Tərtər rayonunda 2015-ci ilin yekunlarına həsr olunan hesabat yığıncağı keçirilib

Bakı:

26 °C

69 %

5 m/s

Əlaqə

AZ RU EN

Ana səhifə / Sosial / Tərtər rayonunda 2015-ci ilin yekunlarına həsr olunan hesabat yığıncağı keçirilib

Tərtər rayonunda 2015-ci ilin yekunlarına həsr olunan hesabat yığıncağı keçirilib

23.02.2016 [09:38]

Tərtər rayonunda 2015-ci ilin yekunlarına həsr olunan hesabat yığıncağı keçirilib. Yığıncaq iştirakçıları öncə Ümummilli lider Heydər Əliyevin Tərtər şəhərinin mərkəzi meydanındakı abidəsi önünə gül-çiçək dəstələri düzüb, 2015-ci ildə rayonun sosial-iqtisadi göstəricilərini əks etdirən stendlərə, istehsal edilən məhsullara və videoslayda baxıblar.
Gənclər Mərkəzində keçirilən yığıncaqda Tərtər rayon İcra Hakimiyyətinin başçısı Müstəqim Məmmədov bildirib ki, ötən il Tərtərdə infrastrukturun inkişaf etdirilməsi, sahibkarlığın dəstəklənməsi, əhalinin sosial-iqtisadi problemlərinin həlli və yaşayış məntəqələrinin abadlaşdırılması sahəsində tədbirlər uğurla davam etdirilib. Bu dövrdə Tərtər şəhərində Qarabağ müharibəsi əlilləri və şəhid ailələri üçün 54 mənzilli yaşayış binasının tikintisi başa çatdırılaraq istifadəyə verilib. Tərtər şəhəri və ətraf 11 kəndin içməli su və kanalizasiya sisteminin qurulması layihəsinin icrasına başlanılıb. Tərtər şəhərinin V.Orucov, T.Rəhimov, S.Vurğun, R.Kərimov və M.Hüseynzadə küçələrində 21,9 min kvadratmetr asfalt-beton örtüyü salınıb.
Hesabat ilində rayonun 14 yaşayış məntəqəsi qazlaşdırılıb. Hazırda Tərtər şəhərində 100 yerlik uşaq bağçasının, şahmat məktəbinin tikintisi, Qaradağlı-Seysulan avtomobil yoluna asfalt-beton örtüyünün salınması, Seydimli, Sarov, Kəbirli, Xoruzlu, Dəmirçilər, Ağkənd, Azad Qaraqoyunlu, Aşağı Qapanlı, İlxıçılar, Bəyimsarov kəndlərində qazlaşdırma işləri davam etdirilir.
Bildirilib ki, keçən il İqtisadiyyat Nazirliyinin Sahibkarlara Kömək Milli Fondu tərəfindən kənd təsərrüfatı məhsullarının istehsalına görə 34 sahibkara 359,2 min manat güzəştli kreditlər verilib. Əkinlərin suvarma suyu ilə təminatının yaxşılaşdırılması məqsədilə rayonun kəndlərində 14 subartezian quyusu qazılıb, 6 quyu bərpa olunub.
Qeyd olunub ki, ötən il Tərtər rayonunda ümumi məhsul istehsalının həcmi 125,8 milyon manat olub. Bu, əvvəlki ilin eyni dövrünə nisbətən 15,1 faiz çoxdur. Ümumi məhsulun 5,6 milyon manatını sənaye, 48,1 milyon manatını kənd təsərrüfatı, 26,4 milyon manatını tikinti və quraşdırma işləri təşkil edib. Sənaye məhsulunun həcmi 1,9 faiz, kənd təsərrüfatı məhsullarının həcmi 7,2 faiz, tikinti-quraşdırma işlərinin həcmi 2,2 dəfə çoxalıb.
Sonra rayon prokuroru Azər Hətəmov, Təhsil şöbəsinin müdiri Surxay Mirzəyev, Suvarma Sistemləri İdarəsinin rəisi Zahid İbrahimov, Mərkəzi rayon xəstəxanasının baş həkimi Yaşar Hüseynov, Tərtər Zona Bölgə Təcrübə stansiyasının direktoru Mehman Abdullayev, Qaraağacı kənd İƏD üzrə nümayəndə Lətif Həmidov, Bəyimsarov kəndindən fermer Habil İbrahimov məruzə ətrafında çıxış edərək təmsil etdikləri sahələr üzrə görülən işlərdən, əldə olunan uğurlardan, mövcud problemlərin aradan qaldırılması yollarından danışıblar.
Yığıncaqda Prezident Administrasiyasının məsul işçisi Arif Novruzov, Milli Məclisin deputatları Sahib Alıyev və Ağalar Vəliyev çıxış ediblər.
Sonda qərar layihəsi oxunub, yığıncaq iştirakçıları adından Prezident İlham Əliyevə müraciət qəbul olunub.

Paylaş:

Baxılıb: 1060 dəfə