağını bildirib. Sözügedən sammitlərdə Rusiyaya qarşı daha ciddi iqtisadi sanksiyalar, Ukraynaya humanitar yardımlar müzakirə olunacaq. Yeri gəlmişkən, Avropa Şurasının (AŞ) baş katibi Mariya Peyçinoviç-Buriç Rusiyanın təşkilatdan çıxması və Avropa İnsan Haqları Konvensiyasını denonsasiya etməsi barədə rəsmi bildiriş alıb. Bu barədə qurumun sözçüsü Daniel Höltgen twitter səhifəsində yazıb. Belə ki, Rusiya Avropa Şurasından çıxması ilə bağlı qərar qəbul edib və xarici işlər naziri Sergey Lavrov təşkilatın baş katibinə müvafiq məktubu təqdim edib.

Qərb dünyasının yenidən masa arxasına oturması Rusiyaya qarşı yeni təzyiqləri aktuall?şdırır. Bu, həm hərbi, həm də iqtisadi sanksiyalar müstəvisində baş verə bilər. Baş verənlər həm də qarşıdakı günlərdə gərginliyin inkişaf edən xəttlə yüksələcəyini deməyə əsas verir.

Məsələ ilə bağlı fikirlərini bölüşən politoloq Qabil Hüseynli də bildirib ki, proseslərin inkişafı NATO-nun Rusiya-Ukrayna müharibəsinə qatılmasını zəruriləşdirir. Onun sözlərinə görə, xüsusən, Ukraynanın hava məkanının bağlanması məsələsi artıq gündəlikdədir: “Bir neçə NATO ölkəsinin baş naziri Kiyevdədir. Bu isə o deməkdir ki, Kiyevə havadan zərbələr endirmək demək olar ki, qeyri-mümkündür. NATO-nun martın 24-də baş tutacaq fövqəladə iclasında isə yəqin ki, atılması nəzərdə tutulan yeni addımlar müzakirə olunacaq. Müzakirə predmetlərinə gəlincə, fikrimcə, ilk sırada Kiyevə hava hücumundan müdafiə sistemlərinin göndərilməsi dayanır. Bu texnikaları işlətmək üçün təlimatçılar da Ukraynaya göndərilə bilər. Bundan başqa, Polşada, Rumıniyada, Bolqarıstanda olan sovet istehsalı təyyarələr də Ukraynaya verilə bilər. Düzdür, ABŞ Ukraynaya yeni nəsil qırıcılar da göndərə bilərdi, amma həmin təyyarələrin idarə edilməsi ilə bağlı problemlər mövcuddur. Ukrayna ordusunda bu təyyarələrin idarə edilməsi ilə bağlı təcrübəli kadrlar yox səviyyəsindədir. Bu mənada, köhnə sovet sisteminə malik təyyarələr Ukrayna üçün daha əlverişli sayılır”.

Müzakirələrdə Rusiya ilə bağlı da məsələlərə toxunulacağını istisna etməyən Q.Hüseynli vurğulayıb ki, NATO öz planlarını gizlətmir. Bu planlarda isə bir çox məsələlər yer alır. “Hətta Rusiyanın qərb sərhədləri boyunca yeni NATO qüvvələrinin yerləşdirilməsi məsələsi də gündəmdədir. Müəyyən məqamda bu qüvvələri işə salmaqla Rusiyaya cavab zərbələri endirilə bilər. Hazırda ən aktual məsələ yeni sistemlərin işlədilməsi üçün təlimatçıların Ukraynaya göndərilməsi və yeni silahlardan istifadənin öyrənilməsidir”, - deyən politoloq vurğulayıb ki, hərbi qarşıdurma ilə yanaşı, qarşıdakı günlərdə 5-ci paket iqtisadi sanksiyaların da qəbulu gözlənilir. Eləcə də, elan edilən sanksiyalara nəzarət məsələsi ciddi şəkildə diqqət mərkəzindədir: “Bu sanksiyalar Rusiya daxilində böyük narazılıqlar yaradır. Qərb dairələri isə bundan istifadə edə bilər. Hətta qarşıdakı dövrdə Rusiyada yaşayan bəzi azsaylı xalqlar vasitəsilə Rusiya hakimiyyətinə qarşı təzyiqlərə də əl atılması gözləniləndir”.

Paylaş:

Baxılıb: 691 dəfə