Multikulturalizm həyat tərzimizdir...

AZ RU EN

Ana səhifə / Siyasət / Multikulturalizm həyat tərzimizdir...

Multikulturalizm həyat tərzimizdir...

04.10.2023 [10:55]

Erməni sakinlər reinteqrasiya prosesində bunun canlı şahidi olacaqlar

24 saatlıq antiterror tədbirlərinin nəticəsi olaraq ortaya çıxan ən mühüm reallıqlardan biri Qarabağın erməni sakinləri ilə təmasların inkişaf etdirilməsidir. Qeyd edək ki, bununla bağlı müvafiq addımlar atılmaqdadır. Azərbaycan Respublikasının Qarabağ bölgəsində yaşayan erməni sakinlər ilə təmaslar üzrə məsul şəxs qismində Ramin Məmmədovun reallaşdırdığı təmaslar zamanı erməni sakinlərin xaşihləri nəzər alınır, humanitar yardımların istiqamətləri müəyyənləşdirilir, eyni zamanda reinteqrasiyanın əsas mahiyyəti - proqramı müzakirə olunur. Xüsusilə, vurğulanmalıdır ki, Qarabağda yaşayan ermənilərin Azərbaycan cəmiyyətinə reinteqrasiyası hər zaman aktuallığını qoruyub -Vətən müharibəsindən sonrakı dövrdə zaman-zaman Azərbaycan dövləti bu istiqamətdə addımları və fikirləri ilə yadda qalıb. Prezident İlham Əliyev bu ilin əvvəlində Münhen Təhlükəsizlik Konfransında çıxışı zamanı da bildirmişdi ki, Qarabağ erməniləri Azərbaycan vətəndaşlarıdır, azlıqdır: “Azərbaycan çoxmillətli ölkədir və Azərbaycanda bütün azlıqlar mədəniyyət, dil, həmçinin təhlükəsizlik də daxil olmaqla, eyni hüquq və üstünlüklərdən faydalanırlar. Biz Qarabağdakı erməni icmasının nümayəndələri ilə praktiki təmaslara başlamağa hazırıq”.

Dini etiqad azadlığı, mədəni və dini abidələrin mühafizəsi təmin olunur

Reinteqrasiya proqramı çərçivəsində atılacaq addımlar arasında etnik, dini, dil mənsubiyyəti kimi məsələlər də yer almaqdadır. Prezident Adminstrasiyasının bununla bağlı açıqlamasında da bildiriir ki, sakinlərin öz mədəniyyətini, etnik-mədəni xüsusiyyətlərini qorumaq və inkişaf etdirmək hüququ təmin edilir. Dini etiqad azadlığı, mədəni və dini abidələrin mühafizəsi təmin olunur. Erməni dilinin istifadəsinə imkan yaradılır.

Azərbaycan dövləti hər zaman özünün tolerant siyasəti ilə seçilib. Hətta II Qarabağ müharibəsindən sonra torpaqlarımızın iğaldan azad edilməsi zamanı bəlli oldu ki, Azərbaycanın bir çox dini-tarixi abidəsi ermənilər tərəfindən dağıdılıb. Bunun qarşılığında Azərbaycan ərazilərimizdəki qeyri-islam abidələrini nəinki dağıtmadı, hətta onların rekonstruksiyası işlərinə start verdi. Məsələn, Şuşada yerləşən Qazançı kilsəsi bərpa olundu. Bu, ölkəmizin xoş niyyətini, qisasçılıq arzusunda olmadığını göstərir.

Multikulturalizm və tolerantlıq mərkəzi

Reinteqrasiyanın bəhs olunan istiqamətləri olduqca mühüm əhəmiyyət kəsb edir. Proses ərzində erməni sakinlər Azərbaycanın əldə etdiyi uğurlu inkişafın, əsaslı yeniliklərin və bu nailiyyətlərdə tolerantlığın, multikultural həyat tərzinin böyük rolunu görmüş olacaqlar. Eyni zamanda, qarşılıqlı etimadın möhkəmlənməsi üçün əsas şərt sayılan tolerantlığın, multikulturalizmin Azərbaycanda həyat tərzi olduğu bir daha bəlli olacaq - prosesin uğurla davam etməsi ölkəmizin gələcək inkişafı üçün də yeni mərhələ yaradacaq. Qarabağda yaşayan erməni sakinlər tolerant, multikultural həyat tərzinə malik olan Azərbaycanda bütün xalqların sivil münasibətlər çərçivəsində yaşadığını növbəti dəfə görmək imkanı qazanacaqlar, bunun şahidinə çevriləcəklər. Başqa sözlə, bu amil növbəti dəfə öz təsdiqini tapacaq - Azərbaycan tarixən müxtəlif millətlərin dinc, yanaşı yaşadığı, milli və dini tolerantlığın bərqərar olduğu bir ölkədir və ölkəmizdə yaşayan bütün xalqların nümayəndələrinə bərabər münasibət göstərilib və göstərilməkdədir. Ölkəmizdə millətlərarası münasibətlərin inkişafı istiqamətində ulu öndər Heydər

Əliyevin əsasını qoyduğu siyasi kurs Prezident İlham Əliyev tərəfindən uğurla davam etdirilir. Məhz dövlət başçımızın apardığı uğurlu fəaliyyət Azərbaycanın multikulturalizm və tolerantlıq mərkəzi kimi dünyada şöhrət qazanmasına şərait yaradıb - Azərbaycan dünyada sivilizasiyaların dialoq mərkəzi kimi tanınıb.

SADİQ

Paylaş:

Baxılıb: 138 dəfə